«سامۇرىق-ەنەرگو» ەلەكترەنەرگەتيكالىق حولدينگى ءوز كومپانيالارىنداعى ىشكى پروتسەستەردى تسيفرلاندىرىپ, اۆتوماتتاندىرۋ باعىتىنداعى جۇمىستارىن جالعاستىرىپ كەلەدى.
وسى اۋقىمدى جۇمىستىڭ اياسىندا حولدينگكە قاراستى اكتسيونەرلىك قوعامنىڭ ءبىرى – «الاتاۋ جارىق كومپانياسى» ديسپەتچەرلىك پۋنكتتەردى قايتا قۇرىلىمداۋ جوباسىنىڭ تۇساۋكەسەرىن وتكىزدى.
كومپانيا باسشىلىعىنىڭ ايتۋىنشا, بۇل قالادا جەتى ديسپەتچەرلىك پۋنكت بولسا, سونىڭ التاۋى قايتا جاڭارتىلىپ وتىر, ال بىرەۋى – ونسىز دا جاڭادان سالىنعان نىسان. جوبا الماتى قالاسىنىڭ ەنەرگوجۇيەسىندەگى اۋىتقۋلار مەن اپاتتى جاعدايلاردى جويۋدا جىلدام ءارى دۇرىس شەشىم قابىلداۋعا زور مۇمكىندىك بەرەدى. ءبىر ايتا كەتەرلىگى, «الاتاۋ جارىق كومپانياسى» التى اۋداندىق ديسپەتچەرلىك پۋنكتتەردى جەدەل-اقپاراتتىق كەشەندەرمەن جانە ۇجىمدىق پايدالانۋدى بەينەلەۋ جۇيەلەرىمەن (بەينەپانەلدەر نەگىزىندە) جاراقتاندىرا وتىرىپ, قايتا قۇرىلىمداۋ جوباسىن قازاقستاندا العاش رەت جۇزەگە اسىرىپ وتىرعان كومپانيا.
بۇل رەتتە, ۇجىمدىق پايدالانۋ اقپاراتىن بەينەلەيتىن جۇيەنى اۋقىمدى بەينەقابىرعا دەۋگە بولادى. بەينەقابىرعادان نەگىزگى ەنەرگيا وبەكتىلەرى, سونىڭ ىشىندە بارلىق كوممۋتاتسيالىق اپپاراتتار بەينەلەنگەن قوسالقى ستانسالار, جالپى, سول اۋداننىڭ كوممۋتاتسيالىق سحەماسى تۇگەل كورىنىپ وتىرادى. بەينەقابىرعانى ديسپەتچەر جۇمىس ورنىندا وتىرىپ باسقارا الادى.
«بۇل جوبا, ءبىرىنشى كەزەكتە, ەلەكتر توراپتىق كەشەندى باسقارۋ جۇيەسىن ۇنەمى جەتىلدىرۋگە جانە تۇتىنۋشىلاردى ۇزدىكسىز ەلەكتر قۋاتىمەن قامتاماسىز ەتۋگە باعىتتالعان. ال «الاتاۋ جارىق كومپانياسىنىڭ» باستى مىندەتى دە سول, تۇتىنۋشىلارعا ساپالى قىزمەت كورسەتۋ», دەپ اتاپ ءوتتى تۇساۋكەسەر راسىمىنە قاتىسقان «اجك» اق باسقارما توراعاسى مۇحيت ۇمبەتوۆ.
ديسپەتچەردىڭ جۇمىس ۇستەلىندە ورناتىلعان SCADA جۇيەسى توراپتاردىڭ جالپى سحەماسىن, سونداي-اق تەلەمەتريا دەرەكتەرىن شىعارا وتىرىپ, ەنەرگيا نىساندارىنىڭ ءبىر جەلىدەگى سحەماسىن كورسەتۋگە مۇمكىندىك بەرەدى. بۇل ءوز كەزەگىندە توراپتاردى باسقارۋ جەدەلدىگىن ايتارلىقتاي ارتتىرىپ, توتەنشە جاعدايلارعا تەز ارەكەت ەتۋ مۇمكىندىگى پايدا بولادى. سونىمەن قاتار ديسپەتچەرلىك پۋنكتتەردى قايتا جابدىقتاۋ ديسپەتچەرلەردىڭ جۇمىسىن ءتيىمدى ەتەدى.
ەڭ باستىسى, كومپانيا باسشىلىعى اتاپ وتكەندەي, وسى جوبانىڭ اياسىندا بۇرىن قاعاز جۇزىندە ساقتالعان بارلىق قۇجاتتار ەلەكتروندى فورماتقا كوشىرىلگەن.
ەستەرىڭىزگە سالا كەتەيىك, «سامۇرىق-ەنەرگو» حولدينگىنە قاراستى «الاتاۋ جارىق كومپانياسى» – الماتى قالاسى مەن الماتى وبلىسىندا ەلەكتر توراپتارىنىڭ سەنىمدى جۇمىس ىستەۋىن جانە ءتيىمدى دامۋىن قامتاماسىز ەتەتىن, ءىرى وڭىرلىك ەنەرگيا جەتكىزۋشى كومپانيا.