اسقار مامين ۋاكىلەتتى مينيسترلىكتەردىڭ, «اتامەكەن» ۇلتتىق كاسىپكەرلەر پالاتاسىنىڭ (ۇەپ) باسشىلارى مەن قر قۇرىلىس بيزنەسى وكىلدەرىنىڭ قاتىسۋىمەن قۇرىلىس سالاسىن دامىتۋ ماسەلەلەرى جونىندە كەڭەس وتكىزدى. بۇل تۋرالى primeminister.kz حابارلادى.
«قۇرىلىس سەكتورى – قازاقستان ەكونوميكاسىنىڭ ءوسىمى مەن ونى ءارتاراپتاندىرۋدىڭ نەگىزگى درايۆەرلەرىنىڭ ءبىرى. بۇگىندە قازاقستاندىق قۇرىلىس كومپانيالارىنىڭ باسەكەگە قابىلەتتىلىگى جەتكىلىكتى, ولار قۇزىرەتتەرىن ارتتىرىپ, حالىقارالىق نارىقتارعا شىعۋى, قۇرىلىس ماتەريالدارىن عانا ەمەس, كورسەتەتىن قىزمەتتەرىن دە ەكسپورتتاۋى قاجەت», — دەدى ا. مامين.
قۇرىلىس سەكتورىنىڭ ءوسىم قارقىنى بيىلعى 10 ايدىڭ قورىتىندىسى بويىنشا 12,7% قۇرادى. ەلىمىزدىڭ ءجىو قۇرىلىمىنداعى سالانىڭ ۇلەسى 5,5% قۇرايدى. قۇرىلىس سالاسى حالىقتى جۇمىسپەن قامتۋ تۇرعىسىنان ەڭ ءىرى سالالاردىڭ ءبىرى, مۇندا 641,4 مىڭ ادام جۇمىس ىستەيدى. بۇگىنگى تاڭدا قازاقستاندا نەگىزگى قۇرىلىس ماتەريالدارىنىڭ ءوندىرىسى رەتكە كەلتىرىلگەن.
كەڭەستە قۇرىلىس ماتەريالدارىنىڭ وتاندىق وندىرۋشىلەرىن قولداۋ جانە قۇرىلىس يندۋسترياسىنداعى قازاقستاندىق قامتۋ ۇلەسىن ارتتىرۋ, ساۋلەت, قالا قۇرىلىسى جانە قۇرىلىس قىزمەتى, مەملەكەتتىك باقىلاۋ جانە تەحنيكالىق قاداعالاۋ سالاسىنداعى زاڭنامالىق بازانى جەتىلدىرۋ جونىندەگى شارالار قارالدى.