16 جەلتوقساندا الماتىداعى بالۋان شولاق اتىنداعى مادەنيەت جانە سپورت سارايىندا كەرەمەت كاسىپقوي بوكس كەشى وتەدى. «MTK Global Kazakhstan» كومپانياسىنىڭ مۇرىندىق بولۋىمەن ۇيىمداستىرىلعالى وتىرعان جارىستا بىرقاتار مەملەكەتتەن كەلگەن گۇرزى جۇدىرىقتى جىگىتتەر ونەر كورسەتەدى. سول ساڭلاقتاردىڭ دەنى قازاقستاننىڭ ورەندەرىمەن كۇش سىناسادى.
بىردەن ايتا كەتەيىك, بۇل جارىستىڭ وزگە باسەكەلەردەن ءباسى مۇلدە بولەك. ولاي دەۋگە نەگىز, الاتاۋ باۋرايىندا وتەتىن جەكپە-جەكتەر ESPN تەلەارناسى ارقىلى تىكەلەي ەفيردەن تورتكىل دۇنيەگە تارايدى. ال ىرگەتاسى وسىدان
40 جىل بۇرىن اقش-تا قالانعان الەمگە ايگىلى ارنانىڭ اۋقىمى مەن اۋديتورياسى قانشالىقتى كەڭ, تالعامپازدىعى مەن تانىمالدىعى قانداي دارەجەدە ەكەنىن وسى سالاعا تىكەلەي قاتىسى بار ماماندار عانا ەمەس, تىپتەن سپورتتان تيتتەي دە حابارى بار ادامداردىڭ وزدەرى دە جاقسى بىلەدى. ولار قاتارداعى كوپ جارىستاردىڭ بارلىعىن قاز-قاتار كورسەتە بەرمەيدى. وسى جايتتاردان-اق, ESPN-ءنىڭ نازارى تەك ءباسى بولەك جانە دەڭگەيى جوعارى باسەكەلەرگە عانا اۋاتىنىن اڭعارۋعا بولادى.
الماتىداعى باسەكەلەر ESPN-نەن بولەك, 550 مىڭعا جۋىق جازىلۋشىسى بار بوكس كونتەنتى بويىنشا الەمدەگى ەڭ ءىرى ارنالاردىڭ ءبىرى – IFL TV جانە باسقا دا جەلىلەر بويىنشا كوپتەگەن ەلدەرگە تارايدى.
جارىستىڭ وزىنە كەلەر بولساق, سول كەشتە بارلىعى 12 كەزدەسۋ وتەدى. باستى جەكپە-جەكتە قازاقستاندىق ۆيكتور كوتوچيگوۆ WBC International نۇسقاسىنىڭ جەڭىل سالماقتاعى التىن بەلبەۋىن ساراپقا سالادى. بۇل ەسىم جانكۇيەرلەرگە جاقسى تانىس. 26 جاستاعى تاراز قالاسى تۋماسىنىڭ كاسىپقوي رينگتە جۇدىرىقتاسىپ جۇرگەنىنە ءتورت جىلعا جۋىقتاپ قالدى. سول ارالىقتا 10 كەزدەسۋ وتكىزگەن كوتوچيگوۆ بارلىعىن جەڭىسپەن اياقتادى. ءتورت قارسىلاسىن ايقىن باسىمدىقپەن ۇتتى. ءوز جەكپە-جەكتەرىن ول تەك قازاقستاندا عانا ەمەس, قىتاي, گرۋزيا, گەرمانيا, ۇلىبريتانيا جانە رەسەيدە دە وتكىزىپ, كورەرمەندەردىڭ ىستىق ىقىلاسىنا بولەندى. تاعى ءبىر ايتا كەتەرىلىگى, وسىدان ءبىراز جىل بۇرىن ۆيكتوردىڭ يسلام ءدىنىن قابىلداعانى بەلگىلى. سونداي-اق ول قازاق تىلىندە ەمىن-ەركىن سويلەيدى.
الاتاۋ باۋرايىندا ورنالاسقان اسەم شاھاردا وتەتىن ءدۇبىرلى دودادا ۆيكتور كوتوچيگوۆتان بولەك, بىلىكتى باسشى, ىسكەر ازامات اسقار سالىقباەۆ جەتەكشىلىك ەتەتىن «MTK Global Kazakhstan» كومپانياسىنىڭ قۇرامىنداعى قىراندار – ەسكەندىر حارسان, اباي تولەش, راي سەيىتجانوۆ, ەلشات نىعمەتوللا, نۇرتاس اجبەنوۆ, سۇلتان زاۋىربەك, ءميراسالى سارسەنوۆ جانە نۇردوس تولەباي ونەر كورسەتەدى. سونىمەن قاتار سول كەشتە ريو وليمپياداسىنىڭ جەڭىمپازى, الەم جانە ازيا چەمپيوناتتارىنىڭ كۇمىس جۇلدەگەرى, وزبەكستاننىڭ جارقىن جۇلدىزى فازليددين گايبنازاروۆ, كاسىپقوي رينگتەگى 13 كەزدەسۋىنىڭ بارلىعىندا جەڭىسكە جەتكەن (8 نوكاۋت) نيگەريانىڭ «قارا مارجانى» اليۋ باميدەلە لاسيزي جانە 36 باسەكەنىڭ تەك تورتەۋىندە عانا جەڭىلگەن وڭتۇستىك افريكا رەسپۋبليكاسىنىڭ وعلانى حەككي بۋدلەر دە كۇش سىناسادى.
– «MTK Global Kazakhstan» مەنەدجەرلىك كومپانياسى بيىلعى جىلى عانا قۇرىلدى. سوعان قاراماستان ءبىز قىسقا عانا مەرزىم ارالىعىندا ءبىراز شارۋا تىندىردىق دەپ ەش قىمسىنباي ايتا الامىن. ماسەلەن, دۋباي, نۇر-سۇلتان جانە الماتى قالالارىندا دۇركىرەگەن دودالار وتكىزدىك. سول باسەكەلەردىڭ بارلىعىندا قازاقتىڭ قايسار جىگىتتەرى ءوز ونەرلەرىن ورتاعا سالدى. ولار ءۇشىن بۇل – ۇلكەن تاجىريبە مەكتەبى. ءبىز ءوز قاتارىمىزعا اركەز مىقتى ماماندار مەن جالىندى جاستاردى تارتۋعا تىرىسامىز. بىلعارى قولعاپ شەبەرلەرىنىڭ ەش الاڭسىز جاتتىعۋىنا, جەكپە-جەكتەر وتكىزۋ ارقىلى رەيتينگتە جوعارىلاۋىنا بارىنشا جاعداي جاساپ وتىرمىز. ونداعى باستى ماقسات – كاسىپقوي بوكستى سەرىك ەتكەن قازاق ەلى ورەندەرىنىڭ الەمدىك ارەنالارعا شىعۋىنا داڭعىل جول اشۋ. ءوز وتانداستارىمىزدىڭ تانىمالدىلىعىن ارتتىرۋ ماقساتىندا ايگىلى ESPN ارناسىمەن تىعىز قارىم-قاتىناس ورناتىپ, ورتاق مامىلەگە كەلدىك. وسىعان دەيىن تمد اۋماعىنداعى بىردە-ءبىر مەملەكەت ونداي كەلىسىمگە قول جەكىزە الماعان ەدى. ال ءبىز امەريكالىق ارنانى ەكىنشى مارتە قازاقستانعا اكەلىپ وتىرمىز. وسىلاي تىزبەكتەي بەرسەك, ءبىراز جۇمىس اتقارعانىمىزدى ايقىن اڭعارۋعا بولادى. بىراق ءبىز وسى شارالارمەن عانا شەكتەلىپ قالمايمىز. قازاقستاننىڭ كاسىپقوي بوكسىن دامىتىپ, جاڭا بەلەستەرگە شىعۋ ءۇشىن الدا ءالى دە اتقارىلۋعا ءتيىس شارۋالار شاش-ەتەكتەن, – دەيدى اتالعان كومپانيانىڭ جەتەكشىسى اسقار سالىقباەۆ مىرزا.
سونىمەن 16 جەلتوقساندا الماتىداعى بالۋان شولاق اتىنداعى مادەنيەت جانە سپورت سارايىندا وتەتىن بوكس كەشىندە قازاقستاننىڭ تۋى استىندا كىمدەردىڭ ونەر كورسەتەتىنىن ءبىز جوعارىدا تولىق باياندادىق. ال ەندى ولاردىڭ كىمدەرمەن جۇدىرىقتاساتىندارى جايىنداعى اقپاراتتى تاياۋ كۇندەرى جاريالايمىز.
الماتى