قازاقستان رەسپۋبليكاسىنىڭ پورتۋگاليا رەسپۋبليكاسىنداعى ەلشىسى داۋلەت باتىراشەۆتىڭ پورتۋگاليا پرەزيدەنتى مارسەلۋ رەبەلۋ دە سوزاعا سەنىم گراموتالارىن تاپسىرۋ ءراسىمى ءوتتى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
«كەزدەسۋ بارىسىندا قازاقستان ەلشىسى قازاقستاننىڭ پرەزيدەنتى قاسىم-جومارت توقاەۆتىڭ ىزگى تىلەكتەرىن پورتۋگاليا پرەزيدەنتىنە جەتكىزدى. د.باتىراشەۆ ءوزارا ارەكەتتەستىكتىڭ بارلىق باعىتتارى بويىنشا ىنتىماقتاستىقتى ودان ءارى دامىتۋعا كۇش سالۋعا دەگەن باسشىلىعىمىزدىڭ قىزىعۋشىلىعىن راستادى. وسى ورايدا, اعىمداعى جىلى ەلىمىزدىڭ پورتۋگالياداعى ەلشىلىگىنىڭ اشىلعاندىعىن اتاپ ءوتتى.
قازاقستاندىق ديپلومات پرەزيدەنت ق.توقاەۆ العا قويعان نەگىزگى ماقساتتارى مەن مىندەتتەرى تۋرالى, ەكونوميكانى ءارتاراپتاندىرۋ, ترانزيتتىك-كولىكتىك الەۋەتتى ىلگەرىلەتۋ, ساياسي جانە الەۋمەتتىك-ەكونوميكالىق سالالاردى مودەرنيزاتسيالاۋ جونىندەگى شارالارى تۋرالى حاباردار ەتتى.
تاراپتار ەكى ەل اراسىنداعى قاتىناستاردىڭ دوستىق جانە سىندارلى سيپاتىن اتاپ ءوتتى. ساۋدا-ەكونوميكالىق جانە ينۆەستيتسيالىق سەرىكتەستىكتى كەڭەيتۋگە, سونداي-اق كوپجاقتى سالاداعى ىنتىماقتاستىقتى تەرەڭدەتۋگە ءوزارا قىزىعۋشىلىعى ءبىلدىرىلدى.
ءوز كەزەگىندە, م.رەبەلۋ دە سوزا قازاقستاندى اۋقىمدى ساياسي جانە ەكونوميكالىق جەتىستىكتەرىمەن قۇتتىقتاپ, ليسسابوننىڭ قازاقستانمەن ىنتىماقتاستىقتى جان-جاقتى دامىتۋعا دايىندىعىن ءبىلدىردى. ول قازاقستاندىق-پورتۋگال قاتىناستارىن ساپالى جاڭا دەڭگەيگە كوتەرۋدىڭ العىشارتتارىنىڭ بار ەكەنىن ايتىپ, وسىعان بايلانىستى, ەكىجاقتى بايلانىستاردى تەرەڭدەتۋ ءۇشىن ودان ءارى تىعىز ءوزارا ارەكەتتەستىكتىڭ قاجەتتىگىن اتاپ ءوتتى.
كەزدەسۋ سوڭىندا م. رەبەلۋ دە سوزا قازاقستاننىڭ ەلشىسىن قىزمەتكە كىرىسۋىمەن قۇتتىقتاپ, الداعى جۇمىسىنا ساتتىلىك تىلەدى», دەلىنگەن حابارلامادا.