بۇگىن بىشكەك قالاسىندا حالىقارالىق تۇركى اكادەمياسىنىڭ مۇرىندىق بولۋىمەن «بەكەم باۋىرلاستىق بايلانىستار» اتتى قازاق-قىرعىز زيالىلارىنىڭ IV فورۋمى ءوتتى.
مەملەكەت باسشىسى قاسىم-جومارت توقاەۆتىڭ قىرعىستانعا مەملەكەتتىك ساپارى قارساڭىندا وتكەن جيىنعا قر پرەزيدەنتىنىڭ كومەكشىسى ماۋلەن اشىمباەۆ, قىرعىز رەسپۋبليكاسى پرەزيدەنتىنىڭ كەڭەسشىسى سۇلتان راەۆ, ەكى ەلدىڭ بىلىكتى عالىمدارى, تانىمال قوعام قايراتكەرلەرى, رۋحانياتىنىڭ بەلدى وكىلدەرى قاتىستى. القالى جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى مودەراتور بولدى.
جيىننىڭ بەتاشارىندا ءسوز العان پرەزيدەنت كومەكشىسى ماۋلەن اشىمباەۆ:
– وزدەرىڭىزبەن وسىنداي القالى جيىندا كەزدەسكەنىمە قۋانىشتىمىن! ەڭ الدىمەن, بارشاڭىزدى قازاق-قىرعىز زيالىلارىنىڭ IV فورۋمىنىڭ اشىلۋىمەن قۇتتىقتايمىن! قازاق پەن قىرعىز – ءبىر-بىرىنە باۋىرلاس حالىقتار. الاتاۋدىڭ قوس بوكتەرىن جايلاعان ەكى ەلدىڭ ءدىلى مەن ءدىنى ورتاق, ءتىلى دە وتە ۇقساس. قىرعىزستان – ءبىز ءۇشىن تەك كورشى عانا ەمەس, سونىمەن بىرگە باۋىرلاس, تاريحى تامىرلاس مەملەكەت. ۇلى اباي: «ەش قازاق قىرعىز بەن قازاقتىڭ ءبىر تۇقىمداس ەكەنىنە تالاسپايدى», دەگەن. قىرعىزدىڭ اتاقتى اقىنى مولدا قىلىش تا «قىرعىز-قازاق – الاشتان» دەپ, ەگىز ەلدىڭ بىرلىگىن جىرلاعان. سوندىقتان تاعدىرى ۇندەس ەلدەرىمىز ءاردايىم ءبىر-بىرىنە قولداۋ كورسەتىپ كەلەدى,– دەپ اتاپ ءوتتى.
ماۋلەن اشىمباەۆ تاۋەلسىزدىك العان كۇننەن باستاپ ءوزارا بايلانىستى تەرەڭدەتۋگە ەكى ەلدە دە باسا ءمان بەرىلىپ كەلە جاتقانىنا توقتالدى.
– بۇل ماسەلە قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ باستى نازارىندا بولدى. ناتيجەسىندە, ەكى مەملەكەت اراسىندا ماڭگىلىك دوستىق تۋرالى شارتقا قول قويىلدى. ەرتەڭ قازاقستان پرەزيدەنتى قاسىم-جومارت كەمەل ۇلى توقاەۆ قىرعىزستانعا مەملەكەتتىك ساپارمەن كەلەدى. قىرعىزستاننىڭ پرەزيدەنتى سوورونباي شاريپ ۇلى جەەنبەكوۆپەن كەزدەسىپ, ەكى مەملەكەت باسشىلارى ەلدەرىمىز اراسىنداعى قارىم قاتىناستاردى ءارى قاراي دامىتۋ ماسەلەسىن تالقىلايدى. بۇل – ەكى ەل اراسىنداعى ىنتىماقتاستىقتى جاڭا دەڭگەيگە كوتەرەتىن ماڭىزدى ساپار بولادى دەپ سەنەمىز. سونىڭ بارىسىندا ءوزارا ءتيىمدى كەلىسىمدەرگە قول جەتكىزىلەدى دەپ كۇتىلۋدە. وسى رەتتە ەكى جاقتى بايلانىستاردى نىعايتۋ ىسىندە زيالى قاۋىم وكىلدەرى دە ماڭىزدى ءرول اتقاراتىنىن اتاپ وتكەن ءجون. پرەزيدەنتتەرىمىزدىڭ كەزدەسۋىنىڭ الدىندا ءوتىپ وتىرعان بۇگىنگى فورۋم – سونىڭ ايقىن دالەلى. بۇل – قازاق پەن قىرعىزدىڭ دوستىق قاتىناستارىن ودان ءارى نىعايتۋعا باعىتتالعان باسقوسۋ, – دەدى م.اشىمباەۆ.