وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە, ەلىمىزدەگى «Nur Otan» پارتياسى وڭىرلىك فيليالىنىڭ باستاماسىمەن مۇمكىندىگى شەكتەۋلى 7 ادامعا دەنساۋلىقتارىن وڭالتۋعا ارنالعان ارنايى اربالار بەرىلدى.
قايىرىمدىلىق شاراسى «NFC Kazakhstan» جشس-نىڭ قولداۋىمەن جۇزەگە استى. ال, «NFC Kazakhstan» جشس وكىلى جارقىن تۇرىشەۆتىڭ ايتۋىنشا, كومپانيا ەلىمىز بويىنشا مۇمكىندىگى شەكتەۋلى جاندارعا 20 ميلليون تەڭگەگە كومەك كورسەتكەن.
ءبىزدىڭ وڭىردەگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىمەن تىعىز بايلانىستا جۇمىس جاساۋدا.
بيىل امبەباپ «umbrella» پولياك فيرماسىنىڭ ءۇش ارقالىعى بار ارباسى, ەرەسەكتەرگە ارنالعان ءبىر ءجۇرىس ارباسى, بالالارعا ارنالعان رەسەيلىك «Mega Optima» فيرماسىنىڭ بەكىتكىشى بار 5 ارباسىن بىرلەسىپ 2 ميلليون تەڭگەگە ساتىپ العان.
سونداي-اق كومپانيا وڭىردەگى كوپ بالالى وتباسىلاردىڭ ءتىزىمىن الىپ, الداعى ۋاقىتتا ولاردىڭ مەكتەپتەردە وقيتىن ۇل-قىزدارىنا قايىرىمدىلىق جاساماقشى.
باسقارماسىنىڭ مالىمەتىنشە, ارنايى قۇرىلعىلاردى وزدىگىنەن ساتىپ الۋ قيىن. ءبىر ارقالىعى بار اربا – 200 مىڭ تەڭگە, بەكىتكىشى بار ءجۇرىس ارباسى – 80 مىڭ تەڭگە, ال, كەيبىرىنىڭ باعاسى 400 مىڭ تەڭگە.
- ۇلىم باۋىرجان سال اۋرۋىمەن اۋىرادى. ءوزى وتىرا الماعاندىقتان ارقالىعى بار اربا قاجەت بولدى. اكىمدىككە ءوتىنىش جازىپ, كەزەككە تۇردىق. بۇگىن وتە قۋانىشتىمىز. بىزگە ارنايى «umbrella» ارباسىن سىيلادى. وبلىس اكىمىنە جانە دەمەۋشىلەرگە العىسىمدى بىلدىرەمىن, دەيدى ەكىباستۇزدىق گۇلنۇر نۇرحاەۆا.
بيىل 79 تۇرعىنعا ارنايى قوزعالىس قۇرالدارى بەرىلگەن. وبلىس بويىنشا ارنايى قۇرال-جابدىقتارعا مۇقتاج جاندار تىزىمىندە - 700 ادام بار. ولاردىڭ 50-ءى بالالار.
سونىمەن بىرگە, جۋىردا وبلىس ورتالىعىنا قاراستى كەنجەكول اۋىلىندا مۇگەدەكتەردى وڭالتۋ كابينەتى اشىلدى. وندا مۇمكىندىگى شەكتەۋلى جاندارعا بارلىق جاعداي جاسالعان.