قازاق ۇلتتىق قىزدار پەداگوگيكالىق ۋنيۆەرسيتەتى 75 جىلدىق مەرەيتويىن ساۋاپتى ىسكە ارنادى. پاراسات پەن تاعىلىم مەكتەبىنىڭ ءتول تاريحىنداعى ايتۋلى داتا Úkili úmit اتتى قايىرىمدىلىق بالىنىڭ اياسىندا ءوتتى.
قىسقى ەرتەگى جەلىسىمەن ۇيىمداستىرىلعان شارا 75 جۇپتىڭ ورىنداۋىنداعى ىرعاقتى ۆالسپەن اشىلدى. بالدىڭ دەبيۋتانتى اتانعان قىزدار ۋنيۆەرسيتەتىنىڭ ستۋدەنتتەرى مەن قر ۇلتتىق قاۋىپسىزدىك كوميتەتىنىڭ شەكارا قىزمەتى اكادەمياسىنىڭ كۋرسانتتارى كلاسسيكالىق بيلەردى جوعارى دەڭگەيدە ورىنداپ كوپشىلىكتىڭ ىستىق ىقىلاسىنا بولەندى.
– دارا ءداستۇرى بار وردالى وقۋ ورنى عاسىرعا جۋىق ۋاقىت بەلەسىندە قازاق قىزدارىنىڭ شىن مانىسىندەگى شامشىراعىنا اينالدى. وزىندىك كەسكىن-كەلبەتىن قالىپتاستىردى. حالقىمىزدىڭ ۇرپاقتان ۇرپاققا ميراس بولىپ كەلە جاتقان داستۇرلەر ساباقتاستىعىن جاڭعىرتتى. ەكىنشى دۇنيەجۇزىلىك سوعىستىڭ الاساپىران ۋاقتىسىندا ىرگەتاسى قالانعان بۇل ءبىلىم ورداسىنىڭ قازاقستاننىڭ پەداگوگ كادرلارىن دايارلاۋداعى الاتىن ورنى ايرىقشا ۇلكەن. سەبەبى وسى جىلدار ارالىعىندا وقۋ ورنىن 60 مىڭنان استام تۇلەك ءبىتىرىپ شىقتى. ولار ۇلان-عايىر وتانىمىزدىڭ تۇكپىر-تۇكپىرىندە ەڭبەك ەتىپ, ساۋاتتى دا ءبىلىمدى ۇرپاقتى دايارلاۋعا زور ەڭبەك ءسىڭىردى. ۇلت پەداگوگيكاسىنىڭ دامۋى جولىندا قاجىرلى قىزمەت اتقاردى. بۇگىندە الەمدە تەك قانا قىزدار ءبىلىم الاتىن جوعارى وقۋ ورىندارى ساۋساقپەن سانارلىقتاي. وسى ورايدا بىرەگەي ءبىلىم ورداسى رەتىندە ەلىمىز بەن الەمگە كەڭىنەن تانىمال بولعان وقۋ ورنى – «قىزدار ۋنيۆەرسيتەتى» دەگەن وزىندىك برەندىن قالىپتاستىردى. ءبىزدىڭ باستى ماقساتىمىز – وسى ۋاقىتقا دەيىن قول جەتكىزگەن تابىستاردى ەسەلەي ءتۇسۋ, قازىنالى قاراشاڭىراقتى شىققان بيىگىنەن تۇسىرمەۋ, – دەدى قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا.
شارا شەڭبەرىندە پەداگوگيكالىق وقۋ ورنىنىڭ وقىتۋشىلارى مەن ستۋدەنتتەرىنىڭ شىعارماشىلىق جۇمىستارى مەن ونەر تۋىندىلارى اۋكتسيونعا قويىلدى. قايىرىمدىلىق بالىنان جانە اۋكتسيوننان تۇسكەن قاراجات I-توپتاعى مۇگەدەك ايسۇلتان اسىلحان ەسىمدى ءسابيدىڭ ەمىنە جۇمسالادى. 2015 جىلى دۇنيەگە كەلگەن ءبۇلدىرشىن مي ىسىگى, كورۋ نەرۆىسىنىڭ اتروفياسى, ەپيلەپسيا جانە تسەرەبرالدى سال اۋرۋىنا شالدىققان. شارا بارىسىندا ءتۇرلى ۇيىم وكىلدەرى مەن ازاماتتار ءسابيدىڭ ەم-دومىنا قاجەتتى قاراجاتتى اۋدارىپ جاتتى.
تاعىلىمعا تولى وقۋ ورنىنىڭ مەرەيتويىنىڭ سوڭىندا ۋنيۆەرسيتەت تاريحىنان سىر شەرتەتىن تەاترلاندىرىلعان كورىنىس كوپشىلىك نازارىنا ۇسىنىلىپ, ەسترادا جۇلدىزدارىنىڭ قاتىسۋىمەن گالا-كونتسەرتكە ۇلاستى.
الماتى