الماتىداعى بالۋان شولاق اتىنداعى مادەنيەت جانە سپورت سارايىندا تاەكۆوندودان رايىمبەك باتىردى ەسكە تۇسىرۋگە ارنالعان اشىق رەسپۋبليكالىق تۋرنير ءوتتى.
XVIII عاسىردا جوڭعارلارعا قارسى شايقاستا تالاي رەت كوزسىز ەرلىك كورسەتىپ, اتاعى شىققان قازاقتىڭ قاس باتىرىنا ارنالعان جارىستا رەسپۋبليكامىزدىڭ بارلىق ايماعىنان جانە وزبەكستان مەن قىرعىزستاننان كەلگەن 1500-گە تارتا سپورتشى باق سىنادى.
«رۋحاني جاڭعىرۋ» باعدارلاماسى بويىنشا رەسپۋبليكالىق جانە قالالىق تاەكۆوندو فەدەراتسياسى, الماتى قالاسى اكىمدىگىنىڭ قولداۋىمەن ۇيىمداستىرىلعان ءدۇبىرلى دودا ءتۇرلى جاس ەرەكشەلىكتەرى بويىنشا جۇلدەلەر ساراپقا سالىندى.
بالالار اراسىنداعى باسەكەدە الماس نۇراحمەتوۆ, نۇراي رايىمبەك, ايشا سايلاۋحان, نياز امەتحانوۆ, باتىرلان ماقسات ۇلى, دامير جانشىلىقوۆ, ۆالەري پاك, مارلەن سەرىك, بەك ىنتىماقتىڭ باعى جانسا, جاسوسپىرىمدەر سايىسىندا ارۋجان تىلەۋجانوۆا, الىشەر سالاماتوۆ, ارايلىم اراپباي, اسەل ابۋباكىر, اينۇر سىزدىقباەۆا, اياۋجان تاسقىنبەك, بەيبارىس قابىلان, اسقات مامبەتوۆ, الەكسەي يامشيكوۆ, سۇلتان بايتۇرسىن, انتون پاك, ابدوللا ابىلقاسىم, بەكتورە ورالحانوۆ, الىبەك نۇرعازى, قايسار نۇربەرگەن جانە تاعى باسقا تاەكۆوندوشىلار توپ جاردى.
سول سەكىلدى جاستار مەن ەرەسەكتەر اراسىنداعى باسەكەلەر دە اسا تارتىستى ءوتىپ, بارلىق قارسىلاسىن سىپىرا ۇتقان سپورتشىلار جەڭىس تۇعىرىنىڭ ەڭ بيىك ساتىلارىنا كوتەرىلدى.
الماتى