شاپاعاتتى جول

اكەلەرىمىز ەرتە دۇنيەدەن وزىپ, بالا كەزىنەن اناسىمەن سىرلاس بولىپ, ەر جەتىپ, ەل قا­تارىنا قوسىلعان ءابىش كەكىل­باي ۇلى, ورالباي ابدىكارىموۆ – ءبىر-ءبىرىمىزدى جاقىن ءارى جاق­سى تۇسىنىسەتىنبىز. قاسيەتتى انالارى­مىزدىڭ جانى ءجانناتتا بولعاي...

... ءبيبىجان اپامىزدىڭ ءتورت ۇلى دا ارقايسىسى ءوز سالاسىندا, ءوز جۇمىسىندا تياناقتى, قايرات­تى بولىپ ءوسىپ, ءبىر اۋلەتتىڭ ەمەس, قا­زاقتىڭ كورنەكتى تۇلعالارى دارە­جەسىنە كوتەرىلدى. انانىڭ كور­گەن قيىنشىلىعى جاقسىلىققا جال­­عاسىپ, ۇلدارىنىڭ ەل ازاماتى, ەل قۇرمەتىنە بولەنۋىن كورۋ – انا­نىڭ اق تىلەگى, ارمانىنا قول جەتكىزۋى زور باقىتى بولسا كەرەك. ءسۇت كەنجەسى ورالباي انا­مىزدىڭ كوزى تىرىسىندە ەلباسى, قا­زاقستان رەسپۋبليكاسى تۇڭ­عىش پرەزيدەنتىنىڭ ەڭ سەنىمدى سەرىكتەرىنىڭ ءبىرى, كورنەكتى مەملەكەت قايراتكەرى بولىپ, تاۋەلسىز ەلى­مىزدىڭ ىرگەتاسىن قالاسىپ, شا­­­ڭى­راعىنىڭ بەرىك بولۋىنا ءوز ۇلەسىن قوسۋ باقىتىنا يە بولۋى – ارينە, الدىمەن انانىڭ ماق­تانىشى. ورەكەڭ قانشاما لاۋا­زىم, قۇرمەت بيىگىنە شىققاندا دا ءبيبىجان انامىز, ورەكەڭنىڭ جارى جامال احمەتقىزى ەكەۋى تاۋبەسىنەن جاڭىلماي: «اللادان تىلەگەنىم بالامنىڭ اماندىعى, ەل-جۇرتىنا جارامدىعى» دەپ وتىراتىن. ۇلى انانىڭ قارا­پايىم عانا تىلەگى. عيبراتتى تى­لەك. تەكتى تىلەك.

اناسىنىڭ كەنجە ۇلى الدىڭ­عى اعالارىنىڭ ۇلگى-ونەگەسىمەن وقۋعا قۇلشىنىپ, ەڭبەكپەن شى­نىعىپ ءوستى. سوعىس جىلدارى, سوعىستان كەيىن ومىرگە كەلگەن ۇرپاقتىڭ ۇلاندارىنا ءتان ەڭبەكقورلىق, قانداي دا قيىندىققا توزىمدىلىك, تابان­دىلىق, ادالدىق, سەنىمدىلىك قا­سيەتتەرىن بويىنا جيناقتاپ, ومىر­گە ەرتە ارالاستى. ول جىلداردا كەڭەس وداعىنداعى زاڭعا سايكەس ورتا مەكتەپتى بىتىرگەن جاس­تار مىندەتتى تۇردە كەمى ەكى جىل اۋىل شارۋاشىلىعىندا نەمەسە ءوندىرىس ورنىندا, قۇرىلىستا جۇمىسشى بولىپ ەڭبەك ەتۋگە, ال ۇل بالالار ەگەر جاسى 19-عا تولسا اسكەر قاتارىندا ءۇش نەمە­سە ءتورت جىل قىزمەت ەتىپ, كونس­تيتۋتسيالىق پارىزىن وتەۋى مىن­دەتتى ءتارتىپ بولاتىن.

ورالباي ابدىكارىم ۇلى قا­تا­رىنان قالماي وسىلاردىڭ با­رىنەن ءوتتى. ورتا مەكتەپتى بىتىر­گەن سوڭ ءبىر توپ جىگىت بى­رىگىپ, كومسومول جاس­تار بريگاداسىن قۇرىپ, قوي باعىپ, اۋىل شارۋاشىلىعىنىڭ, مال ءوسىرۋ ەڭبەگىنىڭ قىر-سى­رىن ءبىلدى. كەڭەس وداعىنىڭ سولتۇستىك مۇزدى مۇحيت اسكەري-تەڭىز فلوتىنىڭ سۇڭگۋىر سۋاستى قايىعىندا تە­ڭىزشى بولىپ, ازاماتتىق پارىزىن ورىندادى. قازاق بالاسى سيرەك كەزدەسەتىن تەڭىز فلوتىندا ءارتۇرلى ۇلتتاردىڭ ۇلاندارىمەن ءبىر ءۇيدىڭ بالاسىنداي سىيلاساتىن, ءبىر ماقسات, ءبىر مىندەتكە جۇمىلا بىلەتىن وتان قورعاۋ ابىرويىنىڭ قادىرىن, جاۋاپكەرشىلىگىن ايرىقشا سە­زىن­دى. ۇلدارىن الىسقا جىبەرىپ, كۇن-ءتۇن اماندىعىن, امان كەلۋىن تىلەپ وتىرعان انالاردىڭ اق تى­لەۋىمەن ەلگە ورالعانداعى, ءومىر­دىڭ كەزەكتى مەكتەبىنەن ابىرويمەن ءوتىپ كەلگەن جىگىتتەردىڭ وتان, تۋ­عان جەر, تۋعان ەل قادىرىن ساناسى­مەن سەزىنۋى – ەسەيگەندىكتىڭ اي­رىقشا كورىنىسى بولاتىن. سول سانامەن ەلگە ورالعان جىگىتتەر بەيبىت ءومىردىڭ تىرشىلىگىنە دە ەرەكشە قۇلشىنىسپەن ارالاسا­تىن. تەڭىزشى ورالبايدى دا كوپتەگەن جۇمىستار كۇتىپ تۇر­دى. سول كەزدەگى ءوندىرىس, وقۋ ورىن­­­دارى باسشىلارى جاس ج­ىگىت­­تى وزدەرىنە جۇمىسقا شا­قى­رىپ, تاربيەشى, كاسىپتىك-تەحني­كا­لىق ۋچيليششەنىڭ شەبەرى, «شاح­تينسكستروي» قۇرىلىس مەكە­مە­سى جاستار ۇيىمىنىڭ جەتەك­شىلىگى قىزمەتتەرىن جاسقا ءتان جى­گەرمەن ۇيىمداستىرىپ, ەڭبەك ادامدارىنىڭ قايناعان ورتاسىندا ولاردىڭ تۇرمىس-تىرشىلىگىمەن بىتە قايناسىپ, ناتيجەلى, ابىرويلى ەڭبەك ەتتى.

ورەكەڭ ەڭبەك ەتە ءجۇرىپ, ءبىلى­مىن كوتەرۋدى دە ءبىر ءسات توقتات­قان جوق. اۋەلدە تامامداعان قا­راعاندى يندۋستريالىق-پەدا­گوگيكالىق تەحنيكۋمىنداعى ءبىلىمىن قا­راعاندى مەملەكەتتىك ۋني­ۆەر­سيتەتىندە, الماتى جوعارى پارتيا مەكتەبىندە جالعاستىردى. ءبيبىجان اپامىز: «ورالبايىم قوي باعىپ ءجۇرىپ, قولتىعىنان كىتابىن تاس­تامايتىن», دەپ ايتىپ وتىراتىن. وسى ءبىر-اق سوزدەن كوپ نارسە بايقالسا كەرەك.

قاي زاماندا, قانداي قوعامدا دا ءبىلىمسىز تىرشىلىك جوق. ءبىلىمسىز وركەندەۋ, دامۋ, ءوسۋ جوق. جەكە ادامنىڭ ءومىرى, ەڭبەگى, قىزمەتى دە تىكەلەي ونىڭ بىلىمدىلىگىمەن, وقىپ, العان ءبىلىمىن ءومىر تالابىمەن, ءوزىنىڭ ەڭبەك ەتكەن ورنىندا سول ءبىلىمىن جاراتۋىمەن تىكەلەي بايلانىستى. ورەكەڭ ەڭبەك پەن وقۋ, ىزدەنۋ جولدارىن ءساتتى ۇشتاستىرا العان ازا­مات. ەڭبەگى مەن قابىلەتىنە قاراي جاس كەزىندە سول زاماندا باسقارۋشى پارتيانىڭ قالالىق, وبلىس­تىق, رەسپۋبليكالىق كومي­تەتتەرىنىڭ ەڭ جاۋاپتى قىز­مەت­تەرىنە شاقىرىلدى. قان­داي لاۋازىمدى قىزمەتتە بول­سا دا ورەكەڭ سول قىزمەتتى ادام­گەرشىلىك تازالىق تالاپتارىنا باعىندىرىپ, جۇمىس جاسادى. ول جۇمىستارىنىڭ نەگىزگى دەنى ادامدارمەن, پارتيا كادرلارىمەن ولاردى تاڭداۋ, ىرىكتەۋ, ورنالاس­تىرۋ جۇمىستارىمەن بايلانىستى بولدى. ءادىل, ادال بولۋعا تىرىس­تى. ەشكىمگە قيانات جاساماۋ­دى, ءتىپتى كىناسى ءۇشىن جۇمىستان بوساتقاننىڭ وزىندە ونىڭ كىناسىن تولىق دالەلدەپ, ول دالەلمەن الگى ادام كەلىسىپ, شەشىم قابىلداۋدى قاتاڭ قاداعالادى. وسى باعىتتا ورالباي قازاقستان كومپارتياسى ورتالىق كوميتەتىنىڭ ۇيىمداس­تىرۋ-پارتيا جانە كادر ءبولىمىنىڭ مەڭگەرۋشىسى بولدى. بۇل لاۋازىم ول كەزدە بيلىك پارتياسىنىڭ ەڭ جەتەكشى ءارى باسقارۋشى ءبولىمى ەدى.

تاۋەلسىزدىك العاننان كەيىن جاڭا مەملەكەت قۇرىلىمىن جا­ساق­تاۋعا ەڭ الدىمەن جاڭا ادامدار, جاڭا ماماندار جۇمىسقا تار­تىلدى. سونىمەن بىرگە نۇر­سۇل­تان ءابىش ۇلى بۇرىنعى باس­قارۋشى مەملەكەتتىك, پارتيا­لىق اپپاراتتىڭ تاجىريبەلى, ادال, جاڭا ءومىر, جاڭا تالاپ سۇ­رانىستارىنا جاۋاپ بەرە الاتىن, مەملەكەت قۇرىلىسىنا بىلىك­تىلىكپەن, بىلىم­دىلىكپەن بەلسەنە ارالاسا الاتىن كوپتەگەن ازاما­تقا سەنىم كورسەتىپ, مەملەكەتتىك قىزمەتكە تارتتى. سولاردىڭ الدىڭعى قا­تارىندا ورالباي ابدىكارىموۆ بولدى. بۇل ءتاسىل ورىندى ءارى ءتيىمدى ناتيجە بەرە الدى. بۇرىنعى ساياسي-اكىم­شىلىك جۇيە كوممۋنيستىك پارتيانىڭ يدەولوگياسىنىڭ نەگى­زىندە, سول يدەولوگيانى باسشى­لىققا الا وتىرىپ جاسالاتىن. ەندىگى جەردە ءبىز سول يدەولوگيادان باس تارت­تىق. ءبىزدىڭ يدەولوگيامىز, ۇلت­تىق يدەيامىز مەملەكەتتىك تاۋەل­سىزدىكتەن باستاۋ الدى. ءبىز­دىڭ باستى ماقساتىمىز – الەم­گە جاريالاعان مەملەكەتتىك تاۋەل­سىزدىگىمىزدى باياندى ەتۋ, دۇ­نيە­جۇزىلىك قوعامداستىقتىڭ بەل­سەندى مۇشەسى بولىپ, جاسامپاز ءومىر سالتىن قالىپتاستىرۋ, ور­كەنيەتتى, وسكەلەڭ مەملەكەت بولۋ. باستى قۇندىلىقتارىمىز – ادام, ادامنىڭ قۇقىعى, بوستان­دىعى, ەركىندىگى.

مەملەكەت قۇرىلىسى ءوز وزى­نەن ۇيلەسە بەرمەيدى. ونى دەر كەزىندە ۇيىمداستىرىپ, ءبىلىم­دى, بىلىكتى تۇلعالاردىڭ جۇمى­سىن مەملەكەت مۇددەسىنە جۇ­مىل­دىرىپ, مەملەكەتتىك اپپارات پەن حالىقتىڭ, قوعامنىڭ قارىم-قاتىناسىن جولعا قو­يىپ, ونىڭ بارلىق بۋىندارىنا قان جۇگىرتۋ قاجەت. مەملەكەت جۇ­مىسى ازاماتتاردىڭ كۇندە­لىك­­تى تۇرمىسىنان جالپى اۋدان­دىق, قالالىق, وبلىستىق, رەسپۋب­لي­كالىق ەكونوميكا سالالارىنىڭ ءتيىمدى جۇمىسىن ۇيىمداستىرۋدى, ۇزاق مەرزىمدى ستراتەگياسىن تولىق قامتيدى. مەملەكەت قىز­مە­تىنىڭ سالالارى سان الۋان ەكەندىگى دە ەلگە بەلگىلى. ولاردىڭ جەمىستى ۇيىم­داستىرىلىپ, جەتىس­تىكتى دامۋى تىكەلەي ادامدار­عا, سول سالالاردا ەڭبەك ەتەتىن جۇمىس­شى­لاردان باس­تاپ ونى باسقاراتىن لاۋازىمدى قىزمەت­كەرلەردىڭ ءبىلىم, پاراسات, دۇنيە­تانىم, ادالدىق, ادىلدىك سانا-سەزىمى دەڭگەيىنە بايلانىستى.

ءسوز جوق, مەملەكەتتىڭ كەلبە­تىن, ونىڭ مەملەكەتتىك قابىلەتىن قالىپتاستىرار ادامدار, ياعني بىلىكتى ماماندار, لاۋازىمدى قىز­مەتكەرلەردىڭ قايراتكەرلىگىنە, ونىڭ بولمىسىنا قاراپ, ءوز ورتا, قوعامىمىز, حالقىمىز, باسقا ەلدەر, حالىقارالىق بەدەلدى ۇيىم­دار بۇكىل ەلگە باعا بەرەتىنى دە جاڭالىق ەمەس. دەمەك, جاۋاپ­تى قىز­مەتكەرلەر ەل اماناتىن ارقالاپ جۇرەتىن تۇلعالار. سون­دىقتان دا ولارعا تالاپ تا جوعارى.

قازاقستان رەسپۋبليكاسىنىڭ تۇڭعىش پرەزيدەنتى, ەلباسى نۇرسۇلتان ءابىش ۇلى نازارباەۆ ءوزىنىڭ پرەزيدەنتتىك قىزمەتىندە ەل باسقارۋ ءىسىن ءساتتى ءارى ناتيجەلى جۇرگىزۋ ءۇشىن ونىڭ العىشارتتى كىلتتەرىنىڭ ءبىرى – مەملەكەتتىك اپ­پاراتتىڭ قىزمەتكەرلەرىن ىرىكتەۋ, تاڭداۋ جانە ولاردى قا­بىلەتى مەن مۇمكىندىگىنە قاراي جاۋاپتى لاۋازىمدى قىزمەتتەرگە ورنالاستىرۋ, تاعايىنداۋ ەكەنىن ۇنەمى ايتۋمەن كەلەدى جانە ونى حالىق تا تۇسىنەدى. تەگىندە بۇل تاقىرىپ – اۋقىمى كەڭ, ايتارى كوپ اڭگىمە. ماقالامىزدىڭ ماقساتى ول اۋقىمدى تاقىرىپ­تىڭ تابيعاتىن, تالابىن جان-جاقتى تالداپ, ساراپتاۋدى ماقسات ەتپەستەن, ناقتى ءبىر مەملەكەتتىك تۇلعانىڭ ءومىرى مەن مەملەكەتتىك قىزمەتىنە كوز جۇگىرتۋ ارقىلى سول سالانىڭ قوعام ءۇشىن ماڭىزدى­لىعىنا ءمان بەرە الساق – ونى وسى ورەكەڭنىڭ بويىنان كورەر ەدىك.

ادەتتە, قانداي دا لاۋازىمدى ادامنىڭ ءومىر جولى تۋرالى ايتقاندا – ونىڭ ءار جىلدارى ىستەگەن قىزمەتتەرىن ءتىزىپ شىعۋ ارقىلى ماعلۇمات الامىز. ال سول لاۋازىمعا كەلۋ, كوتەرىلۋ جولدارىنا, نە سەبەپتى سولاي بولعانىنا ءمان بەرە بەرمەيمىز. بۇل پروتسەسس سىرى اشىلماعان ساندىق ءتارىزدى. جابىلعان كۇيى قالا بەرە­دى. ءدال وسى سالانىڭ وزىنە ءتان ەرەك­شەلىگىنىڭ ساقتالۋى جانە شەشىم قابىلدانعانعا دەيىنگى قۇپيالىعى – مەملەكەتتىك ءتارتىپ. ول جۇمىستىڭ ەرەكشەلىكتەرىن تەك قانا قۇجات دايىندايتىن جانە شەشىم قابىلدايتىن لاۋازىمدى ادام عانا بىلەدى.

ءبىزدىڭ كونستيتۋتسيامىزعا ساي­كەس شەشىم قابىلدايتىن ەڭ جوعارى دارەجەدەگى مارتەبەلى تۇل­عا, ارينە رەسپۋبليكا پرە­زيدەنتى.

مەملەكەتىمىزدە جۇرگىزىلەتىن كادرلىق ساياسات, ياعني اتقارۋشى, زاڭ شىعارۋشى, سوت بيلىگى, قور­عانىس, قاۋىپسىزدىك, قۇقىق قورعاۋ ورگاندارى باسشىلارىن قىزمەتكە تاعايىنداۋ, ولاردى قىزمەتتەن بوساتۋ تۇگەلدەي پرەزيدەنت قۇزى­رىندا. وسىنشاما كەڭ اۋقىمدى جۇمىستى پرەزيدەنت ءوزىنىڭ اكىم­شىلىگى ارقىلى جۇرگىزەدى. مەم­لەكەتتىك جاۋاپتى قىزمەتتىڭ قاي قايسىسىنا دا جاۋاپكەرشىلىگى جوعارى, ادال, ءادىل, بىلىكتى, ءبىلىم­دى, تازا ادامدار كەلۋى – قوعام تالابى. اسىرەسە پرەزيدەنت اكىم­شىلىگىنىڭ باسشىلىعىنا كىم كەلگەنىنە بيلىك ينستيتۋتتارىن­دا دا, قوعامدا دا ايرىقشا ءمان بە­رىلەدى.

تاۋەلسىزدىك جىلدارى نۇر­سۇلتان ءابىش ۇلى ماڭدايى جار­قىراعان بىرنەشە ازاماتتارعا ءدال وسى لاۋازىمدى سەنىپ تاپسىرىپ, ادامتانۋدىڭ مەكتەبىنەن وتكىزدى دەسەك – سولاردىڭ قاتارىندا نۇرتاي ابىقاەۆ پەن ورالباي ابدى­كارىموۆتىڭ ەسىمدەرى الدىمەن ايتىلادى.

كەزىندە تۇڭعىش پرەزيدەنت قاراعاندى وبلىستىق پارتيا كو­مي­تەتىنىڭ ەكىنشى حاتشىسى قىز­­مەتتەرىندە جۇرگەندە – ورال­باي­دىڭ سول زاماننىڭ كادر سايا­ساتىنىڭ تالابىنا­ سايكەس وبلىس­تىق اپپارات­تا قىز­­مەت ىستەيتىن سيرەك قازاق­تىڭ­ ءبىرى بولعانىنا نازار اۋدا­رىپ,­ سىرتىنان قامقورلىق كور­­سە­تىپ جۇرەتىنىن تابيعي ادام­­گەرشىلىك, ۇلگى-ونەگە دەپ ءتۇسى­نۋىمىز دە ورىندى بولار. نۇرە­كەڭ قازاقستان كومپارتياسى ورتا­لىق كوميتەتىنە حاتشى بولىپ كەلگەننەن سوڭ دا, بۇگىنگە دەيىن قاراعاندىدا ءوزى بىلەتىن, قول­دارىنان جۇمىس كەلەتىن, ەلگە, مىن­دەتىنە ادال دەگەن تالاي ازا­مات­تارعا قولداۋ كورسەتىپ, شاپاعاتىن تيگىزىپ جۇرگەنىن ەل بىلەدى.

ورالباي ابدىكارىم ۇلى بۇ­رىنعى باسقارۋ جۇيەسىندە دە, تاۋەلسىزدىك العاننان سوڭ جا­ڭا داۋىردە دە ەلباسىنىڭ سەنى­مىمەن كوپتەگەن جاۋاپتى, لا­ۋازىم­دى قىزمەتتەردى ابى­روي­مەن ورىنداپ, ەلىنە ادال قىزمەت ەتىپ, ونىڭ وركەندەۋىنە مەي­لىنشە تىلەكتەستىگىن قوسىپ جۇر­گەن اتپال ازامات. ورەكەڭ تۇڭ­عىش پرەزيدەنت تاپسىرعان پرەزيدەنت اكىمشىلىگىنىڭ باس­شىسى, پارلامەنت سەنا­تىنىڭ توراعاسى, دەپۋتاتى, مەم­لە­كەت­­تىك حاتشى لاۋازىمدا­رىن زور جاۋاپكەرشىلىكپەن اتقار­دى. قوعامدا, ەل اراسىندا ورە­كەڭ­نىڭ ەل اعالىق كەلىستى كەلبەتى, ور­نىقتى, اقجارقىن مى­نەزى, مەم­لەكەتشىل ۇستانىمى ونىڭ ادامي بەدەلىن كوتەرىپ, قاي ورتادا دا قۇرمەت اياسىندا جۇرەدى.

ورەكەڭ جاستايىنان قاي جەردە, قانداي مەكەمەدە جۇمىس ىستەسە دە ەڭ الدىمەن ارىپتەستەرىمەن ءوزارا سىيلاستىق, سەنىمدىلىك, تازا­لىق قارىم-قاتىناستىڭ قالىپ­تاسۋىنا ءمان بەرەدى. ءوزى وسىنى ۇستانادى. ارىپتەستەرىنە, لاۋازىمدى قىزمەتكەرلەرگە قوعام تالابى دا وسى.

اسىرەسە ەلىمىزدە پرەزيدەنت­تىڭ كادر ساياساتىن جۇزەگە اسىرۋدا بۇلاقتىڭ كوزىن اشقانداي شاپا­عاتى ءتيىپ, كوپتەگەن ادامداردىڭ جولىن اشتى. لاۋازىمدى قىز­مەتكەرلەردى مەملەكەتتىك جاۋاپ­تى قىزمەتتەرگە تاڭداۋ, تارتۋ, ولار­دىڭ ءوسۋ جولدارى تەك ءبىر باعىتتا سايراپ جاتقان سارا جول ەمەس. قايشىلىعى, قارسى اعىسى, اسۋى, بۇرالاڭى جەتكىلىكتى. ونداي جاعدايدا دا ەشقايدا بۇرا تارتپاي ءادىل شەشىم قابىلداۋ – ورەكەڭنىڭ ۇستانىمى, ادامي كەلبەتى.

زەينەت جاسىنا شىققاننان سوڭ ءوزىنىڭ جاستايىنان تابيعات قۇمار­لىعىنا ەركىن ارالاسىپ, دوستارىمەن بىرىگىپ, تابيعات­تى, تابيعي اڭ, قۇستاردى قورعاي­تىن «قانسونار» تابيعات قورعاۋشى­لار ۇيىمىن قۇرىپ, تۋعان ەلدىڭ باي تابيعاتىنىڭ ساقتالۋىنا قولقا­بىس ەتۋ قوعامدىق قوزعالى­سىنا كىرىستى. باستى ماقساتتارى – قورشاعان ورتانى, ۇلتتىق تابيعي قورىقتاردى, ونداعى جانۋارلاردى براكونەرلەردەن قورعاۋعا, ءارتۇرلى توتەنشە جاعدايلاردان ساق­تاۋعا كومەك كورسەتىپ, تابيعات­تى, ەجەلگى قازاق جەرىنە ءتان جا­نۋارلاردىڭ قايتا ورىستەۋى.

ورەكەڭنىڭ Nur Otan حالىق پارتياسىمەن, ونىڭ ءوسۋ جولدارىمەن قارىم-قاتىناسىنىڭ ءوزى بولەك اڭگىمە. ول وسى پارتيانىڭ مۇشەسى عانا ەمەس, بەلسەندى ۇيىم­­­داستىرۋشىسىنىڭ ءبىرى. ۇزاق جىلدار Nur Otan جانىنان قۇ­رىل­­عان جەمقورلىققا قارسى كە­ڭەستىڭ جۇمىسىنا باسشىلىق ەتتى. قاي كەزدە دە Nur Otannyn ءبىز­دىڭ قوعام مەملەكەتىمىز ءۇشىن ەڭ ماڭىزدى شارالارى مەن باعدار­لامالارىنىڭ باسى-قا­سىن­­دا ورە­كەڭنىڭ پىكىرى مەن داۋى­سى ەرەكشە.

سول سياقتى قازاقستان حال­قى اسسامبلەياسىن ۇيىمداس­تىرىپ, ونىڭ ءبىزدىڭ قوعامدا ور­نى­عىپ, ناتيجەلى جۇمىسىن قالىپ­تاس­تىرۋدا دا تىكەلەي نۇرسۇلتان ءابىش ۇلىنىڭ جانىندا جۇرگەن ورەكەڭ.

تىلەگى دە, ەڭبەگى دە ەلىمىزدىڭ بىرلىگىنە, ىنتىماعىنا, تۇرمىس الەۋەتىنىڭ جاقسارۋىنا, تاۋەل­سىز مەملەكەتىمىزدىڭ الەمدىك بەدە­لىنىڭ نىعايۋىنا جۇمىلۋ­دى قۇپ­تاپ جۇرگەن ەل اعالارىنىڭ ءبىرى – ءوزىمىزدىڭ ورالباي ابدىكارى­موۆ.

ورەكەڭنىڭ جولى – شاپاعاتتى جول.

قۋانىش سۇلتانوۆ,

پارلامەنت ءماجىلىسىنىڭ دەپۋتاتى