جاستاردى ەلجاندىلىققا تاربيەلەيتىن مۇنداي جارىستار ءوسىپ كەلە جاتقان ۇرپاقتى جىگەرلەندىرەدى ەكەن.
تاۋەلسىزدىك مەرەكەسى قارساڭىندا الماتى ەنەرگەتيكا جانە بايلانىس ۋنيۆەرسيتەتىندە ستۋدەنتتەر اراسىندا 1986 جىلعى جەلتوقسان وقيعاسىنىڭ قاتىسۋشىسى ەربول سىپاتاەۆ اتىنداعى دزيۋدودان 7 سالماق دارەجەسىندە رەسپۋبليكالىق تۋرنير وتكىزىلدى.
بۇل جارىسقا ەربول سىپاتاەۆتىڭ تۋىستارى, ۇزەڭگىلەس دوستارى, جەلتوقسانشى قاھارماندارى قوناق تورىندە وتىرىپ, كۇرەستى تاماشالادى.
«بۇل تۋرنير باسقا تۋرنيرلەردەن وزگەشە بولدى. تاۋەلسىزدىك كۇنى قارساڭىندا جانە جەلتوقسان قۇربانى ەربول سىپاتاەۆتىڭ اتىندا ءوتۋى, قاتىسۋشىلارعا جاۋاپكەرشىلىك جۇگىن ەسەلەدى. اعالار ەرلىگىمەن رۋحتانعان جاستار تۋرنيرگە قاتىسۋدىڭ ءوزىن مارتەبە سانادى. ونىڭ ۇستىنە, جەلتوقسانشى اعالارى مەن اپالارى ويىندى تاماشالاپ, ماراپاتتى دا سول كىسىلەر ءوز قولدارىمەن تابىستادى. ءبىز قالالىق دەڭگەيدە وتكىزۋدى جوپارلاعان ەدىك. ءوتىنىش بىلدىرۋشىلەر رەسپۋبليكانىڭ تۇكپىر-تۇكپىرىنەن حابارلاسا باستادى. ناتيجەسىندە ستۋدەنتتەر اراسىندا رەسپۋبليكالىق تۋرنير ەتىپ وتكىزدىك. كەيبىر كەلىپ ۇلگەرمەي قالعاندار جىل سايىن ءداستۇرلى تۇردە وتكىزسەڭىزدەر دەپ تىلەك ايتىپ جاتتى», – دەيدى ۇيىمداستىرۋشى, حالىقارالىق «جاناشىر» قورىنىڭ پرەزيدەنتى جاڭىل اپەتوۆا.
ەكى كۇن بويى جالعاسقان ءتۋرنيردىڭ العاشقى كۇنى جىگىتتەرىمىز 50 كگ, 60 كگ, 66 كگ سالماق دارەجەسى بويىنشا, ال ەكىنشى كۇنى 73 كگ, 81 كگ, 90 كگ جانە 100 كگ-دا باق سىناستى. وسى جارىستا وزدەرىن كورسەتۋ ءۇشىن دزيۋدوشىلارمىز, تىپتەن اتىراۋ, ورال, تاراز, شىمكەنت, تۇركىستان قالالارىنان كەلگەن بولاتىن.
«بۇل تۋرنير الدىڭعى قاتىسقاندارىما قاراعاندا وتە تارتىستى بولدى دەپ ويلايمىن. جاڭا تاكتيكالاردى كوردىم ءارى ترەنەر جارىس باستالماي تۇرىپ تۇسىندىرگەن ەرەجەلەرى باق سىناسۋ بارىسىندا ماعان قاتتى كومەكتەستى. ءدال وسى جارىستىڭ ەرەكشەلىگىنىڭ تاعى ءبىر سەبەبى: تاۋەلسىزدىگىمىزدىڭ قارساڭىندا وتكىزىلۋى مەن جەلتوقسان قوزعالىسىنىڭ قۇربانى ەربول سىپاتاەۆ اعامىزدىڭ اتىندا بولعانى. ريزامىز!» – دەيدى تۋرنير جۇلدەگەرلەرىنىڭ ءبىر ەرنۇر قالدىباي.
بۇل تۋرنيردە باس تورەشى بولعان يسمايلوۆ ارسەن جانە مودەراتور قۇسمان باحىتجان جارىستىڭ ءادىل تۇردە ءوتۋىن قاتتى قاداعالادى.
7 سالماق دارەجەسىندە باق سىناسقان تۋرنير جەڭىمپازدارىن ماراپاتتاۋ راسىمىندە زيالى قاۋىم وكىلدەرى مەن جەلتوقسان قاتىسۋشىلارى ءوز قۇتتىقتاۋ سوزدەرىن ايتىپ, جىگىتتەرگە رۋح بەرىپ, جەڭىمپازدارعا ارنايى جۇلدەلەر مەن سىيلىقتاردى تابىستىردى.
سپورتشى ستۋدەنتتەر وزدەرىنىڭ ءالسىز ەمەس ەكەندىكتەرىن دالەلدەپ, مۇنداي جارىستاردىڭ كوپتەپ ءوتۋىن قالايتىندىقتارىن ءبىلدىرتتى.
سپورتتىق شارا الماتى قالاسى قوعامدىق دامۋ باسقارماسىنىڭ تاپسىرىسى بويىنشا حالىقارالىق «جاناشىر» قوعامدىق قورى جۇزەگە اسىراتىن «پاتريوتتىق رۋح – باستى قۇندىلىق» جوباسى اياسىندا ءوتتى.