ن.كرۋپسكايا اتىنداعى وبلىستىق كىتاپحانادا «Egemen Qazaqstan» گازەتىنىڭ 100 جىلدىعىنا ارنالعان دوڭگەلەك ۇستەل ءماجىلىسى ءوتتى. وعان ورىنبور وبلىسى مادەنيەت جانە سىرتقى بايلانىستار ءمينيسترىنىڭ ورىنباسارى, حالىقارالىق ارىپتەستىك باسقارماسىنىڭ باستىعى الەكساندر كالينين باستاعان ورىنبورلىق لاۋازىمدى تۇلعالار قاتىستى.
قازاقستاننىڭ رەسەي فەدەراتسياسىنداعى توتەنشە جانە وكىلەتتى ەلشىسىنىڭ اعا كەڭەسشىسى جانار كولباچاەۆا يمانعالي تاسماعامبەتوۆتىڭ قۇتتىقتاۋ حاتىن وقىپ بەردى. قۇرمەتتى دارحان قۋاندىق ۇلى, قادىرلى گازەت ۇجىمى! سىزدەردى مەرەيتويلارىڭىز – «Egemen Qazaqstan» گازەتىنىڭ جارىققا شىققانىنا 100 جىل تولۋىمەن شىن جۇرەكتەن قۇتتىقتايمىن! ءار كەزەڭنىڭ جارشىسى, قالىڭ كوپشىلىكتىڭ مۇڭ-مۇقتاجىنىڭ جاقتاۋشىسى بولعانى انىق. سوناۋ عاسىر باسىندا, ياعني 1919 جىلعى جەلتوقسان ايىندا ورىنبور قالاسىندا العاشقى سانى جارىق كورگەن «ۇشقىن» گازەتى دە ازاتتىق اڭساعان ەل ارمانىن تۋ ەتتى.
سودان بەرى بۇل گازەتتە ءار جىلدارى بەرنياز كۇلەەۆ, سماعۇل سادۋاقاسوۆ, جۇسىپبەك ايماۋىتوۆ, مۇحتار اۋەزوۆ, بەيىمبەت مايلين, ساكەن سەيفۋللين, تۇرار رىسقۇلوۆ, وراز جاندوسوۆ, عابيت مۇسىرەپوۆ, شەرحان مۇرتازا, ءابىش كەكىلباەۆ سىندى ۇلتىمىزدىڭ ءبىرتۋار ازاماتتارى قىزمەت ىستەپ, باسىلىمدا دامىتۋ, بەت-بەينەسىن قالىپتاستىرۋ, بەدەلىن ارتتىرۋ ىسىنە زور ۇلەس قوستى.
اساۋداي تۋلاعان زامانا تولقىندارىندا ۋاقىت قۇدىرەتىمەن «ۇشقىننان» كەيىن «ەڭبەك تۋى», «ەڭبەكشىل قازاق», «ەڭبەكشى قازاق», كەيىننەن «سوتسيالدى قازاقستان», «سوتسياليستىك قازاقستان» بولىپ اتاۋى وزگەرگەنىمەن, رەسپۋبليكالىق باسىلىمنىڭ بۇل نەگىزگى التىن ارقاۋى وزگەرگەن جوق. وزگەرمەك تە ەمەس. ەلىمىزدىڭ ءتول باسىلىمىنىڭ عاسىرلىق تورقالى تويىمەن شىن جۇرەكتەن قۇتتىقتاپ, «Egemen Qazaqstan» تامىر تارتقان ءۇردىستىڭ باياندى بولۋىن تىلەيمىن. بۇگىنگى مەرەكەلى كۇنى گازەت ۇجىمىنا شىعارماشىلىق شابىت, ەڭبەكتەرىنە تابىس جانە جارقىن بولاشاق تىلەيمىن. قازاقستاننىڭ وركەندەۋى جولىندا قالامدارىڭىز مۇقالماي قىزمەت ەتە بەرىڭىزدەر!» ىزگى نيەتپەن يمانعالي تاسماعامبەتوۆ.
جيىندا قازاقستان مەن رەسەي فەدەراتسياسى اراسىنداعى دوستىق قارىم-قاتىناس, رۋحاني بايلانىستار جونىندە ءجيى ايتىلدى. «رەسەي حالىقتارى دوستاستىعى» كوممەرتسيالىق ەمەس اۆتونومدى ۇيىمىنىڭ ساراپشىسى, ورىنبور مەملەكەتتىك ۋنيۆەرسيتەتىنىڭ وڭتۇستىك ورال تاريح جانە ەتنوگرافيا عىلىمي زەرتتەۋ ينستيتۋتىنىڭ اعا عىلىمي قىزمەتكەرى كونستانتين مورگۋنوۆ ورىنبور رابفاگىندا وقىعان قازاقتار تۋرالى وتە قىزىقتى, دەرەككە تولى بايانداما جاسادى.
باتىس قازاقستان وبلىستىق ءماسليحاتىنىڭ حاتشىسى مالىك قۇلشار دا ەكى ەلدىڭ دوستىعىنا ارقاۋ بولاتىن ىزگى شارالاردىڭ ءبىرى - وسى ءماجىلىس ەكەنىن ايتتى.
اقىن نەسىپبەك ايت ۇلى گازەت مەرەيتويىنا ارناعان ولەڭىن وقىدى.
«Egemen Qazaqstan» گازەتى حالىقارالىق ءباسپاسوز كاتالوگىنا ەنگەندىكتەن, گازەتىمىزگە ەندى رەسەي جەرىندەگى, سونىڭ ىشىندە ورىنبورداعى وقىرماندارىمىز دا جازىلا الادى. سوڭعى جىلدارى ىزدەنىس جۇمىستارى ناتيجەسىندە «ۇشقىن» رەداكتسياسى ورنالاسقان تاريحي عيمارات انىقتالدى. رەسەيدەگى ەلشىمىز يمانعالي نۇرعالي ۇلىنىڭ تىكەلەي قولداۋىمەن وسى عيماراتقا ەسكەرتكىش تاقتا ورناتۋ جونىندە كەلىسىمگە قول جەتكىزىپ وتىرمىز. مۇنى ورىنبور قالاسىنىڭ اكىمشىلىگى دە قولداپ وتىر. سونىمەن قاتار ارنايى دەلەگاتسيا جىبەرگەن باتىس قازاقستان وبلىسى باسشىلىعىنا ريزاشىلىعىمىزدى بىلدىرەمىز» دەدى د.قىدىرالى.
كەزدەسۋ سوڭىندا ورىنبور قازاقتارى قاۋىمداستىعى ۇيىمى توراعاسىنىڭ ورىنباسارى جانىبەك يتكۋزوۆ پەن «Egemen Qazaqstan» رەسپۋبليكالىق گازەتى اق باسقارما توراعاسى دارحان قىدىرالى ءوزارا ىنتىماقتاستىق جونىندەگى مەموراندۋمعا قول قويدى.