الماتىدا برازيليالىق دجيۋ-دجيتسۋ مەن گرەپپلينگتەن «ArlanGrip Championship2019» دەپ اتالاتىنحالىقارالىق تۋرنير اياسىندا وتكەن ەرەسەكتەر مەن ارداگەرلەر اراسىنداعى باسەكەلەر ءوز مارەسىنە جەتتى.
ايتۋلى دودادا التى مەملەكەتتەن كەلگەن 320 سپورتشى باق سىناپ, 50 التىن, 48 كۇمىس جانە 45 قولا مەدالدى ساراپقا سالدى. جارىستىڭ ەكى ءتۇرى بويىنشا دا قازاقستان قۇراماسى اسقان شەبەرلىك تانىتىپ, «الماتى ارەنا» سپورت كەشەنىنە جينالعان جانكۇيەرلەردى قۋانىشقا بولەدى.
جەرلەستەرىمىزدىڭ اراسىنان جاسۇلان ايتقازى, تۇرلان اقتانوۆ, ءاشىمجان مۇحيددينوۆ, بايان مۇراتبەكوۆ, ارمان داۋلەتكارىموۆ, جاندوس قاراجانوۆ, ازات قاتاۋباەۆ, نۇركەن شىنىباەۆ, باۋىرجان ارىستانبەكوۆ, يۋري شەستوپالوۆ, بولاتبەك بايبوسىنوۆ, ءامىر مالعاجدار, ايبار ورازالى, ۆياچەسلاۆ بۋنيتسكي, كارەن پاشيكيان, ەرمەك بادان, ەربول نۇقىشەۆ, جانە تاعى باسقا سپورتشىلار قارسىلاس شىداتپاي, باس جۇلدەلەردى ولجالادى. ايەلدەر اراسىندا ءالفيا رىسجانوۆا, يۋليا كەرەيباەۆا, گۇلميرا مۇقانوۆا, بوتاگوز ەلدوسقىزى, دايانا امانجولوۆا, ديانا شاپەنوۆا سىندى سۇلۋلاردىڭ ونەرىنە تامساندىق.
«رۋحاني جاڭعىرۋ» باعدارلاماسى اياسىندا الماتى قالاسى اكىمدىگىنىڭ قولداۋىمەن وتكەن بايراقتى باسەكەدە وتاندىق سپورتشىلارىمىز 39 التىن, 38 كۇمىس جانە 34 قولا مەدالدى يەلەنىپ, جالپى كوماندالىق ەسەپتە كوش باستادى.
جارىستىڭ دەڭگەيى اسا جوعارى بولدى. بارلىق كوماندالار الماتىعا «بەس قارۋلارىن اسىنىپ» كەلگەن ەكەن. اسىرەسە, رەسەي, قىرعىزستان جانە وزبەكستان قۇرامالارىنىڭ قارقىنى كۇشتى بولدى. دەسەك تە ايتۋلى دودا ءوز ەلىمىزدە, ءوز جەرىمىزدە, ءوز جانكۇيەرلەرىمىزدىڭ كوز الىندا ءوتىپ جاتقاندىقتان ءبىزدىڭ سپورتشىلار نامىس تۋىن بيىك ۇستاپ, كوزدەگەن ماقساتتارىنا قول جەتكىزدى, - دەيدى قازاقستان رەسپۋبليكاسىنىڭ برازيليالىق دجيۋ-دجيتسۋ جانە گرەپپلينگ فەدەراتسياسىنىڭ ۆيتسە-پرەزيدەنتى اقمارال قاناتباەۆا.