قۇرلىقتىق حوككەي ليگاسىنىڭ (قحل) ارنايى كوميسسياسى 13-ءشى اپتانى قورىتىندىلاپ, وتكەن جەتى كۇندە ۇزدىك ويىنىمەن كوزگە تۇسكەن ويىنشىلاردىڭ ەسىمىن اتادى. ولاردىڭ قاتارىندا «بارىس» ويىنشىسى دا بار.
ەلوردا كومانداسىنىڭ حوككەيشىسى رومان ستارچەنكو اپتانىڭ ۇزدىك شابۋىلشىسى اتاندى. ول كوماندامەن بىرگە سىرت الاڭداعى ءۇش ويىننىڭ ەكەۋىندە جەڭىسكە جەتىپ, ءتورت شايبا سوقتى. بۇل وسى اپتاداعى ەڭ ۇزدىك ناتيجە. قازاقستاندىق كلۋب ويىنشىسى اپتاداعى بارلىق ويىندا گول سوعىپ, «سوچي» قاقپاسىنا دۋبل جاسادى.
سونىمەن قاتار «كۋنلۋن رەد ستار» كلۋبىنىڭ قاقپاشىسى شيمون گرۋبەتس, «يوكەريت» كومانداسىنىڭ قورعاۋشىسى ميككو لەحتونەن وتكەن اپتانىڭ ۇزدىگى اتاندى. ال «ۆيتياز» قورعاۋشىسى دانيلل پىلەنكوۆ «اپتا جاڭالىعى» سىيلىعىن يەلەندى.