قاسىم-جومارت توقاەۆ حالقىمىزدى تاۋەلسىزدىك كۇنىمەن قۇتتىقتاپ, ەلباسىنىڭ مىقتى مەملەكەت قالىپتاستىرۋداعى جانە ەل ەكونوميكاسىن نىعايتۋداعى ءرولىن اتاپ ءوتتى. بۇل تۋرالى اقوردانىڭ ءباسپاسوز قىزمەتى حابارلادى.
– تۇڭعىش پرەزيدەنتىمىز نۇرسۇلتان ءابىش ۇلى نازارباەۆ ايتقانداي, تاۋەلسىزدىكتى جاريالاۋ ءبىر باسقا دا, ونى ۇستاپ تۇرۋ ودان دا قيىن ءارى ماڭىزدى. ەلباسىنىڭ باسشىلىعىمەن وتكەن 28 جىل ىشىندە قازاقستان وراسان زور تابىسقا قول جەتكىزدى. يندۋستريالاندىرۋ ەلدىڭ ەكونوميكالىق دامۋىنىڭ بەرىك نەگىزىن قالىپتاستىردى. بۇكىل ەلىمىز بويىنشا 1300-گە جۋىق جاڭا ءوندىرىس ورىندارى ىسكە قوسىلدى. سونىڭ ناتيجەسىندە سوڭعى ون جىلدا وندەۋ سەكتورىنداعى ءوندىرىس كولەمى 3 ەسەدەن استام ۇلعايدى, – دەدى مەملەكەت باسشىسى.
پرەزيدەنت وڭدەۋ ونەركاسىبىنە 34 ميلليارد دوللاردان استام تىكەلەي شەت ەل ينۆەستيتسياسى تارتىلعانىن اتاپ ءوتتى. بۇگىندە بۇل سەكتورداعى ەكسپورت كولەمى وتىز پايىزدان استام ارتىپ, 165 ميلليارد دوللارعا جەتتى. قازاقستاندا شىعارىلعان ءونىم الەمنىڭ 120-دان استام ەلىنە جەتكىزىلەدى.
– يندۋستريالاندىرۋ الەمدىك داعدارىس كەزىندە ەكونوميكامىزدىڭ دامۋىنا تىڭ سەرپىن بەردى. ەكونوميكانىڭ كوپتەگەن سالاسى مەن سەكتورىنىڭ ءتۇرى, قۇرىلىمى بىرتىندەپ وزگەرىپ كەلەدى. مەتاللۋرگيا سالاسىندا رەلس, سىم-تەمىرلەر, رادياتورلار جانە باسقا دا بولاتتان جاسالعان كوپتەگەن دايىن ونىمدەر شىعارىلا باستادى. ەلىمىزدە ءاليۋمينيدىڭ باستاپقى ءتۇرىن قايتا وڭدەۋ ءىسى ارتتى. بۇگىندە قازاقستان الەمدەگى تيتان وندىرەتىن ەلدەردىڭ قاتارىنا قوسىلدى. بۇرىن شىعارىلماعان تيتان قۇيمالارى مەن قورىتپالارى سەكىلدى ءونىم تۇرلەرىن ءوندىرۋ يگەرىلدى, – دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا, ماشينا جاساۋ سالاسىن دامىتۋعا جاعداي جاسالعان. بۇل ءوندىرىس كولەمىن 8 ەسە ارتتىرۋعا مۇمكىندىك بەردى. بيىلعى 10 اي ىشىندە 38 مىڭنان استام اۆتوموبيل شىعارىلدى.
پرەزيدەنت ءوز سوزىندە 4.0 يندۋسترياسىن دامىتۋ وتاندىق ونەركاسىپتى جاڭعىرتۋدىڭ وزەكتى ءارى ماڭىزدى باعىتتارىنىڭ ءبىرى ەكەنىن ايتتى.
– ۇكىمەتتىڭ الدىندا 2025 جىلعا قاراي تسيفرلىق تەحنولوگيانى ەنگىزگەن وڭدەۋ ونەركاسىبىندەگى ءىرى جانە ورتا كاسىپورىنداردىڭ سانىن 200-گە دەيىن جەتكىزۋ ماقساتى تۇر. ناتيجەسىندە تەحنولوگيالىق دامۋدىڭ قازىرگى دەڭگەيىنەن «اقىلدى ءوندىرىس» دەڭگەيىنە كوشۋ قامتاماسىز ەتىلۋى ءتيىس, ياعني, ءوندىرىس تولىق اۆتوماتتاندىرىلۋى جانە روبوتتاندىرىلۋى قاجەت, – دەدى قازاقستان پرەزيدەنتى.
قاسىم-جومارت توقاەۆ كاسىپكەرلەر مەن مەملەكەتتىك قۇرىلىمداردىڭ وكىلدەرىن جاڭا سىن-قاتەرلەردى ەسكەرۋگە شاقىردى. ساۋدا سوعىسى مەن سانكتسيالىق شەكتەۋلەر جاعدايىندا قازاقستاننىڭ ەكونوميكالىق الەۋەتىن جۇزەگە اسىرۋ ءۇشىن ۇلتتىق بيزنەستىڭ حالىقارالىق باسەكەگە قابىلەتتىلىگىن ارتتىرۋ ماڭىزدى سانالادى.
– يندۋستريالاندىرۋدىڭ ءۇشىنشى باعدارلاماسىن ىسكە اسىرۋ 2020 جىلدان باستالادى. ءبىز جەكە سەكتوردىڭ الەۋەتىن بارىنشا پايدالانا وتىرىپ, ەكسپورتقا نەگىزدەلگەن وڭدەۋ ونەركاسىبىنىڭ دامۋ باعىتىن ايقىندادىق. يندۋستريالاندىرۋدىڭ ءۇشىنشى بەسجىلدىعىن جۇزەگە اسىرۋ كەزىندە وتكەن بەسجىلدىقتارداعى كەمشىلىكتەردى ەسكەرىپ, وڭدەلگەن ونىمدەردىڭ ەكسپورتىن ۇلعايتۋ, شىعارىلاتىن ونىمدەردى تەحنولوگيالىق تۇرعىدان «كۇردەلەندىرۋ», ساپالى جۇمىس ورىندارىن اشۋ سەكىلدى مىندەتتەردى ورىنداۋ كەرەك, – دەدى مەملەكەت باسشىسى.
پرەزيدەنتتىڭ پىكىرىنشە, يندۋستريالاندىرۋ مەملەكەتتىك باعدارلاماسى ەكونوميكاداعى قۇرىلىمدىق ترانسفورماتسيانىڭ نەگىزگى فاكتورى بولۋى ءتيىس. ناتيجەسىندە ەكونوميكانىڭ تەڭگەرىمدى ءوسىمى مەن ازاماتتاردىڭ ءال-اۋقاتى ارتادى.
شارا سوڭىندا قاسىم-جومارت توقاەۆ بيزنەستىڭ الەۋمەتتىك جاۋاپكەرشىلىگى جونىندەگى «پارىز» رەسپۋبليكالىق كونكۋرسىنىڭ جەڭىمپازدارىن جانە «التىن ساپا» سىيلىعىنىڭ لاۋرەاتتارىن ماراپاتتادى.
«پارىز» كونكۋرسىنىڭ گران-پري جۇلدەسىن «ەۋرازيالىق توپ», «ۇزدىك الەۋمەتتىك جاۋاپتى كاسىپورىن» اتالىمى بويىنشا التىن جۇلدە «ابزال جانە ك» كومپانياسىنا (قىزىلوردا وبلىسى) بەرىلدى. «بيومەر ارماتۋرا» جشس (قاراعاندى وبلىسى) «ۇزدىك يندۋستريالىق جوبا» اتالىمى بويىنشا, «سكز-U» جشس (قىزىلوردا وبلىسى) «ۇزدىك يننوۆاتسيالىق جوبا» اتالىمى بويىنشا «التىن ساپا» پرەزيدەنت سىيلىعىنىڭ لاۋرەاتتارى اتاندى.