كەزدەسۋ بارىسىندا جاس كوشباسشىلار نۇرسۇلتان نازارباەۆقا وزدەرىنىڭ جەتىستىكتەرى مەن ءتۇرلى سالالارداعى جاڭالىقتارى تۋرالى ايتىپ بەردى. بۇل تۋرالى elbasy.kz حابارلادى.
ادامي كاپيتالدى دامىتۋدىڭ ماڭىزدىلىعىن ايتا كەلە, قازاقستاننىڭ تۇڭعىش پرەزيدەنتى جاھاندىق دامۋدىڭ زاماناۋي قاتەرلەرى مەن الەمدىك ترەندتەرىنە توقتالدى.
سونىمەن بىرگە, نۇرسۇلتان نازارباەۆ جاستارعا ودان ءارى وسۋگە تەڭ جاعداي جاساۋ ءۇشىن قولعا الىنىپ جاتقان شارالار تۋرالى ايتتى.
– جاستار جىلى اياسىندا تالانتتى جانە قابىلەتتى جاس قازاقستاندىقتاردى قولداۋعا باعىتتالعان «ەل Yمiتi» باستاماسىن ۇسىندىم. بۇل باستامانى تۇڭعىش پرەزيدەنت قورى قولعا الىپ, مەملەكەتتىك ورگاندارمەن تىعىز بايلانىستا جۇمىس ىستەپ جاتىر. قازىر قور اۋقىمدى ترانسفورماتسيا كەزەڭىن وتكەرۋدە. قور ءبىلىم بەرۋ, الەۋمەتتىك دامۋ جانە جاستار باستامالارىن جان-جاقتى قولداۋ قۇرىلىمىنا اينالادى, - دەدى ەلباسى.
اڭگىمە بارىسىندا نۇرسۇلتان نازارباەۆ «ەل Yمiتi» باستاماسى اياسىندا الداعى اتقارىلاتىن جۇمىستاردىڭ ماڭىزدى باعىتتارىنا توقتالدى.
– ءبىز ستۋدەنتتەردىڭ قابىلەتتەرى مەن كاسىبي باعدارىن انىقتايتىن كەشەندى جۇيە قۇرامىز. 2020 جىلى بارلىق وڭىرلەردە وقۋشىلاردىڭ قابىلەتتەرى مەن كاسىپتىك باعدارىن ەرتە انىقتايتىن ارنايى ورتالىقتار اشىلادى. وندا دارىندى بالالاردىڭ قابىلەتىن دياگنوستيكالاۋدىڭ ۇزدىك الەمدىك تاجىريبەگە نەگىزدەلگەن زاماناۋي ادىستەرى قولدانىلاتىن بولادى, - دەدى قازاقستاننىڭ تۇڭعىش پرەزيدەنتى.
سونداي-اق, ەلباسى جاقىن ارادا ەلوردادا ۇزدىك ءبىلىم بەرۋ رەسۋرستارىنا قولجەتىمدىلىكتى قامتاماسىز ەتەتىن بولاشاق ماماندىقتاردىڭ ورتالىعى مەن ارنايى اقپاراتتىق الاڭ قۇرىلاتىنىن ايتتى.
جيىن بارىسىندا نۇرسۇلتان نازارباەۆ اۋىل مەكتەپتەرىن قولداۋ بويىنشا جوسپارلانعان شارالارعا توقتالدى. ماسەلەن, تۇڭعىش پرەزيدەنت قورى باعدارلاماسى اياسىندا «مىڭ بالا» وليمپياداسى ۇيىمداستىرىلادى. ناتيجەسىندە اۋىل مەكتەپتەرىندەگى 1000 ۇزدىك وقۋشى تالانتتى بالالارعا ارنالعان «دارىن» مەكتەپتەرىندە ءبىلىمىن جالعاستىرۋعا مۇمكىندىك الادى.
سونىمەن قاتار, ارناۋلى باعدارلاما بويىنشا اۋىل مەكتەپتەرىنىڭ مودەرنيزاتسياسى جۇرگىزىلەتىن بولادى. 2020 جىلى ءبىرىنشى كەزەڭدە 14 مەكتەپ تاڭدالادى.
– باعدارلاما اياسىندا وسى مەكتەپتەردىڭ پەداگوگتارى رەسپۋبليكالىق ينتەللەكتۋالدىق مەكتەپتەر مەن جەتەكشى حالىقارالىق ۋنيۆەرسيتەتتەردە وقىتۋدىڭ زاماناۋي ادىستەرىن مەڭگەرەدى, - دەدى قازاقستاننىڭ تۇڭعىش پرەزيدەنتى.
ەلباسى جاس كوشباسشىلار توبىن قۇرۋ پروتسەسىنە دە ەرەكشە نازار اۋداردى.
– ءبىز كوشباسشىلىق قاسيەتتەردى دامىتۋ, سونداي-اق, وسكەلەڭ ۇرپاقتىڭ بويىندا ءپاتريوتيزمدى كۇشەيتۋ ءۇشىن ارنايى جوبانى قولعا الدىق. جاستاردى ءوزىن-ءوزى دامىتۋعا جانە جەتىستىككە جەتەلەيتىن مۇنداي باعدارلامالار الەمدە وتە تانىمال. جاڭا باعدارلامادا 7 باعىت قامتىلادى: فيزيكالىق دامۋ, تۇلعالىق قاسيەتتەردى دامىتۋ, كىتاپ وقۋ, ەرىكتىلەردىڭ قىزمەتىنە اتسالىسۋ, ەكسپەديتسيالار مەن ساپارلارعا قاتىسۋ, ۇلتتىق مۇرانى ساقتاۋ جانە تاجىريبە جيناۋ, - دەدى نۇرسۇلتان نازارباەۆ.
سونىمەن بىرگە, قازاقستاننىڭ تۇڭعىش پرەزيدەنتى ەكونوميكانىڭ ءتۇرلى سالالارىندا ماماندار دايارلاۋدىڭ ماڭىزدىلىعىن اتاپ ءوتتى.
– باستى تالاپ – ۇزدىك ءبىلىم مەن الەمدىك جەتەكشى كومپانيالاردا جيعان تاجىريبە عانا ەمەس, سونداي-اق, توپتا جۇمىس ىستەۋ, كۇردەلى مىندەتتەرگە جاۋاپكەرشىلىكپەن قاراۋ جانە جۇمىستى سوڭىنا دەيىن جەتكىزۋ شەبەرلىگى. باعدارلاما بويىنشا ىرىكتەۋدەن وتكەن ءار مامان وزگەرىستەردى باسقارۋ مەنەدجەرى دەڭگەيىنە دەيىن وقىتىلادى - دەدى ەلباسى.
ءسوز سوڭىندا نۇرسۇلتان نازارباەۆ بارشا قازاقستاندىقتاردى «ەل ءۇمىتى» باستاماسىن ىسكە اسىرۋعا بەلسەنە قاتىسۋعا شاقىردى.
– بۇل باستاماعا بۇكىل قوعام, اسىرەسە, اعا بۋىن ءبىر كىسىدەي اتسالىسسا, ناتيجەلى بولاتىنىنا سەنىمدىمىن. ۇستازدار قاۋىمى مەن شىعارماشىلىق ينتەلليگەنتسيانى وسى جوبالاردى قولداۋعا شاقىرامىن, - دەدى قازاقستاننىڭ تۇڭعىش پرەزيدەنتى.