بۇگىن 103 جاسقا قاراعان شاعىندا كورنەكتى تەاتر جانە كينو اكتريساسى, ساڭلاق ساxناگەر, قازاقستاننىڭ حالىق ءارتيسى, «پاراسات», «قۇرمەت بەلگىسى», « ۇلى وتان سوعىسىنىڭ ارداگەرى» وردەندەرىنىڭ يەگەرى ايشا ابدۋللينا ومىردەن ءوتتى. بۇل تۋرالى ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ديرەكتورى, قازاقستان تەاترلار اسسوتسياتسياسىنىڭ ۆيتسە-پرەزيدەنتى اسحات ماەميروۆ حابارلادى.
كورنەكتى ساحنا شەبەرى ا.ابدۋللينا 1916 جىلى الماتى قالاسىندا دۇنيەگە كەلگەن. 1935 جىلى قازاق مەملەكەتتىك دراما تەاترى جانىنداعى 2 جىلدىق ستۋديانى اياقتاپ, قازاق ونەرىنىڭ قارا شاڭىراعى م.اۋەزوۆ اتىنداعى اكادەميالىق دراما تەاترىندا شىعارماشىلىق ەڭبەك جولىن باستايدى. 1936 جىلى ماسكەۋدە وتكەن قازاق ونەرى مەن مادەنيەتىنىڭ ون كۇندىگىندە جامبىلداي جىر الىبى, كۇلاش بايسەيىتوۆا, ق.جانداربەكوۆتەردىڭ جانىندا بىرگە ونەر كورسەتەدى. دەكادا قورىتىندىسى بويىنشا ي.ۆ.ءستاليننىڭ قولىنان «ەڭبەك قىزىل تۋ» وردەنىن الادى.
قازاق تەاتر ونەرىنىڭ تاريحىندا ايشا اپا تۇڭعىش رەت دەزدومانا بەينەسىن سومدادى. كەيىن شىمكەنت قالاسىنا قونىس اۋدارىپ ج.شانين اتىنداعى اكادەميالىق تەاترىندا 65 جىل بويى ءۇزىلىسسىز اكتريسا بولىپ قىزمەت ەتتى. ورىنداۋشىلىق دياپازونى كەڭ اكتريسا ۇلتتىق دراماتۋرگيا بەن الەمدىك كلاسسيكانىڭ جاۋhارلارىندا ءبىر-بىرىنە ۇقسامايتىن 100-دەن اسا ساxنالىق بەينەلەردى سومداپ, ايەلدەر بەينەسىنىڭ تولىققاندى گالەرەياسىن جاسادى. سولاردىڭ ىشىندەگى ايشا ابدۋللينا اپامىزدىڭ ونەردەگى بويتۇمارى - ەڭلىك, قىز جىبەك, دەزدەمونا بەينەلەرى بار.
ونەر الەمىندە قول جەتكىزگەن جەتىستىكتەرى مەن ەرەن ەڭبەگى, شىعارماشىلىق جولى - جاس بۋىن ءۇشىن جارقىن ۇلگى بولا بىلگەن ايشا ابدۋليننانىڭ ءبىر عاسىرلىق مەرەيتويى ەلوردادا, الماتى مەن شىمكەنت قالالارىندا سالتاناتتى تۇردە اتاپ ءوتىلىپ, ايشا اپا حالقىنا اق باتاسىن بەرىپ, ءان مەن جىردان شاشۋ شاشتى.
ۇزاق جىلعى ونەر مەن مادەنيەت سالاسىنا سىڭىرگەن ەڭبەگى ءۇشىن قر تۇڭعىش پرەزيدەنتى - ەلباسىنىڭ مەملەكەتتىك ستيپەندياسىنا يە بولدى. «وڭتۇستىك قازاقستان وبلىسىنىڭ قۇرمەتتى ازاماتى» اتاعىنا يە بولدى.
«قازاق تەاتر ونەرىنىڭ تاريحىندا ەڭ ۇزاق جاساعان اكتريسا ايشا اپامىزدىڭ اق باتاسىن العان, تالاي سىرلاس, داستارحانداس بولعان ونەردەگى جاقسى كورگەن بالالارىنىڭ ءبىرى بولعانىما ريزامىن. ايشا ابدۋللينانىڭ ۇرپاعىنا, تۋما-تۋىسقاندارى, ارىپتەستەرىنە قايعىرىپ كوڭىل ايتامىن. ايشا اپامىزدىڭ ونەردەگى ادالدىق پەن تازالىقتى تۋ ەتكەن جارقىن بەينەسى, ادامي كەلبەتى - جۇرەگىمىزدە ساقتالادى. يمانىڭ جولداس بولعاي, ايشا اپا!», دەلىنگەن حابارلامادا.
قوشتاسۋ ءراسىمى 28 قاراشا كۇنى, ساعات 09.00-دە م.اۋەزوۆ تەاترىندا وتەدى.