پرەزيدەنتتىك جاس كادرلار رەزەرۆىنە ىرىكتەۋگە قاتىسۋشىلار «ساراپشىلىق كوميسسيادا اڭگىمەلەسۋ» كەزەڭىنەن وتۋدە.
27 قاراشا مەن 12 جەلتوقسان ارالىعىندا وتەتىن اتالعان كەزەڭگە 400 ۇمىتكەر جىبەرىلدى.
ساراپشىلىق كوميسسيا تۇراقتى جانە تۇراقتى ەمەس مۇشەلەردەن تۇرادى. ونىڭ قۇرامىندا پرەزيدەنت اكىمشىلىگىنىڭ, مەملەكەتتىك قىزمەت ىستەرى اگەنتتىگىنىڭ, پرەزيدەنت جانىنداعى مەملەكەتتىك باسقارۋ اكادەمياسىنىڭ جانە «سامۇرىق-قازىنا» اق كورپوراتيۆتىك ۋنيۆەرسيتەتىنىڭ وكىلدەرى بار.
مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆانىڭ ايتۋىنشا, الدىڭعى كەزەڭدەردەگىدەي اڭگىمەلەسۋدە بارىنشا اشىقتىق قامتاماسىز ەتىلگەن. «كوميسسيا مۇشەلەرى ۇمىتكەرلەردى ونلاين-جۇيەدە باعالايدى. ول كەلەسى تۇردە ىسكە اسىرىلادى. كوميسسيانىڭ ءاربىر مۇشەسى قاتىسۋشىمەن اڭگىمەلەسۋدەن كەيىن سول مەزەتتە ۇمىتكەرگە بىردەن بەسكە دەيىنگى شكالا بويىنشا ءوزىنىڭ باعاسىن قويادى. باعالاۋدى جۇرگىزۋ ءۇشىن ءاربىر بەلگىلەنگەن شكالانىڭ ءتيىستى ولشەمدەرى مەن دەسكريپتورلارى ازىرلەندى. ولار بويىنشا ول (كوميسسيا مۇشەسى – ەسك.) باعالاۋدى قويادى, سودان كەيىن باعا اۆتوماتتى تۇردە بازاعا تۇسەدى جانە گەنەراتسيالانادى. وسىلايشا باعالاۋ ۇدەرىسى 2-3 سەكۋندتان اسپايدى. باسقاشا ايتقاندا, كوميسسيانىڭ بارلىق مۇشەلەرى ونلاين باعا ەنگىزگەننەن كەيىن, ولار بىردەن بازاعا تۇسەدى. ەڭ باستىسى, باعانى تۇزەتۋگە ەشقانداي مۇمكىندىك جوق», دەدى ا.جايىلعانوۆا.
ا.جايىلعانوۆا, سونداي-اق كوميسسيا مۇشەلەرى اڭگىمەلەسۋدىڭ ناتيجەلەرىن داۋىستاپ تالقىلامايتىنىن, سونىڭ ارقاسىندا كوميسسيانىڭ باسقا مۇشەلەرىنە ءوز پىكىرىمەن ىقپال ەتۋ مۇمكىندىگى جويىلاتىندىعىن ايتتى.
ونلاين-جۇيەدە ءاربىر كوميسسيا مۇشەسىنىڭ باعالاۋى نەگىزىندە ۇمىتكەردىڭ جالپى ورتاشا باعاسىن شىعارۋدىڭ قاراپايىم فورمۋلاسى قولدانىلادى. اعىمداعى كۇن ىشىندە اڭگىمەلەسۋلەر اياقتالعاننان كەيىن كوميسسيا حاتشىسى – جۇيە اكىمشىسى حاتتامانى دەرەۋ باسىپ شىعارادى جانە كوميسسيانىڭ ءاربىر مۇشەسى ءوزىنىڭ باعالاۋىنىڭ دۇرىستىعىنا كوز جەتكىزۋگە مۇمكىندىگى بار جانە ولاردى قولتاڭباسىمەن كۋالاندىرادى.
«سونىمەن قاتار پروتسەستەردىڭ وبەكتيۆتىلىگىنە ەشكىمنىڭ كۇمانى بولماۋى ءۇشىن سول كۇنى ۇمىتكەرلەردىڭ جەكە كابينەتتەرىندە دەرەكتەر جاريالانۋدا. ساراپشىلىق كوميسسياسىندا اڭگىمەلەسۋدى قوسا العاندا, ءاربىر الدىڭعى كەزەڭدەر بويىنشا ۇلەس سالماعىن ەسكەرە وتىرىپ, ۇمىتكەرلەردىڭ جالپى رەيتينگى بارلىق كانديداتتار اڭگىمەلەسۋ كەزەڭىنەن وتكەننەن كەيىن pkrezerv.kz سايتىندا قولجەتىمدى بولادى», دەپ حابارلادى مقىا توراعاسى.