قازاقستان سىرتقى ىستەر ءمينيسترى مۇحتار تىلەۋبەردى يسپانياعا «ازيا-ەۋروپا» فورۋمىنىڭ (اسەم) سىرتقى ىستەر مينيسترلەرىنىڭ 14-ءشى كەڭەسىنە قاتىسۋ ءۇشىن ەكى كۇندىك ءىسساپارى باستالدى.
ءىس-شارا اياسىندا مينيستر م. تىلەۋبەردى ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەللمەن جانە قحر سىرتقى ىستەر ءمينيسترى ۆان يمەن ەكىجاقتى كەلىسسوزدەر جۇرگىزدى.
مينيستر م. تىلەۋبەردى ج. بوررەللدى ەۋروكوميسسيانىڭ ۆيتسە-پرەزيدەنتى – ەو جوعارعى وكىلى قىزمەتىنە كىرىسۋىمەن قۇتتىقتادى. ەۋروپالىق كەڭەستىڭ پرەزيدەنتى دونالد تۋسكتىڭ ءۇ.ج. مامىردا قازاقستانعا جاساعان رەسمي ساپارى نۇر-سۇلتان مەن بريۋسسەل اراسىنداعى جوعارى دەڭگەيدەگى ديالوگقا ايتارلىقتاي قارقىن بەردى.
ەو جوعارعى وكىلى, ءوز كەزەگىندە, قازاقستاننىڭ ورتالىق ازيا وڭىرىندەگى ماڭىزدى ءرولىن ەرەكشە اتاپ ءوتىپ, اۋعانستانعا بايلانىستى بىتىمگەرشىلىك كۇش-جىگەرى ءۇشىن ريزاشىلىعىن ءبىلدىردى.
ەۋروپالىق ديپلوماتيا باسشىسى قر سىرتقى ىستەر ءمينيسترىنىڭ 2020 جىلعى قاڭتارداعى بريۋسسەلگە الداعى ساپارىن جانە قر-ەو ىنتىماقتاستىق كەڭەسىنىڭ 17-ءشى وتىرىسىن وتكىزۋدى قۇپتادى.
ج. بوررەلل كەلەسى جىلى نۇر-سۇلتان قالاسىنا ساپارمەن كەلۋگە دايىن ەكەندىگىن جانە كەڭەيتىلگەن ارىپتەستىك پەن ىنتىماقتاستىق تۋرالى كەلىسىمنىڭ كۇشىنە تەزىرەك ەنۋىنە مۇددەلىلىگىن راستادى.
قحر سىرتقى ىستەر ءمينيسترى ۆان يمەن كەزدەسۋ اياسىندا تاراپتار قر پرەزيدەنتى قاسىم-جومارت توقاەۆتىڭ قحر-عا اعىمداعى جىلدىڭ قىركۇيەك ايىندا جاساعان تابىستى مەملەكەتتىك ساپارىنىڭ قورىتىندىسى بويىنشا ماڭگىلىك جوعارى كولەمدى ستراتەگيالىق سەرىكتەستىك ورناعانىن قاناعاتتانارلىقپەن اتاپ ءوتتى.
سىرتقى ساياسي ۆەدومستۆولاردىڭ باسشىلارى قازاقستان مەن قىتاي اراسىنداعى ساۋدا-ينۆەستيتسيالىق ىنتىماقتاستىقتىڭ قازىرگى قارقىندى ءوسۋىن اتاپ ءوتتى. بۇعان «نۇرلى جول» مەملەكەتتىك باعدارلاماسى مەن «بەلدەۋ جانە جول» باستاماسى شەڭبەرىندە ينفراقۇرىلىمدىق جوبالاردى دەر كەزىندە ىسكە اسىرۋ ىقپال ەتەدى. بۇل رەتتە, IT تەحنولوگيالار مەن جاڭارتىلاتىن ەنەرگيا كوزدەرى سالالارىنداعى زاماناۋي جوعارى تەحنولوگيالىق جوبالارعا ەرەكشە ءمان بەرىلەدى.
م. تىلەۋبەردىنىڭ ۆان يمەن ءبىرىنشى كەزدەسۋى بارىسىندا جوعارى جانە جوعارعى دەڭگەيدەگى ساپارلارمەن الماسۋ ارقىلى ەكىجاقتى ىنتىماقتاستىقتى ودان ءارى نىعايتۋ تۋرالى, سونداي-اق بۇۇ, اوسشك, شىۇ جانە اسەم سياقتى كوپجاقتى الاڭدار شەڭبەرىندە ءوزارا قولداۋ تۋرالى ۋاعدالاستىققا قول جەتكىزىلدى.