جەلتوقسان ايى جىلى بولعانىمەن, بوران-شاشىن كوپ. وكپەك جولاۋشىعا دا قاۋىپ-قاتەر از ەمەس. اقمولا وبلىسىندا اقتۇتەك بوراننىڭ سالدارىنان كۇرە جولدىڭ بويىندا قار كەپتەلىسىندە قالعان 30-دان استام كولىك شىعارىلدى.
شامامەن 130 ادام قاۋىپسىز جەرلەرگە جەتكىزىلگەن. ال 220-عا جۋىق جولاۋشى جىلىتۋ ورىندارىنىڭ يگىلىگىن كوردى. تاياۋداعى كۇندەرى كۇشتى بوران, كوكتايعاق بولىپ, سونىڭ سالدارىنان بىرنەشە باعىتتاعى تاس جولدار جابىلعان بولاتىن. الايدا, ەسكەرتۋدى ەلەمەي جولعا شىعاتىندار ازايماي تۇر. ولار كەيىن قار قۇرساۋىندا, كەيبىر جاعدايدا, ءتىپتى اپاتقا دا ۇشىراپ جاتادى. توتەنشە جاعدايلار قىزمەتىنىڭ ماماندار مال ىزدەپ شىققان تۇرعىنداردى جانە 3 تراكتورمەن جولعا شىققان جۇمىسشىلاردى اقتۇتەك بوراندا امان-ەسەن تاپتى. ارقا قىسىنىڭ قاھارى ءالى الدا. سوندىقتان ماماندار تۇرعىنداردى ەسكەرتىپ, ساق بولۋعا شاقىرادى.
- وبلىستىڭ ازاماتتىق قورعانىس سالاسى كۇشەيتىلگەن تارتىپتە جۇمىس ىستەۋدە. جەرگىلىكتى پوليتسيا قىزمەتى جانە اتقارۋشى بيلىك وكىلدەرىمەن بىرلەسىپ جەدەل توپتار قۇرىلدى. اتقارىلعان جۇمىستاردىڭ ارقاسىندا ادامداردىڭ بارلىعى امان. سوڭعى كۇندەردەگى جاعداي جول تازالايتىن مەكەمەلەردە تەحنيكا تاپشىلىعى بار ەكەنىن كورسەتتى. الداعى ۋاقىتتا وسىنى شەشۋ قاجەت, – دەيدى وبلىستىق توتەنشە جاعدايلار جونىندەگى دەپارتامەنتىنىڭ باستىعى الەكسەي سوۆەتوۆ.