كوكشەتاۋدا قازاقستاننىڭ حالىق اقىنى كوكەن شاكەەۆتىڭ 95 جىلدىعىنا ارنالعان «مەنىڭ داۋىسىم – بۇقارانىڭ ءوز ءۇنى» اتتى تاقىرىپتا رەسپۋبليكالىق اقىندار ايتىسى بولىپ ءوتتى.
ايتىس دەسە دەلەبەسى قوزبايتىن قازاق كەمدە-كەم بولار. اتادان بالاعا ميراس بولعان وسى ءبىر اقسۇيەك ونەرگە دەگەن حالىقتىڭ ىقىلاسى ەجەلدەن ەرەكشە.
ادەتتە, ءسوز باستاۋ وڭاي ەمەس. العاشقى جۇپ بولىپ ورتاعا شىققان ارشالىلىق قۇرمەت قۇرالحان مەن اقتوبەلىك نارتاي تىلەۋقۇل. قارسىلاسىنىڭ اۋسەلەسىن ء«ا» دەگەننەن-اق باسا بىلگەن نارتاي ايتىس ونەرىندە ءبىرشاما ىسىلعان اقىن ەكەندىگىن بىردەن اڭعارتتى. ءبىزدىڭ وڭىردەگى تالانتتى جاستاردىڭ ءبىرى قۇرمەت تە وسال ەمەس ەدى. جىل باسىندا حالىقارالىق دەڭگەيدە وتكەن دودادا توپ جارعان قۇرمەتتەن حالىق ورەسى بيىك ونەر كۇتكەن. دەي تۇرساق تا, كەراعار پىكىر, ويدىڭ قايتالانۋى, ۇيقاستىڭ سولعىندىعى بايقالىپ تۇردى. وسىلايشا, بۇل جولى قۇرمەت ءوز بابىندا ەمەس ەكەندىگىن اڭعارتىپ الدى.
الماتىلىق ارۋ اياۋلىم جۇمابەكقىزى مەن قىزىلجارلىق جۇمابەك راحىم قىز بەن جىگىت ايتىسىنىڭ ادەمى كورىنىسىن پاش ەتتى. اسىرەسە, اياۋلىمنىڭ ساحنادا ءوزىن-ءوزى ۇستاۋى, توسىلماستان تابان استىندا سۋىرىپ سالىپ سوزبەن بەزبەندەۋى, قارسىلاسىنىڭ «قىڭىر» سۇراعىنا ادەپتەن وزباي ادەمى قالجىڭمەن وي تاستاۋى كورەرمەنىن وزىنە ءتانتى ەتە ءتۇستى. ال, جۇمابەك اقىننىڭ دومبىرا شەرتۋى, ماقامى, داۋىسى جاقسى بولعانىمەن, بۇل جولى سوزدەن توسىلدى. وكىنىشتىسى, جاس اقىنداردىڭ اراسىندا سوزگە توقتاۋ, دەن قويا ءبىلۋ ماسەلەسى كەمشىن. بۇل سىن تەك قانا وسى جۇپقا عانا قاتىستى ەمەس. ء«ار نارسەنىڭ ءوز ءدامى بار» دەمەكشى, تاپقىرلىقپەن بەرگەن جاۋاپتى قايتا-قايتا قاۋزاۋدىڭ دا ءوزى ارتىق. بۇل ايتىستا جۇمابەك تە وسىنى ەسكەرمەگەن. الماتىلىق اقىن قىز قارسىلاسىنىڭ «توقالىم بول» دەپ ۇسىنىس بىلدىرگەن سوزىنە, تابان استىندا:
«جۇمابەك ەركەلەتكەن ارۋ قىزىن, جۇمابەككە توقالدىققا بەرە المايدى» دەپ جاۋاپ قايتارا ءبىلۋىن تاپقىرلىققا بالادىق. ءۇشىنشى جۇپتا كوكەن شاكەەۆ اتىنداعى اقىندار مەكتەبىنىڭ شاكىرتى دۋمان سامات پەن نۇر-سۇلتان قالاسىنان توپقا تۇسكەن ارداكەرەي كاپ ۇلى ايتىستى. كوكەن شاكەەۆتىڭ 95 جىلدىعىنا ارنالعان جىر دوداسىندا اتاقتى ابىز اتىنداعى مەكتەپتىڭ اتىنان, ونىڭ ارجاعىندا كوكشە دەيتىن قالىڭ ەلدىڭ نامىسىن قورعاپ شىققان دۋمانعا حالىقتىڭ ىقىلاسى ءھام ءۇمىتى زور ەدى.
ءتورتىنشى جۇپتا قوستانايلىق توبا وتەپباي مەن كوكشە وڭىرىنە ەسىمى جىعا تانىس نۇريسلام ءابدىل باق سىناستى. نۇريسلام ءوز سوزىندە قوعامدى جايلاعان جەمقورلىق ماسەلەسىن تىلگە تيەك ەتسە, اقىن توبا ونىڭ ءسوزىن ءىلىپ اكەتىپ, بۇل تاقىرىپتى تەرەڭىنەن قوزعاي ءبىلدى. قوستانايلىق اقىن اسىقپاي-اپتىقپاي, ءوز ويىن ادەمى مانەرمەن جەتكىزە بىلەدى ەكەن. حالىق تا ونى دەن قويا تىڭداپ, قوشامەت كورسەتىپ وتىردى. نۇريسلام مەن توبانىڭ ايتىسى اعا مەن ءىنىنىڭ اراسىنداعى سىيلاستىققا قۇرالعان كورىنىس دەسەك ارتىق بولماس.
سوڭعى جۇپتا ءسوز تالاستىرعان ەرەيمەنتاۋلىق ەرلان داۋلەت پەن قىزىلجارلىق جارقىن جۇپارحان. بۇل ەكى اقىن دا ءسوز ونەرىن جاقسى مەڭگەرگەن, ءوز ءىسىنىڭ كاسىبي شەبەرلەرى دەسەك جاڭىلماسپىز. سەبەبى, ەرلان مەن جارقىن تالاي رەت رەسپۋبليكالىق دودالاردا جۇلدەلى ورىنداردان كورىنىپ جۇرگەن تارلانبوزدار. ولەڭ سوزدە ءبىر-بىرىنە دەس بەرمەگەن ولار حالىقتىڭ دەم بەرگەن قوشەمەتىنە ارقالانا ءتۇستى.
قازىلار القاسىنىڭ شەشىمىمەن اقتىق سىنعا نارتاي تىلەۋقۇل, اياۋلىم جۇمابەك, ەرلان داۋلەت, دۋمان سامات جولداما الدى. شاپپا-شاپ ايتىستا سۋىرىپسالما ونەرىن پاش ەتكەن اقىندار حالىقتىڭ قوشامەتىنە بولەندى. «الۋان-الۋان جۇيرىك بار, الىنە قاراي شاباتىن», دەمەكشى, ايتىس قورىتىندىسى بويىنشا باس جۇلدە ەرلان داۋلەت ۇلىنا بۇيىرىپ, ول كوكشەتاۋ قالاسى اكىمىنىڭ ارنايى ديپلومىمەن جانە باعالى سىيلىعىمەن ماراپاتتالدى. جۇلدەلى ءبىرىنشى ورىندى اقتوبەلىك نارتاي تىلەۋقۇل يەلەنسە, ەكىنشى ورىنمەن الماتىلىق اياۋلىم جۇمابەك ماراپاتتالدى. ءۇشىنشى ورىننان كوكشەتاۋلىق جاس اقىن دۋمان سامات كورىندى. ايتىسقا قاتىسقان بارلىق قاتىسۋشىلار ۇيىمداستىرۋ القاسىنىڭ اتىنان باعالى سىيلىقتارمەن ماراپاتتالدى.