سەنات باسشىسى پارلامەنتتىك تىلشىلەرمەن كەزدەستى. داريعا نازارباەۆا پارلامەنت جوعارعى پالاتاسىنىڭ وتكەن جىلعى جۇمىسىن قورىتىندىلاپ, الداعى جوسپارلار تۋرالى اڭگىمەلەدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
«قازاقستان پرەزيدەنتى ق.توقاەۆتىڭ پارلامەنت الدىنا قويعان مىندەتتەرى ورىندالدى, اتقارىلعان جۇمىستاردىڭ ناتيجەسىن ءبىز ماقتان تۇتامىز ءارى الداعى جىلدىڭ قاڭتار ايىندا دەپۋتاتتار ەل ايماقتارىندا سايلاۋشىلارمەن كەزدەسۋدە ول تۋرالى ايتىپ بەرەدى», - دەدى سەنات توراعاسى.
داريعا نازارباەۆا سەناتتىڭ 2019 جىلعى قىزمەتى تۋرالى ايتا كەلىپ, جوعارعى پالاتا دەپۋتاتتارىنىڭ جۇمىسى بۇرىنعىدان دا اشىق بولا تۇسكەنىن اتاپ ءوتتى: موبيلدىك قوسىمشا, ء«ماسليحاتتار» ۆەب-پورتالى ىسكە قوسىلدى, سەناتتىڭ سايتى جاڭعىرتىلدى. داريعا نازارباەۆا جۋرناليستەرگە اشىقتىق ساياساتى كەلەسى جىلى دا جالعاساتىنىن ايتىپ, سەناتتىڭ باستاماسىمەن جۋرناليستەرگە ارنالعان كونكۋرستار تۋرالى ەسكە سالدى.
«كەلەسى جىلى سەنات پەن ەكولوگيالىق جۋرناليستيكا سالاسىنداعى ماتەريالدار نەگىزىندە ەڭ جاقسى جۋرناليستىك زەرتتەۋگە كونكۋرس وتكىزۋ تۋرالى ۋادەنى ۇمىتقان جوقپىز. بايقاۋ باستالدى, جۇمىستارىڭىزدى جىبەرىڭىزدەر, زەرتتەۋ جۇرگىزىڭىزدەر, شىعارماشىلىق تالانت پەن ازاماتتىق ۇستانىم كورسەتىڭىزدەر. مەن ءبارىڭىزدى بەلسەندى تۇردە قاتىسادى دەپ ۇمىتتەنەمىن», - دەدى سەنات توراعاسى.
سەنات باسشىسى بۇقارالىق اقپارات قۇرالدارىنىڭ وكىلدەرىنە بىرلەسكەن جۇمىسى ءۇشىن العىسىن ءبىلدىردى جانە جۋرناليستەردىڭ كاسىبيلىگى مەن جەكە قاسيەتتەرىن اتاپ ءوتىپ, كەلە جاتقان جاڭا جىل مەرەكەسىمەن قۇتتىقتادى.
ء«سىزدىڭ قاجىرلى ەڭبەكتەرىڭىز, كومەكتەرىڭىز ءۇشىن العىس ايتامىن. جاڭا جىل قارساڭىندا سىزدەرگە زور دەنساۋلىق, باق-بەرەكە, ساتتىلىك پەن تابىس تىلەيمىن. جاڭا 2020 جىل قۇتتى بولسىن! جارقىن مەرەكە بارشامىز ءۇشىن جاقسىلىقتىڭ باستاۋى بولعاي!», - دەدى داريعا نازارباەۆا.