جاستار جىلىنىڭ قورىتىندىسى اياسىندا ءداستۇرلى وبلىستىق «Jas Aqmola» جاستار جۇلدەسىمەن جانە «AQMOLA POWER» وبلىستىق يننوۆاتسيالىق يدەيا مەن جوبالار كونكۋرسى جەڭىمپازدارى ماراپاتتالدى. سالتاناتتى شاراعا ءوڭىر باسشىسى ەرمەك مارجىقپاەۆ قاتىسىپ, جاستارعا ساتتىلىك تىلەدى.
بەلسەندى جاستاردىڭ ىنتاسىن اشىپ, قىزمەتكە دەگەن ەرىك-جىگەرىن قايراۋ ءۇشىن ەڭبەگىن ەلەپ, قولعا العان باستامالارىنا قولداۋ كورسەتىپ وتىرعان ابزال. شاراعا وڭىرىمىزدەگى قاي سالادا بولسىن اتويلاپ الدا جۇرگەن, ناعىز سەن تۇر, مەن اتايىن دەيتىن كىل مىقتى جاستار جينالدى. ء وڭىر باسشىسى ەرمەك بورانباي ۇلى وڭىرىمىزدە جاستاردى قولداۋ باعىتىندا قولعا الىنىپ جاتقان شارالاردى اتاي وتىرىپ, ولاردى تىنباي ەڭبەكتەنۋگە شاقىردى.
– جاستار جىلىنىڭ سالتاناتتى اشىلۋىندا ەلباسى نۇرسۇلتان ءابىش ۇلى نازارباەۆ: «جاستار ەلىمىزدىڭ قازىرگى الەمدە باسەكەگە قابىلەتتىلىگىنىڭ باستى فاكتورى» دەپ اتاپ وتكەن بولاتىن. بۇگىنگى ءىس-شارا جاستاردىڭ قوعامدىق سانانىڭ قۋاتتى قوزعاۋشى كۇشى ەكەندىگىنىڭ تاعى ءبىر دالەلى,–دەدى وبلىس اكىمى ەرمەك مارجىقپاەۆ.
اعىمداعى جىل اقمولالىق جاستار ءۇشىن جەمىستى جىل بولدى. جىل باسىنان بەرى 6 مىڭنان استام جاس جۇمىسقا ورنالاستىرىلدى. ونىڭ ىشىندە «ەڭبەك» باعدارلاماسى بويىنشا 140 ادام الەۋمەتتىك جۇمىس ورىندارىنا جانە 722 ادام ءىس-تاجىريبەسىنە جىبەرىلدى. 412 ستۋدەنت وبلىس اكىمىنىڭ گرانتى بويىنشا ءبىلىم الۋدا. «جاس اقمولا» ءداستۇرلى وبلىستىق جاستار جۇلدەسىمەن 17 جاس جانە «AQMOLA POWER» وبلىستىق يننوۆاتسيالىق يدەيا مەن جوبالار كونكۋرسىنىڭ 12 جەڭىمپازدارىنا 200 000, 250 000 جانە 350 000 تەڭگەنىڭ سەرتيفيكاتتارى تابىستالدى.
– مەن «AQMOLA POWER» وبلىستىق يننوۆاتسيالىق يدەيا جوباسىنىڭ قاتىسۋشىسىمىن. اتالمىش جوباعا سۋمەن جۇمىس ىستەيتىن قوزعالتقىشتى ۇسىندىم. قازىلار القاسى ەڭبەگىمىزدى ەلەپ جاتقانىنا قۋانىشتىمىن. وسى قوزعالتقىشتى تولىق جەتىلدىرىپ, قولدانىسقا قوسقىم كەلەدى,–دەيدى «Jas Aqmola-2019» جۇلدەسىنىڭ يەگەرى ءاليحان قايىر.
مۇنداي ماراپاتتاۋلار دارىندى جاستاردى ودان ءارى ىنتالاندىرۋعا سەپتىگىن تيگىزەتىنى حاق.