اياگوزدىڭ جەرى كەڭ, حالىقتىڭ دەنى اتا كاسىپپەن شۇعىلدانادى.
اياگوز – وبلىستاعى اۋىل شارۋاشىلىعى جاقسى دامىعان اۋدانداردىڭ ءبىرى. بيىل اۋدانداعى 8 شارۋا قوجالىعى «سىباعا» باعدارلاماسى ارقىلى قارجى ينستيتۋتتارىنان 4 پايىزبەن 396 ملن. 200 مىڭ تەڭگە نەسيە الىپ, شەت ەلدەن 672 باس اسىل تۇقىمدى ءىرى قارا ساتىپ اكەلىپتى. سونىمەن قاتار 48 شارۋا قوجالىعى 481 ملن. 770 مىڭ تەڭگەگە 33 تراكتور, 1 كومباين جانە 66 وزگە دە تەحنيكاعا قول جەتكىزىپتى. اسىرەسە اۋداندا قۇدىق قازدىرۋ, جايىلىمداردى سۋعارۋ جۇمىستارى جاندانىپتى. بۇل تۋرالى اياگوز اۋدانىنىڭ اكىمى دىلدابەك ورازباەۆ سەمەيدە وتكەن بريفينگتە ايتتى. «بۇرىندارى اۋىل شارۋاشىلىعىنا دەم بەرۋ ءۇشىن مەملەكەت تاراپىنان جايىلىمداردى سۋعارۋ, شارۋا قوجالىقتارىنا قۇدىق قازىپ بەرۋ سىندى جۇمىستار جۇرگىزىلەتىن. كەيىننەن بۇل باعدارلاما توقتاپ قالدى. ەلىمىز تاۋەلسىزدىك العان سوڭ وسى عان ۇقساس باعدارلاما قايتا جاڭعىردى. قازىر جاسىل ەنەرگەتيكانىڭ قۋاتىن پايدالانىپ, شالعايداعى شارۋا قوجالىقتارىن سۋلاندىرۋ جۇمىستارى جۇرگىزىلۋدە. اۋدانىمىزدا دا بۇل جۇمىس قارقىندى تۇردە جۇزەگە اسۋدا. بۇگىندە اۋداندا 195 شارۋا قوجالىعى وزدەرىنىڭ جايىلىمدىق جەرلەرىنەن 174 قۇدىق قازدىرتىپ, «جايىلىمداردى سۋعارۋ» باعدارلاماسى ارقىلى مەملەكەت تاراپىنان 216 ملن. 400 مىڭ تەڭگە قايتارىمسىز قارجى (سۋبسيديا) الدى. سونىمەن قاتار, جايىلىمدىق جەرلەرىندە قۇدىعى بار شارۋا قۇرىلىمدارى 517 كۇن ساۋلەسى پانەلدەرىن ورناتتى. كۇن ساۋلەسى پانەلدەرىنىڭ شىعىندارىنىڭ 80 پروتسەنتىن مەملەكەت قايتارىمسىز قارجى (سۋبسيديا) ارقىلى قايتارىپ بەرۋدە. «جايىلىمداردى سۋعارۋ» باعدارلاماسى بويىنشا اۋدانىمىز رەسپۋبليكا كولەمىندە الدىڭعى قاتاردا» دەيدى اۋدان اكىمى.
اياگوز اۋدانى «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى ارقىلى 347 ملن. تەڭگە نەسيە الۋدى جوسپارلاپ, بۇل كورسەتكىشتى 114,1 پايىزبەن اسىرا ورىنداپتى. «اگرارلىق نەسيە كورپوراتسياسى» ارقىلى 120 ميلليون تەڭگە نەسيە الۋدى مەجەلەپ, بۇل كورسەتكىشتى 250 ميلليون تەڭگەگە جەتكىزىپ, ەكى ەسە ارتتىرىپتى. «اياگوز اۋدانىنا كەلگەندە ءار سالاعا ساراپتاما جاسادىم. اياگوزدىڭ جەرى كەڭ, حالىقتىڭ دەنى اتا كاسىپپەن شۇعىلدانادى. مەملەكەتتىڭ ۇسىنىپ وتىرعان ءارتۇرلى باعدارلامالارى بار. اسىرەسە, مال باسىن كوبەيتەمىن دەگەندەرگە مۇمكىندىك كوپ. اگروونەركاسىپتىك كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى اياسىندا 2018 جىلدىڭ 12 ايىندا 1 ملرد 722 ملن 600 مىڭ تەڭگە الىنعان ەكەن. مەن بۇل سانداردى كوبەيتۋدى تاپسىرعان بولاتىنمىن. سەبەبى, ونىڭ ار جاعىندا حالىقتىڭ مۇددەسى جاتىر. ناتيجەسى دە جامان ەمەس. بيىل 10 ايدىڭ ىشىندە وسى باعدارلاما بويىنشا اۋدانعا 3 ملرد. 030 ملن. 804 مىڭ تەڭگە ينۆەستيتسيا تارتىلدى. ياعني, ەكى ەسەگە كوپ. جىل سوڭىنا دەيىن بۇل كورسەتكىش ءالى دە جاقسارادى» دەيدى د.ورازباەۆ.
شىعىس قازاقستان وبلىسى