وسلونىڭ ادەبيەت ۇيىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «بەيبىتشىلىك كىندىگى» كىتابىنىڭ نورۆەگ تىلىندەگى نۇسقاسىنىڭ تۇساۋكەسەر ءراسىمى ۇيىمداستىرىلدى.
سەمەي پوليگونىنىڭ جابىلۋى مەن يادرولىق قارۋسىزدانۋ ۇدەرىسى نۇرسۇلتان نازارباەۆتىڭ باتىل باستامالارىمەن تىكەلەي بايلانىستى...
«بەيبىتشىلىك كىندىگى» كىتابى تەك يادرولىق سىناقتاردىڭ تاريحى مەن قازاقستاننىڭ يادرولىق الەۋەتىن بولشەكتەۋ تۋرالى عانا ەمەس, ول ادامزاتتى يادرولىق قارۋدان ازات الەم قۇرۋ تۋرالى ويعا جەتەلەيدى», – دەدى تۇساۋكەسەر بارىسىندا قازاقستاننىڭ نورۆەگياداعى ەلشىسى ەركىن اقىنجانوۆ.
«يادرولىق قارۋ – ماعىناسىز قارۋ. ونى اپاتتى سالدارسىز پايدالانۋ مۇمكىن ەمەس. مۇنى تەرەڭ تۇسىنگەندەردىڭ الدىڭعى قاتارىندا قازاقستان جانە ونىڭ تۇڭعىش پرەزيدەنتى نۇرسۇلتان نازارباەۆ تا بار. ونىڭ سەبەبى «بەيبىتشىلىك كىندىگى» كىتابىندا ايتىلادى», – دەدى جيىن بارىسىندا نورۆەگيانىڭ بۇرىنعى پرەمەر-ءمينيسترى كەلل ماگنە بوندەۆيك. ونىڭ پىكىرىنشە, «يادرولىق قارۋدى جويۋ جۇمىسىن كۇشەيتەتىن ءبىلىم مەن رەسۋرستاردىڭ بولعانى ماڭىزدى. وسى كىتاپتا ايتىلعان قازاقستاننىڭ تاجىريبەسى وتە پايدالى. كەڭەس وداعى ىدىراعاننان كەيىن بارلىق يادرولىق قارۋلار مەن قوندىرعىلاردى ءوز اۋماعىنان شىعارىپ تاستاعانى ءۇشىن بۇل ەل الەمنىڭ قۇرمەتىنە يە جانە ونىڭ وسىنداي قادامى باسقالار ءۇشىن وڭ ۇلگى بولىپ تابىلادى».
قازاقستاننىڭ يادرولىق الەۋەتىن بولشەكتەۋ ۇدەرىسىنە, سونداي-اق تاراتپاۋ رەجىمىنىڭ نەگىزگى ماسەلەلەرىنە تۇڭعىش پرەزيدەنت قورى حالىقارالىق باعدارلامالارىنىڭ جەتەكشىسى قايرات ابۋسەيىتوۆ پەن نورۆەگيانىڭ حالىقارالىق ساياسات ينستيتۋتىنىڭ (NUPI) اعا زەرتتەۋشىسى سۆەررە لودگارد شولۋ جاساپ ءوتتى.
سۋرەتشى جانە انتيادرولىق قوزعالىستىڭ قايراتكەرى كارىپبەك كۇيىكوۆ سەمەي اۋماعى تۇرعىندارىنىڭ كورگەن قايعى-قاسىرەتى مەن قورشاعان ورتاعا كەلتىرەتىن زيان تۋرالى تاعىلىمدى بايانداما جاسادى. ول قازاقستان حالقىنىڭ يادرولىق سىناقتاردى توقتاتۋ جولىنداعى كۇرەسى مەن ن.نازارباەۆتىڭ پوليگوندى جابۋ تۋرالى تاريحي شەشىمى جايىندا ايتىپ بەردى. سونىمەن قاتار ك.كۇيىكوۆ جينالعان قاۋىمدى «اتوم» جوباسىن (www.theATOMProject.org) قولداۋعا جانە يادرولىق قارۋدان ازات الەم جونىندەگى پەتيتسياعا قول قويۋعا شاقىردى.
نورۆەگيا سىرتقى ىستەر مينيسترلىگىنىڭ اتىنان ايماقتىق دەپارتامەنتتىڭ ديرەكتورى اننا-كريستي كارلسەن دە ءسوز سويلەدى.
ءىس-شاراعا يادرولىق قارۋدى جويۋ ءۇشىن ناۋقان (ICAN), «يادرولىق قارۋعا – جول جوق» (Nei til Atomvåpen) جانە باسقا دا ۇكىمەتتىك ەمەس ۇيىمدار, يادرولىق قاۋىپسىزدىك سالاسىنىڭ ساراپشىلارى, ساياساتتانۋشىلار, ديپلوماتتار, ءدىني قايراتكەرلەر جانە قوعامنىڭ باسقا دا وكىلدەرى كەلدى.
كىتاپتىڭ تۇساۋكەسەرى قازاقستان رەسپۋبليكاسىنىڭ تۇڭعىش پرەزيدەنتى كۇنىنە ارنالدى. ءماتىندى نورۆەگ تىلىنە حالىقارالىق ساياساتتانۋشى جانە كاسىبي اۋدارماشى نيكولاي گەروۆ اۋدارعان. نورۆەگيالىق باسىلىمعا العىسوزدەرىن دايىنداپ, ۇسىنعاندار – نورۆەگيانىڭ بۇرىنعى پرەمەر-ءمينيسترى كەلل ماگنە بوندەۆيك, تۇڭعىش پرەزيدەنت – ەلباسى قورىنىڭ اتقارۋشى ديرەكتورى اسەت يسەكەشەۆ, نورۆەگيانىڭ سىرتقى ىستەر ءمينيسترى ينە ەريكسەن سورەيدە, سونداي-اق اعا ساراپشى جانە NUPI-ءدىڭ بۇرىنعى ديرەكتورى سۆەررە لودگارد. كىتاپ Steffen Grafisk Tilrettelegging باسپاسىندا جارىق كوردى.