كەشە سولتۇستىك قازاقستان وبلىسى اكىمدىگىندە قوعام قايراتكەرلەرى, باق پەن ساياسي پارتيالار وكىلدەرى, بيزنەس قاۋىمداستىعى قاتىسقان كەڭەيتىلگەن وتىرىس بولىپ, وندا ەكونوميكانىڭ بارلىق سالاسى بويىنشا جاڭا جىلداعى جۇمىس جوسپارى جاريالاندى. وتىرىستى جۇرگىزگەن ءوڭىر باسشىسى قۇمار اقساقالوۆ ءسوزدى ءار سالانىڭ باسشىلارىنا بەرىپ وتىردى.
الدىمەن اۋىل شارۋاشىلىعى باسقارماسىنىڭ باستىعى ەربولات بەكشەنوۆتىڭ, يندۋستريالىق-يننوۆاتسيالىق دامۋ باسقارماسىنىڭ باستىعى ارمان ورازعۇلوۆتىڭ, قۇرىلىس, ساۋلەت جانە قالا قۇرىلىسى باسقارماسىنىڭ باستىعى سەرiك مۇحامەديەۆتىڭ جانە ت.ب. باياندامالارى تىڭدالدى. ولاردىڭ ايتۋىنا قاراعاندا الدىمىزداعى جىلى وتاندىق جانە شەتەلدىك 226,3 ملرد تەڭگە كاپيتال وندىرىسكە قۇيىلىپ, سونىڭ ارقاسىندا 34 جوبا ىسكە اسىرىلماقشى. بۇل جاڭادان 3000 جۇمىس ورنىن اشۋعا قول جەتكىزەدى.
سونىڭ ىشىندە اگروونەركاسىپ سالاسىنا ۇستىمىزدەگى جىلى قۇيىلعان جانە جاڭا جىلدا جالعاساتىن ينۆەستياتسيا كولەمدەرى مەن ىسكە اسىرىلاتىن جوبالار تۋرالى ايتىلدى. «جالپى, بۇل سالا بويىنشا 2020 جىلى ءبىز ون ءۇش ءىرى ينۆەستيتسيالىق جوبالاردى ىسكە اسىرۋدى جوسپارلاپ وتىرمىز. ولارعا 22,8 ملرد تەڭگە قۇيىلىپ, جاڭادان 300 جۇمىس ورىنىن اشۋ جوسپارلانعان», دەدى ە.بەكشەنەۆ. ونىڭ ايتۋىنا قاراعاندا وبلىس ازىق-ت ۇلىك قاۋىپسىزدىگىن قامتاماسىز ەتۋدىڭ ءبىر امالى رەتىندە تاۋارلى-ءسۇت فەرمالارىن كوكپتەپ قۇرۋعا قاتتى نازار اۋدارۋدا ەكەن. ماسەلەن, قازىر «قىزىلجار-ءسۇت» جشس ءسۇت وندىرۋگە 2,1 ملرد تەڭگە قۇيىپ, 720 ورىندىق كەشەندى بيىل سالىپ ۇلگەرگەن. ەندى الدىمىزداعى كوكتەمدە 1,8 ملرد تەڭگەگە اۆستريادان 360 تۇياق ءسۇتتى سيىر جەتكىزبەكشى. ءسويتىپ جاڭادان 35 جۇمىس ورنىن اشۋدى كوزدەپ وتىر ەكەن.
ءسۇت فەرماسىن اشۋدى كوزدەپ وتىرعان شارۋالار بۇدان باسقا دا بىرنەشەۋ بولىپ شىقتى. سونىڭ ىشىندە عابيت مۇسىرەپوۆ اۋدانىنداعى «ۆوزۆىشەنكا سك» 600 ورىندىق ءسۇت كەشەنىن سالۋدى قولعا العان. ا.نۋكاەۆ باسشىلىق ەتەتىن بۇل جشس جوباعا 1,2 ملرد تەڭگە قۇيۋعا دايىن ەكەن. سونداي-اق ا.ساپاروۆ باسقاراتىن «نوعايباي» جشس دە وسىنداي جوبانى قولعا الىپ وتىرعان كورىنەدى. وسىنداي بارلىعى جەتى تاۋارلى-ءسۇت فەرمالارى سقو-دا الدىمىزداعى جىلى ەسىگىن اشپاقشى.
اسىل تۇقىمدى رەپرودۋكتورلار ءوندىرۋ ءىسى دە نازاردان تىس قالمايدى. اقجار اۋدانىنداعى ت.ارعىنباەۆ باسقاراتىن «بەرەكە-اقجار» جشس 2500 تۇياق وسىنداي بۇقا وسىرمەكشى, سونىمەن قاتار 3000 تۇياق مال سەمىرتۋ الاڭىن قۇرۋدى كوزدەپ وتىر ەكەن. بۇل ىستەرگە «بەرەكە - اقجار» بارلىعى 2,5 ملرد تەڭگەنىڭ قاراجاتىن قۇيماقشى. جشس قازىردىڭ وزىندە اتالعان مالداردى ساتىپ الۋ جونىندە اۆستراليانىڭ «اۆسترالتيكس» فيرماسىمەن كەلىسىمشارت جاساپ قويعان.
وسىنداي مال سەمىرتۋ الاڭدارىن «ەلەتسكوە» جشس, «جەرقۋار» اگروفيرماسى, «استىق ساتۋ كومپانياسى» جشس قولعا الىپ وتىر. ولاردىڭ ارقايسىسى بۇل ىسكە 2 -3 ملرد تەڭگەدەن اقشا قۇيادى. قۇس ەتىن ءوندىرۋ بويىنشا «ياكورسكايا پتيتسەفابريكا» جشس ءوندىرىستى دامىتۋعا 0,6 ملرد تەڭگە قۇيىپ, قۇس سانىن قوسىمشا 75 مىڭعا ارتتىرماق, بۇل جۇمىرتقا ءوندىرۋ كولەمىن تاۋلىگىنە 100-دەن 150 ملن داناعا دەيىن ارتتىرادى دەپ كۇتىلۋدە.
ەت-ءسۇت ونىمدەرىن شىعارۋ بويىنشا الداعى جىلى سقو-نىڭ «ماسلو دەل» جشس اتتى ءىرى فيرماسى وندىرىسكە 4,2 ملرد تەڭگە قۇيىپ, جىلدىق قۋاتىن 32 مىڭ توننا ءونىم شىعارۋدى جوسپارلاپ وتىر. سونداي-اق شۆەيتساريانىڭ ەكسويل گرۋپپ ماي شىعارۋ زاۋىتىمەن بىرلەسكەن جاڭا كاسىپورىن سالۋ بويىنشا كەلىسسوزدەر جۇرگىزىلۋدە ەكەن.
قۇرىلىس سالاسى بويىنشا ايتىلعاندا قۇراماجەم شىعاراتىن «KAZMEAL» زاۋىتى ىسكە قوسىلىپ, 76 جۇمىس ورنى اشىلعانى بەلگىلى بولدى. بۇعان قۇيىلعان ينۆەستيتسيا كولەمى 4,2 ملرد تەڭگە بولىپ, جىلدىق قۋاتى 360 مىڭ توننا ەكەنى جەتكىزىلدى. سونىمەن قاتار كوپتەن ىسكە قوسىلماي تۇرعان «EMC Agro» ەت قومبيناتى تولىق جوندەۋدەن وتكەن. بۇل ىسكە 5 ملرد تەڭگە سالىنىپ, جاڭادان 78 جۇمىس ورنى اشىلعان. قازىر ەت كومبيناتى تاۋلىگىنە 50 توننا ءونىم دايىنداي الادى.
سونىمەن بىرگە وبلىس ورتالىعىندا كوپتەن بەرى قاڭىراپ تۇرعان ورىندا «Dostyk Mall» ساۋدا ورتالىعى ىسكە قوسىلىپ, وعان مەملەكەت پەن جەكەمەنشىك كاپيتال بىرلەسىپ 5,4 ملرد تەڭگە ينۆەستيتسيا قۇيعانى ايتىلدى. قازىر قالالىقتاردىڭ كوزايىمىنا اينالعان بۇل ورىن شاھاردىڭ دا ءسانىن ارتتىرىپ تۇر.
«قىزىلجار» ارنايى ەكونوميكالىق ايماعىنا تۇركيانىڭ YDA Holding كومپانياسى قىزىعۋشىلىق ءبىلدىرىپ, 500 ورىندىق اۋرۋحانا كەشەنىن سالۋدى كوزدەپ وتىرعانى دا ايتىلدى. بۇل ءىستى ىسكە اسىرۋ ءۇشىن «Petropavlovsk City Hospital» جشس قۇرىلعان ەكەن, ال 12 جەلتوقساندا يندۋستريا جانە ينفراقۇرىلىمدىق دامۋ مينيسترلىگىنىڭ بۇيرىعىمەن اۋرۋحانا كەشەنى باسىمدى باعىتتاعى قۇرىلىس قاتارىنا ەنگىزىلىپتى. سونداي-اق فانەرا زاۋىتى, شروت شىعاراتىن تسەح, تەرموۆاگوندار زاۋىتى, ەلەكتروتەحنيكالىق كاسىپورىن جانە اعاش وڭدەۋ زاۋىتى ىسكە قوسىلادى دەپ جوسپارلانىپ وتىر.
ال ايىرتاۋ اۋدانىندا وتاندىق ينۆەستور «Energo Trust» جشس جەلدىڭ كۇشىنەن قۋات الۋ پاركىن سالۋدى جوسپارلاپ وتىرعان كورىنەدى. جالپى وبلىستا بارلىعى 25 جەل گەنەراتورى ورناتىلادى دەپ كۇتىلۋدە. ەگەر ولاردىڭ ءبارى ورناتىلسا 50 مەگاۆاتت ەلەكتر قۋاتى وندىرىلمەك. «بۇل جوبالار ءوڭىر ەكونوميكاسىنا تىڭ سەرپىن بەرەدى. ءبىزدىڭ ماقسات ەكونوميكانى اگرارلى-يندۋستريالى ەتۋ. جاڭا كاسىپورىندار اشىپ, ءوندىرىس كولەمىن ۇلعايتۋ كەرەك», - دەدى قۇمار اقساقالوۆ وتىرىستى قورىتىندىلاعان سوزىندە.
مىنە, قىسقاشا ايتقاندا سولتۇستىك قازاقستان وبلىسىنىڭ جاڭا جىلداعى ەكونوميكالىق جاڭالىقتارى وسىنداي بولماق.
سولتۇستىك قازاقستان وبلىسى