قاسىم-جومارت توقاەۆ ۇكىمەتكە مۇمكىندىگى شەكتەۋلى ادامداردى جۇمىسقا قابىلداۋ ءۇشىن ارنايى كۆوتا بولۋگە قاتىستى تاپسىرما بەردى.
«ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنە جۇگىنسەك, ەلىمىزدەگى 106 مىڭ مۇمكىندىگى شەكتەۋلى ادامنىڭ 25 پايىزى عانا جۇمىسپەن قامتىلعان. جۇمىس بەرۋشىلەر مۇمكىندىگى شەكتەۋلى ادامداردى قابىلداۋ ءۇشىن ارنايى كۆوتا ءبولۋى ءتيىس. ۇكىمەتكە وسى مىندەتتىڭ ورىندالۋ بارىسىن قاداعالاۋدى تاپسىرامىن. ورىنداماعان جاعدايدا وتەماقى تولەۋ ماسەلەسىن قاراستىرۋ كەرەك», دەدى پرەزيدەنت.
سونداي-اق مەملەكەت باسشىسى بارلىق ايماقتاردا ەڭبەكپەن قامتۋ جانە الەۋمەتتىك وڭالتۋ ورتالىقتارى جۇمىس ىستەۋى ءتيىس ەكەنىن ءسوز ەتتى.
«اقمولا, اقتوبە, الماتى جانە باتىس قازاقستان وبلىستارى مەن نۇر-سۇلتان, شىمكەنت قالالارىندا مۇنداي ورتالىقتار جوق. بۇل – ۇلكەن كەمشىلىك, سوندىقتان ونداي ورتالىقتاردى قالايدا اشۋدى تاپسىرامىن. وسى جۇمىستى مەملەكەت پەن جەكەمەنشىكتىڭ ارىپتەستىگى ارقىلى ىسكە اسىرۋعا بولادى», دەدى ول.
بۇدان سوڭ, قاسىم-جومارت توقاەۆ جۇمىس ىستەيتىن مۇمكىندىگى شەكتەۋلى ادامدارعا وڭالتۋ كومەگىن مەملەكەتتىك الەۋمەتتىك ساقتاندىرۋ قورىنىڭ قارجىسى ەسەبىنەن بەرۋ ماسەلەسىن قاراستىرۋدى ۇسىندى.