ورتالىق كوممۋنيكاتسيالار قىزمەتىنىڭ الاڭىندا ءبىلىم جانە عىلىم ۆيتسە-ءمينيسترى رۇستەم بيعاري جانە «حالىقارالىق باعدارلامالار ورتالىعى» اق پرەزيدەنتى اينۇر كارىبوزوۆانىڭ قاتىسۋىمەن «بولاشاق» حالىقارالىق ستيپەندياسىن كەزەكتى ۇمىتكەرلەرگە تاعايىنداۋ ناتيجەلەرى بويىنشا ءباسپاسوز كونفەرەنتسياسى ءوتتى.
مەملەكەتتىك حاتشىسى ق.كوشەرباەۆتىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى وتكەنى بەلگىلى. كوميسسيا شەشىمىمەن 234 ۇمىتكەرگە ستيپەنديا تاعايىندالدى. ولار ماگيستراتۋرا مەن دوكتورانتۋرادا ءبىلىم الادى, سونداي-اق الەمنىڭ جەتەكشى عىلىمي جانە وندىرىستىك ۇيىمدارىنا تاعىلىمداماعا جىبەرىلەتىن بولادى.
بيىل وتكەن رەسپۋبليكالىق كوميسسيانىڭ ەكى وتىرىسىنىڭ قورىتىندىسى بويىنشا 1245 ۇمىتكەردىڭ 321-ءى «بولاشاق» حالىقارالىق ستيپەندياسىنىڭ يەگەرلەرى اتاندى. ۇلەستىرىلگەن ستيپەنديانىڭ 92%-ى ماگيستراتۋرا باعدارلامالارى, 8%-ى دوكتورانتۋرا بويىنشا تاعايىندالدى.
ستيپەندياتتاردى ساناتتار بويىنشا بولسەك, مەملەكەتتىك قىزمەتكەرلەر – 21, بۇقارالىق اقپارات قۇرالدارى قىزمەتكەرلەرى – 4, ءوز بەتىمەن تۇسكەندەر – 200, ينجەنەرلىك-تەحنيكالىق قىزمەتكەرلەر – 12, جالپى كونكۋرس – 65, عىلىمي-پەداگوگيكالىق قىزمەتكەرلەر – 19 ادامدى قۇرايدى.
ستيپەندياتتاردى ەلدەر بويىنشا اتاساق, اۆستراليادا – 4, ۇلىبريتانيادا – 242, كانادادا – 4, يتاليادا – 7, اقش-تا – 54, گەرمانيادا – 2, بەلگيادا – 2, رەسەيدە – 4, ال نيدەرلاندىدا – 2 ستۋدەنت ءبىلىم الۋدا.
2020 جىلدان باستاپ «بولاشاق» حالىقارالىق ستيپەندياسىن جۇزەگە اسىرۋدىڭ جاڭا تاسىلدەرى ەنگىزىلمەك. ولار كونكۋرستىق ىرىكتەۋدى جۇرگىزۋ تەتىكتەرىن جەتىلدىرۋدى جانە اۆتوماتتاندىرۋدى, ونىڭ كەزەڭدەرىن قىسقارتۋدى, شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ جۇمىسىن وڭتايلاندىرۋدى, جۇمىس ورگانىنىڭ جاۋاپكەرشىلىگىن ارتتىرۋدى كوزدەيدى.
بۇدان باسقا, ستيپەندياتتاردى وقىتۋعا بايلانىستى بارلىق اكادەميالىق پروتسەستەر قوسىمشا رەتتەلەتىن بولادى.
اقپارات ءۇشىن:
«بولاشاق» حالىقارالىق باعدارلاماسى جۇزەگە اسىرىلىپ جاتقان 26 جىلدىڭ ىشىندە 13 870 ستيپەنديا تاعايىندالدى. ونىڭ ىشىندە 1994 جىلدان 2004 جىلعا دەيىن – 785 ستيپەنديا, 2005 جىلدان 2019 جىلعا دەيىن – 12 851 ستيپەنديا ءبولىندى. ونىڭ 3 379-ى باكالاۆريات, 6 951-ءى ماگيستراتۋرا, 35-ءى اسپيرانتۋرا, 87-ءسى كلينيكالىق ورديناتۋرا جانە 332-ءسى دوكتورانتۋرا باعدارلاماسى بويىنشا وقۋ, 2 067-ءسى تاعىلىمدامادان ءوتۋ ءۇشىن بەرىلدى.
وسى ۋاقىتقا دەيىن بارلىعى 10 854 مامان دايارلاندى. تۇلەكتەردىڭ جالپى سانىنىڭ 54,3%-ى الەۋمەتتىك-گۋمانيتارلىق ماماندىقتار, 36,7% – ينجەنەرلىك-تەحنيكالىق, 7,2% – مەديتسينالىق جانە 1,8% – شىعارماشىلىق ماماندىقتار بويىنشا وقۋلارىن اياقتادى.
بۇگىنگى كۇنى 6 943 تۇلەك وزدەرىنىڭ شارتتىق مىندەتتەمەلەرىن ورىندادى. ولاردىڭ ىشىندە ەڭبەكپەن قامتۋ مونيتورينگىندە تۇرعاندارى – 3 374, ديپلوم كۇتىپ وتىرعاندارى – 388, ەڭبەك ارقىلى جۇمىس ىستەۋ بولىگىندە شارتتىق مىندەتتەمەلەردى ورىنداۋ كەيىنگە قالدىرىلعاندار (وقۋعا, بالا كۇتىمىنە جانە ت.ب. بايلانىستى) سانى – 150 ادامدى قۇرايدى.
قازىرگى تاڭدا «بولاشاق» باعدارلاماسىمەن الەمنىڭ بىرنەشە ەلىندە 1199 ستيپەنديات ءبىلىم الىپ جاتىر. ولاردىڭ 7-ەۋى باكالاۆريات, 1016-سى ماگيستراتۋرا, 137-ءسى دوكتورانتۋرا باعدارلامالارى بويىنشا, ال 39-ى تاعىلىمدامادان وتۋدە. ستيپەندياتتار سانى جاعىنان ۇلىبريتانيا مەن يرلانديادا – 44,8%, اقش پەن كانادادا – 41,5%, قۇرلىقتىق ەۋروپا ەلدەرىندە – 6,4%, ازيا جانە تىنىق مۇحيتى ەلدەرىندە – 5,5%, رەسەي فەدەراتسياسىندا – 2,2%-عا تەڭ.