بيىل بۇل ماقساتقا رەسپۋبليكالىق جانە وبلىستىق بيۋدجەتتەن بارلىعى 21,6 ميلليارد تەڭگە بولىنگەن, ناتيجەسىندە 411 شاقىرىم جول جوندەۋدەن ءوتتى. الايدا, ۇكىمەت جول جوندەۋگە قاجەت قارجىنىڭ تەك 50 پروتسەنتىن بولەدى, قالعانى وبلىستىق بيۋدجەتتەن قاراستىرىلۋى ءتيىس. ال بۇل ءوڭىردىڭ بيۋدجەتىنە سالماق سالىپ وتىر. Nur Otan پارتياسى دەپۋتاتتار فراكتسياسىنىڭ جيىنىندا وسى ماسەلە كوتەرىلدى.
بيىل وبلىستىق ماڭىزداعى جولداردى جوندەۋ جۇمىستارى ءوز دەڭگەيىندە جۇرگىزىلىپ, وعان بولىنگەن 21,6 ميلليارد تەڭگە كولەمىندەگى قوماقتى قاراجات يگەرىلدى. ناتيجەسىندە جەرگىلىكتى ماڭىزداعى جانە ەلدى مەكەندەردىڭ ىشكى جولدارىنىڭ 411 شاقىرىمى جوندەۋدەن ءوتتى. ءسويتىپ, جولداردىڭ 71 پايىزى جاقسى جانە قاناعاتتانارلىق جاعدايدا دەگەن كورسەتكىشكە قول جەتكىزىلىپ وتىر.
– 2025 جىلعا دەيىن جەرگىلىكتى ماڭىزداعى جولداردى جوندەۋ كورسەتكىشىن 95 پروتسەنتكە جەتكىزۋ كوزدەلىپ وتىر. 2020 جىلعا دەيىن ەلورداعا جاقىن ورنالاسقان ەلدى مەكەندەردىڭ الەۋمەتتىك-ەكونوميكالىق دامۋىنىڭ كەشەندى جوسپارىن ورىنداۋعا 408 ميلليارد تەڭگە ءبولىندى. وعان 55 شاقىرىمدى قۇرايتىن جولدى جوندەۋى قاراستىرىلعان. تسەلينوگراد اۋدانىنا قاراستى تالاپكەر اۋىلىنىڭ كوشە جولدارىن جوندەۋگە 1 ميلليارد تەڭگەدەن اسا قارجى قاراستىرىلعان. سول سياقتى, نۇرەسىل, اقمول اۋىلدارىنىڭ جولدارىنا دا, ارشالى اۋدانىنىڭ جىبەك جولى اۋىلىنىڭ جولدارىنا دا ءبىرشاما قاراجات جۇمسالدى, – دەيدى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ارسەن جاڭعاسقانوۆ.
ەلوردا ماڭىنداعى ەلدى-مەكەندەردەگى جولداردى قالپىنا كەلتىرۋ بۇگىندە وبلىستىڭ بيۋدجەتىنە سالماق ءتۇسىرىپ وتىر. سوندىقتان, دەپۋتات نارتاي ىسقاقوۆ ۇكىمەتكە حات جازىپ, جول جوندەۋگە رەسپۋبليكالىق بيۋدجەتتەن بولىنەتىن قارجىنى كوبەيتىپ, وبلىس بيۋدجەتىنە تۇسەتىن سالماقتى ازايتۋ قاجەت دەگەن ۇسىنىسىن جاسادى. بۇل پىكىر حالىق قالاۋلىلارى تاراپىنان قولداۋ تاپتى. جيىنعا قاتىسقان ءار اۋداننىڭ دەپۋتاتتارى ءوز ايماقتارىنداعى جولداردىڭ جوندەلۋىنە قاتىستى ساۋالدارىن جولدادى.
كوكشەتاۋ قالاسى