بۇگىن دۋشانبەدە قازاقستان مەديتسيناسىنىڭ كۇندەرى باستالدى. ەكى كۇندىك شاراعا «قازاق ونكولوگيا جانە راديولوگيا عىلىمي-زەرتتەۋ ينستيتۋتى» اق باسقارما ءتورايىمى, قازاقستان رەسپۋبليكاسىنىڭ ۇعا اكادەميگى ديليارا قايداروۆا, ءسۇت بەزى ىسىكتەرى ورتالىعىنىڭ جەتەكشىسى ءاليا ابدراحمانوۆا, باس جانە مويىن ىسىكتەرى ورتالىعىنىڭ جەتەكشىسى مۇرات قايباروۆ قاتىسىپ وتىر.
قازوجرعزي باسشىسى ديليارا قايداروۆا تاجىكستاننىڭ ونكولوگ-دارىگەرلەرىنە قازاقستاندا ونكولوگيالىق كومەك كورسەتۋ جانە ونكولوگيادا دەربەستەندىرىلگەن دياگنوستيكا جونىندە ءدارىس وتكىزدى. ايتا كەتۋ كەرەك, ونكولوگيالىق كومەك كورسەتۋدىڭ قازاقستاندىق ۇلگىسى ورتالىق ازيا ەلدەرىنىڭ كورسەتكىشى بولىپ تابىلادى.
ال 2018 جىلى قازاقستاندا ونكولوگيالىق اۋرۋلارعا قارسى كۇرەس بويىنشا كەشەندى جوسپار قابىلداندى, ول بىلىكتى مامانداردى دايىنداۋدى, جاڭا تەحنولوگيالاردى ەنگىزۋدى جانە وڭىرلىك ونكولوگيالىق مەكەمەلەردە جابدىقتار پاركىن جاڭارتۋدى كوزدەيدى. جوسپار 2022 جىلعا دەيىن مەجەلەنگەن. قازاقستاندا ونكولوگيالىق ناۋقاستاردى سكرينينگتەن وتكىزۋ, ەمدەۋ جانە ءدارى-دارمەكپەن قامتاماسىز ەتۋ مەملەكەتتىك بيۋدجەت قاراجاتىنان تولىعىمەن قارجىلاندىرىلادى.
سونىمەن قاتار ءىس-شارا اياسىندا جەتەكشى قازاقستاندىق ونكولوگتار تاجىكستاننىڭ رەسپۋبليكالىق ونكولوگيالىق عىلىمي ورتالىعى بازاسىندا دوڭگەلەك ۇستەلدەر, دارىستەر مەن وقىتۋ ماستەر-كلاستارىن وتكىزىپ جاتىر. سونداي-اق دۋشانبە ونكولوگيالىق ورتالىعىندا ونكولوگيالىق ناۋقاستارعا كەڭەس بەرەدى.
ءسۇت بەزى ىسىكتەرى ورتالىعىنىڭ جەتەكشىسى ءاليا ابدراحمانوۆا ء«سۇت بەزدەرىنىڭ اۋرۋلارىن دياگنوستيكالاۋدىڭ زاماناۋي تاسىلدەرى» تاقىرىبىندا ءوز تاجىريبەسىمەن ءبولىستى. باس جانە مويىن ىسىكتەرى ورتالىعىنىڭ باسشىسى مۇرات قايباروۆ قالقانشا بەزى ىسىكتەرى مەن جاق استى سىلەكەي بەزىنىڭ ىسىكتەرى بويىنشا كورسەتكىش وتا جاسادى.
تاجىكستاننىڭ دارىگەر-ونكولوگتارى قازاقستاندىق ارىپتەستەرىنە پايدالى جانە قاجەتتى بىرلەسكەن تاجىريبەسى ءۇشىن العىستارىن ءبىلدىردى.
وسى ءىسساپار بارىسىندا قازاقستان مەن تاجىكستاننىڭ مەديتسينالىق ۇيىمدارى اراسىندا ىنتىماقتاستىق تۋرالى مەموراندۋمعا قول قويىلدى.