بۇگىن نۇر-سۇلتان قالاسىندا قر قك ۇلتتىق اسكەري-پاتريوتتىق ورتالىعىنىڭ اسكەري-تاريحي مۋزەيىنە سانكت-پەتەربۋرگ قالاسىنىڭ پيسكارەۆ ەسكەرتكىش زيراتىنان اكەلىنگەن قاسيەتتى توپىراق سالىنعان كاپسۋلا سالتاناتتى تۇردە بەرىلدى.
اتالعان كاپسۋلانى بۇكىل جورالعىسىن جاساي وتىرىپ, «ەسكەرتكىش اۋماعى» ىزدەۋ جاساعىنىڭ وكىلى, سانكت-پەتەربۋرگ جۋرناليستەر وداعىنىڭ جانە رەسەي فەدەراتسياسى كينەماتوگرافتار وداعىنىڭ مۇشەسى شەرحان ءابىلوۆ سالتاناتتى راسىممەن تاپسىردى. بۇدان بۇرىن قازاقستان رەسپۋبليكاسى قورعانىس مينيسترلىگىنە اتالعان ىزدەۋ جاساعىنىڭ كومانديرى مايدان قۇسايىنوۆ ءىس-شارانى وتكىزۋگە قولداۋ كورسەتۋ تۋرالى ءوتىنىش ءبىلدىرىپ, قورعانىس ۆەدومستۆاسىنىڭ قولداۋىنا يە بولدى.
بۇدان باسقا, مۋزەيگە «ۆەچنىي ۆاش پودۆيگ ۆ سەردتساح گريادۋششيح پوكولەني» دەپ اتالاتىن ۇستەل مەدالى, لەنتالار, نەمىس جانە ورىس تىلدەرىندەگى ناسيحاتتاۋ قاعازدارى, سونداي-اق دەرەكتى فيلمدەر مەن پيسكارەۆ ەسكەرتكىش كەشەنى تۋرالى قوسىمشا اقپاراتتىق ماتەريالدار بەرىلگەن بولاتىن.
1941-1945 جج. ۇلى وتان سوعىسىنىڭ تاريحىندا پيسكارەۆ ەسكەرتكىشىنىڭ ماڭىزى زور. بۇل زيراتتا لەنينگراد مايدانىندا قازا بولعان 420 مىڭ بەيبىت حالىق, سونداي-اق شايقاستا مەرت بولعان 70 مىڭ سارباز بەن وفيتسەر جەرلەنگەن. ۇلى وتان سوعىسىندا لەنينگراد مايدانىنا قازاقستاندىقتار دا قاتىسقان. پيسكارەۆ زيراتىنداعى باۋىرلاستار قورعانىندا ءبىزدىڭ دە وتانداستارىمىز دا جەرلەنگەن بولۋى مۇمكىن.