بۇگىنگى تاڭدا مەملەكەت تاراپىنان حالىقتى قولجەتىمدى باسپانامەن قامتۋعا ەرەكشە ءمان بەرىلىپ كەلەدى. پرەزيدەنت قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا «نەگىزگى قاعيدات – تۇرعىندار, اسىرەسە, الەۋمەتتىك تۇرعىدان ءالسىز توپتار ءۇشىن باسپانانىڭ قولجەتىمدىلىگىن ارتتىرۋ», دەي كەلە, باسپانا ساتىپ الۋعا جاعدايى جوق ازاماتتارعا الەۋمەتتىك جالعا الۋ تارتىبىمەن قونىستانۋ ءۇشىن مۇمكىندىك بەرۋ قاجەتتىگىن دە ايتقان ەدى. سونىمەن قاتار, مەملەكەت تاراپىنان «نۇرلى جەر», «7-20-25» جانە «باقىتتى وتباسى» سياقتى ءتيىمدى باعدارلامالار قابىلداندى. مەملەكەت باسشىسىنىڭ حالىقتى قولجەتىمدى تۇرعىن ۇيمەن قامتاماسىز ەتۋ تۋرالى تاپسىرماسىنا سايكەس, جامبىل وڭىرىندە اۋقىمدى جۇمىستار اتقارىلۋدا.
تاراز قالاسى بويىنشا بيىل «نۇرلى جەر» باعدارلاماسى بويىنشا 80 پاتەرلى 9 تۇرعىن ءۇي ەل يگىلىگىنە بەرىلدى. بۇل جاقسى ءۇردىس وڭىردە ءوز جالعاسىن تاۋىپ كەلەدى. بۇگىن جامبىل وبلىسىنىڭ اكىمى اسقار مىرزاحمەتوۆ تاراز قالاسىنداعى «قاراسۋ» ىقشاماۋدانىنان جاڭا سالىنىپ جاتقان 90 پاتەرلى جاتاقحانانىڭ كىلتىن كوپبالالى وتباسىلارعا تابىستادى. بۇل ۇيدە تۇرعىندار جەكەشەلەندىرۋ قۇقىعىنسىز تۇرا الادى. اكىم ءوز سوزىندە وبلىستىڭ 80 جىلدىعىنا وراي 80 نىساننىڭ اياسىندا پايدالانۋعا بەرىلىپ وتىرعان تۇرعىن ءۇيدىڭ تالاي جىل بويى ءۇي كەزەگىندە تۇرعان كوپبالالى جانە تۇرمىسى تومەن وتباسىلارعا تارتۋ بولعانىن, 80 جىلدىق بەكەر مال شاشپاق داڭعازا توي ەمەس, ەل يگىلىگىنە ارنالعان نىسانداردىڭ اشىلۋىمەن ەرەكشەلەنىپ وتىرعانىن جەتكىزدى. سونداي-اق, جىل سوڭىنا دەيىن ارقايسىسى 80 پاتەرلى 4 الەۋمەتتىك تۇرعىن ءۇي بەرىلەتىنىن اتاپ ءوتتى. جالپى, بيىل تاراز قالاسىنان كوپبالالى جانە از قامتىلعان وتباسىلارعا ارنالىپ 12 جاتاقحانانىڭ قۇرىلىسى جۇرگىزىلۋدە. بۇدان كەيىن ءسوز العان 12 بالانىڭ اناسى گۇلفيا ءداۋىتوۆا ءوزىنىڭ العىسىن ءبىلدىرىپ, كوپبالالى وتباسىلارعا تاعى دا وسىنداي مۇمكىندىكتەر كوپتەپ جاسالسا ەكەن دەگەن تىلەگىن جەتكىزدى.
بۇگىندە تاراز قالاسىنداعى «قاراسۋ» جانە «اراي» مولتەك اۋداندارىندا كوپبالالى وتباسىلارعا ارنالعان 6 كوپقاباتتى الەۋمەتتىك جاتاقحانانىڭ قۇرىلىسى جۇرگىزىلۋدە. قۇرىلىستىڭ جالپى اۋماعى 8100 شارشى مەتردى قۇراسا, پاتەردىڭ ءبىر شارشى مەترىنىڭ قۇنى 100,2 مىڭ تەڭگەگە اينالۋدا. مۇندا ينفراقۇرىلىم ماسەلەسى تولىقتاي شەشىلگەن. بۇگىن پايدالانۋعا بەرىلىپ وتىرعان جاتاقحانالاردىڭ ىشكى قۇرىلىسى ەكى بولمەلى پاتەرلەردەن تۇرادى. ءبىر پاتەردىڭ جالپى اۋدانى 35-40 شارشى مەتردى قۇرايدى. ءار پاتەردە زال جانە جاتىن بولمەلەر, سونداي-اق, جەكە اس ءۇيى, اجەتحاناسى مەن جۋىناتىن بولمەسى بار. سونداي-اق, كوپبالالى وتباسىلار ءۇشىن جاتاقحانانى جالعا الۋ قۇنى 3500 تەڭگەدەن اسپايدى.
جامبىل وبلىسى