جامبىل وبلىسىنىڭ جۋالى جانە جامبىل اۋداندارىنىڭ اۋماعىندا قارلى بوران تۇرىپ, ونىڭ سالدارىنان جامبىل مەن تۇركىستان وبلىستارىن جالعايتىن كۇرە جول جابىلعان بولاتىن. جولدىڭ كورىنبەۋى سالدارىنان كولىك قوزعالىسى دا قيىنداپ, ءتىپتى جولدا قالعاندار دا كەزدەستى.
جامبىل وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى, پوليتسيا پولكوۆنيگى سامات قۇسايىنوۆتىڭ ايتۋىنشا, اۋا-رايىنىڭ قولايسىزدىعىنا بايلانىستى «باتىس ەۋروپا-باتىس قىتاي» رەسپۋبليكالىق ماڭىزى بار اۆتوجولىنىڭ تۇركىستان وبلىسىنىڭ باعىتىندا جانە ودان ءارى قاراي تۇركىستان وبلىسىنىڭ شەكاراسىنداعى نۇرلىكەنت اۋىلىنان وتەتىن 534 شاقىرىمىندا جانە تاراز قالاسى باعىتىنداعى 593 شاقىرىمىنداعى جولدار جابىلعان. دەي تۇرعانمەن, جەدەل شەشىمدەر قابىلدانىپ, قار قۇرساۋىندا قالعاندار قۇتقارىلدى.
وقيعاعا وراي, وبلىستىق پوليتسيا دەپارتامەنتى باسشىلىق قۇرامىنىڭ قاتىسۋىمەن 130-عا جۋىق پوليتسيا قىزمەتكەرى جانە 32 قىزمەتتىك كولىك تاۋلىك بويى جولداردا كەزەكشىلىكتە بولىپ, جولداعى قاۋىپتىلىك دەڭگەيىنىڭ جوعارى بولۋىنا وراي جۇرگىزۋشىلەرگە ەلدى مەكەندەردەن شىقپاۋدى ەسكەرتتى. سونداي-اق, پوليتسيا قىزمەتكەرلەرى قار قۇرساۋىندا قالعان 466 كولىك پەن ادامداردى شىعارىپ, قاۋىپسىز جەرلەرگە جانە جىلىتۋ پۋنكتتەرىنە جەتكىزدى. ەلدى مەكەندە بارلىعى 6 جىلىتۋ پۋنكتى اشىلىپ, 505 ادام ورنالاستىرىلدى. ونىڭ ىشىندە 7 ادام كورشى قىرعىز رەسپۋبليكاسىنىڭ ازاماتى.
«پوليتسيا قىزمەتكەرلەرىنىڭ ەكى تاۋلىك بويى تىنىمسىز قىزمەت كورسەتىپ, جول جاعدايىن ۇزدىكسىز باقىلاۋىنىڭ ناتيجەسىندە زارداپ شەگۋشىلەر بولعان جوق. قازىرگى ۋاقىتتا اۋا-رايىنىڭ تۇراقتانىپ جانە جولداردىڭ تازالانۋىنا بايلانىستى تاراز قالاسىنان تۇركىستان وبلىسى باعىتىنداعى تاس جول اشىلدى. جۇرگىزۋشىلەر قاۋىپسىزدىگى مەن جول-كولىك اپاتتارىنىڭ الدىن الۋ ماقساتىندا اتالعان اۋماقتار جامبىل وبلىسى پوليتسيا دەپارتامەنتىنىڭ باقىلاۋىندا», دەيدى سامات قۇسايىنوۆ.
جامبىل وبلىسى