ۇلتتىق قوعامدىق سەنىم كەڭەسىنىڭ مۇشەسى ابىلاي مىرزاحمەتوۆ ۇلتتىق كەڭەستىڭ ەكىنشى وتىرىسىنداعى مەملەكەت باسشىسىنىڭ تاپسىرمالارىنا قاتىستى پىكىر ءبىلدىردى.
- ۇلتتىق كەڭەستىڭ ءبىرىنشى وتىرىسىندا ەلدى تولعاندىرىپ جۇرگەن بارلىق ماسەلەلەر ايتىلعان بولاتىن. ال ەكىنشى وتىرىستا ايتىلعان ماسەلەلەر بويىنشا اتقارىلعان جۇمىستار باياندالدى. ماسەلەن جەردى ءتيىمدى پايدالانۋ, ونى زاماناۋي تسيفرلى تەحنولوگيامەن باقىلاۋ, مۇمكىندىگى شەكتەۋلى ادامدارعا ارنايى كۆوتا ءبولۋ, جاستارعا قوعامدىق-ساياسي ليفتىلەر قۇرۋ, اتاۋلى الەۋمەتتىك كومەك بەرۋدە ناعىز مۇقتاج جانداردىڭ الۋىن قامتاماسىز ەتۋ دەگەن سىندى كوپتەگەن وزەكتى ماسەلەلەردىڭ شەشىمىن تابۋعا ارنالعان ناقتى ۇسىنىستار ايتىلدى, - دەدى ابىلاي مىرزاحمەتوۆ.
سونداي-اق ول كەيبىر ماسەلەلەردى شەشۋ ءۇشىن 2-3 اي ازدىق ەتەتىنىن ايتتى.
- مەملەكەت باسشىسى جيىندا كەيبىر ماسەلەلەردى شەشۋ ءۇشىن 2-3 اي ازدىق ەتەتىنىن ايتا كەلە ءالى دە تالقىعا سالىنىپ, وڭ شەشىم شىعارىلاتىنىن ايتتى. راسىندا كەيبىر ماسەلەلەردى شەشۋدە اسىعىس شەشىم قابىلداۋدىڭ قاجەتى جوق. وسىنداي ديالوگ الاڭدارىندا تالقىعا سالىپ, ورتاق مامىلەگە كەلىپ, دۇرىس شەشىم شىعارعان ءجون. بۇل ارقىلى حالىق پەن مەملەكەت اراسىنداعى تىعىز قارىم-قاتىناس تا ورنايدى. ارىپتەستەرىمنىڭ ايتقان ءار ۇسىنىسى قولداۋ تاۋىپ, ماسەلەلەردىڭ كۇرمەۋى شەشىلىپ جاتقانىنا قۋانىشتىمىن. مىسالى ەكونوميكا سالاسىنداعى سالىق تولەۋ, جەردى ءتيىمدى پايدالانۋ, اقشا-نەسيە ستراتەگياسى سىندى ماسەلەلەردى مۇحتار تايجان ايتىپ وتكەن بولاتىن. ەكىنشى وتىرىستا وسى ايتىلعان ماسەلەلەر وڭدى شەشىمىن تاۋىپ جاتىر. سونداي-اق جالعان فيرمالار اشىپ, اقشا جىمقىرۋدىڭ سان ءتۇرلى تاسىلدەرىن ىستەپ جۇرگەندەرگە قارسى كۇرەس ۇيىمداستىرىلاتىنى ايتىلدى. بۇل كوپتەن بەرى كوكەيدە جۇرگەن تاقىرىپ ەدى. ەندى بۇل ءىس تە ءبىر جولعا قويىلاتىن بولدى, - دەدى ا.مىرزاحمەتوۆ.
سونىمەن قاتار ول يگەرىلمەي, بوس جاتقان جەرلەردى ءتيىمدى پايدالانۋ جايىن ءسوز ەتتى.
- جەردى ءتيىمدى يگەرۋ ماسەلەسى تولىق شەشىلسە, قاراپايىم حالىقتىڭ ءال-اۋقاتى الدەقايدا جاقسارار ەدى. قازىر يگەرىلمەي, بوس جاتقان جەرلەر وتە كوپ. سول جەرلەر حالىققا اۋىل شارۋاشىلىعىمەن, مال شارۋاشىلىعىمەن اينالىسۋعا بەرىلسە, يگى ءىس بولار ەدى, - دەدى ول.