قاسىم-جومارت توقاەۆ ەربولات دوساەۆ پەن انار جايىلعانوۆانى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ۇلتتىق بانك توراعاسىمەن كەزدەسۋدە قازاقستان پرەزيدەنتىنە جۇرگىزىلىپ جاتقان اقشا-كرەديت ساياساتىنىڭ 2019 جىلدىڭ 11 ايىنداعى قورىتىندىلارى, ينفلياتسيا ديناميكاسى, ۇلتتىق بانكتىڭ التىن-ۆاليۋتا قورى مەن ۇلتتىق قور اكتيۆتەرىنىڭ احۋالى تۋرالى باياندالدى.
سونداي-اق ەربولات دوساەۆ قاسىم-جومارت توقاەۆقا ينفلياتسياعا بايلانىستى بولجامداردى, 2020 جىلعا ارنالعان ىشكى جالپى ءونىمنىڭ ءوسۋى جانە تولەم بالانسىنىڭ اعىمداعى شوتى بويىنشا جورامالداردى ۇسىندى.
كەزدەسۋ قورىتىندىسى بويىنشا پرەزيدەنت بىرقاتار تاپسىرما بەردى.
انار جايىلعانوۆا مەملەكەت باسشىسىنا پرەزيدەنتتىك كادر رەزەرۆى 4-كەزەڭىنىڭ قورىتىندىسى تۋرالى ەگجەي-تەگجەيلى مالىمەت بەردى.
اتاپ ايتقاندا, انار جايىلعانوۆا وتكەن كەزەڭنىڭ نەگىزگى كريتەريلەرى مەن تالاپتارى, ساراپشىلار كوميسسياسىنىڭ قۇرامى جايىندا ايتتى. ونىڭ ايتۋىنشا, ۇمىتكەرلەرمەن اڭگىمەلەسۋ ءادىل ءارى كونكۋرس ەرەجەسىنە ساي ءوتتى.
پرەزيدەنت اقتىق كەزەڭنىڭ بارىنشا اشىق ءوتۋىن قامتاماسىز ەتۋدى جانە ەڭ لايىقتى ۇمىتكەرلەردى ىرىكتەپ الۋدى تاپسىردى.