وتكەن جىلى داڭقتى جىراۋ جامبىل جاباەۆتىڭ تاراز قالاسىنداعى بۇرىنعى كوك بازاردىڭ ماڭىندا تۇرعان ەسكەرتكىشى ورنىنان الىنىپ, ونىڭ كوشىرمەسى بىلتىر قازان ايىندا وبلىستىق اكىمدىك عيماراتىنىڭ الدىنا قويىلعان بولاتىن. ارينە, بۇل باستامانى قۇپتاعاندار دا بولدى. الايدا جارتى عاسىردان استام ۋاقىتتان بەرى اۋليەاتا ءوڭىرىنىڭ تولقۇجاتىنا اينالعان الىپ شويىن ەسكەرتكىشتىڭ تۇعىرىنان تۇسۋىنە جانە اكىمدىك عيماراتىنىڭ الدىنا ونىڭ كوشىرمەسىنىڭ قويىلۋىنا وڭىردەگى بىرقاتار ازامات نارازىلىق تا بىلدىرگەن ەدى. بىراق كوپتەگەن نارازىلىققا قاراماستان اتاقتى ءمۇسىنشى حاكىمجان ناۋرىزباەۆتىڭ بۇل ايگىلى تۋىندىسى «جاسىل تاراز» مەكەمەسىنىڭ قويماسىنا قويىلدى.
جەرگىلىكتى بيلىك بۇرىنعى ەسكەرتكىشتىڭ ورنىنان الىنىپ, قويماعا قويىلۋ سەبەبىن ونىڭ توزىعىنىڭ جەتكەنىمەن بايلانىستىرعان ەدى. ماسەلەن, شاھار بيلىگى ەسكەرتكىش ورناتىلعان 54 جىلدا ونى 17 رەت جوندەگەن. بىراق وڭىردە جىراۋ ەسكەرتكىشىنە قاتىستى «جىر» ءبارىبىر تولاستاعان جوق. سوندىقتان دا قالا اكىمدىگى الماتى قالاسىنان ارنايى ماماندار شاقىرىپ, ەكى رەت ساراپتاما جۇمىستارىن دا جۇرگىزگەن. تاراز قالاسى اكىمىنىڭ ورىنباسارى كەنجەبەك ولجاباي دا كەزىندە سول ساراپتاما جۇمىستارىنىڭ ناتيجەسىندە بۇل ەسكەرتكىشتە كۇردەلى جارىقتاردىڭ پايدا بولعاندىعىن ايتقان ەدى.
بىراق جارامسىز دەپ تانىلعان جارتى عاسىردان استام تاريحى بار جامبىل ەسكەرتكىشى جۋىردا وبلىستىق اكىمدىك عيماراتىنىڭ الدىنا قايتا ورناتىلدى. قويمادا جىلعا جۋىق قاڭتارىلىپ تۇرعان تۇلعا ەسكەرتكىشى تۇعىرعا قايتا كوتەرىلدى. وسى ۋاقىتقا دەيىن جەرگىلىكتى اتقامىنەرلەر بۇرىنعى بابا ەسكەرتكىشىنىڭ قايتا جوندەۋدەن وتكەن سوڭ ءوز ورنىن تاباتىنىن ايتىپ, سەندىرىپ كەلگەن بولاتىن. ال وتكەن جىلى وبلىستىڭ باس عيماراتىنىڭ الدىنا قويىلعان بيىكتىگى 4 مەتر, سالماعى 1,5 توننا جىراۋ ەسكەرتكىشىنىڭ كوشىرمەسىنىڭ ەندى قايدا بارىپ تۇراقتايتىنى بەلگىسىز.
جامبىل وبلىسى