تۇركىستان وبلىسىنىڭ اكىمى ومىرزاق شوكەەۆ پەن قالا اكىمى راشيد ايۋپوۆ شاھارداعى باس شىرشانىڭ شامىن جاقتى. قالا ورتالىعىنداعى «گۇلدەر» ساياباعىندا بوي كوتەرگەن ەلىمىز بويىنشا ەڭ بيىك جاڭا جىلدىق شىرشاعا تۇركىستاندىقتار مەن قالا قوناقتارى جينالدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
«جاڭا جىل – بىزدەر, جاستار, بۇلدىرشىندەر اسىعا كۇتەتىن وتباسىلىق مەيرام. سوندىقتان, ءبىز بالالار جاقسى كورەتىن مەرەكەدە شىرشانى ورناتتىق. وزدەرىڭىزگە بەلگىلى, ەلباسى جارلىعىمەن قابىلدانعان شەشىم اياسىندا تۇركىستان تۇلەپ جاتىر. كەلەر جىلى شاھارىمىزعا ورتالىق ازيا ەلدەرىنىڭ باسشىلارىن شاقىرىپ, تۇركىستاندى الەمگە پاش ەتپەكپىز. مۇنىڭ ءبارى سىزدەر, بولاشاق ۇرپاق ءۇشىن جاسالىپ جاتقان دۇنيە. ەندەشە, جاڭا جىل بارشامىزعا جاقسىلىق اكەلسىن! ءاربىر باستاعان جۇمىستارىمىز تابىستى اياقتالىپ, ىنتىماعىمىز نىعايا بەرسىن!», – دەگەن لەبىزىن بىلدىرگەن ومىرزاق ەستاي ۇلى جينالعان بالالارعا 700-دەن استام سىيلىق تاراتتى.
مەرەكەلىك شارادا اياز اتا مەن اقشاقارلار مەرەكەلىك شەرۋ ۇيىمداستىرىپ, ەرتەگىلەر الەمىنىڭ ءارتۇرلى كەيىپكەرلەرى بالالارمەن ءان شىرقاپ, بي بيلەدى. 20 مەترلىك الىپ شىرشادا 2000-داي ويىنشىقتار مەن جارىقشامدار ورناتىلعان. بيىل جاڭا جىلدىق شىرشا شاھارداعى «گۇلدەر» الاڭى مەن «جەڭىس» ساياباعىنا ورناتىلعان. جاڭا جىل سيمۆولى وسىدان 3 جىل بۇرىن مەملەكەتتىك ساتىپ الۋ تاسىلىمەن الىنعان.
تۇركىستان قالاسىنداعى نەگىزگى مەرەكەلىك ءىس-شارالار 29 جەلتوقسان كۇنى «جەڭىس» ساياباعىندا وتپەك. كۇردەلى جوندەۋدەن كەيىن پايدالانۋعا بەرىلگەن جاڭا باقتا ەرەكشە فورماتتاعى مەرەكەلىك كونتسەرت جوسپارلانىپ وتىر. سالتاناتتى شارا اسەرلى وتشاشۋمەن اياقتالدى.