ۇرجارداعى ۇلگىلى شارا

جاقىندا ءۇرجار اۋدانىندا «جان جىلۋى - جانۇياعا» اتتى اكتسيا ءوتتى.  

بارقىتبەل باۋرايىنداعى باسپاناسى جوق نەمەسە پاتەر جالداپ تۇرىپ جاتقان جانداردىڭ ءۇيلى بولۋىنا ۇلەس قوسۋ ماقساتىندا ۇيىمداستىرىلعان شاراعا اۋدان باسشىلىعىنان باستاپ, قاراپايىم تۇرعىندارعا دەيىن بەلسەنە قاتىستى.

«دانا حالقىمىزدىڭ «قايىرىمدىلىق جاساساڭ, قايىرىن ءوزىڭ كورەسىڭ» دەگەن قاناتتى ءسوزى بار. قايىرىمدىلىق جاساۋ, جابىرقاعاننىڭ جانىنان تابىلۋ, شاراسىزعا كومەك قولىن سوزۋ – حالقىمىزدىڭ قانىنا بىتكەن اسىل قاسيەتتەرىنىڭ ءبىرى. بۇگىن ء«ار قازاق مەنىڭ جالعىزىم» دەپ جۇرەگى سوعاتىن جانداردىڭ قايىرىمدىلىق مەرەكەسى. قازىرگى ۋاقىتتا ەلىمىزدە ەلباسى مەن پرەزيدەنت قاسىم-جومارت توقاەۆتىڭ ءتيىستى تاپسىرمالارىنا سايكەس كوپ بالالى جانە الەۋمەتتىك جاعىنان از قامتىلعان وتباسىلاردى قولداۋ شارالارى كەشەندى تۇردە جۇزەگە اسىرىلىپ جاتقان بەلگىلى. ءبىزدىڭ اۋدان جۇرتشىلىعى بۇعان دەيىن دە «جان جىلۋى - جانۇياعا» اكتسياسىن كەڭ كولەمدە وتكىزىپ, اكتسيا ناتيجەسى بويىنشا اۋدانىمىزدىڭ 28 وتباسىن جانە وبلىستىق «پارىز» قورى ارقىلى 20 وتباسىن, جەرگىلىكتى بيۋدجەت ارقىلى قوسىمشا 2 وتباسىن, بارلىعى 50 وتباسىن باسپانامەن قامتاماسىز ەتكەن بولاتىنبىز. وبلىس اكىمى دانيال احمەتوۆتىڭ باسشىلىعىمەن الەۋمەتتىك جاعىنان از قامتىلعان كوپ بالالى وتباسىلارىن قولداۋ ماقساتىندا كەشەندى ءىس-شارالار جوسپارى قولعا الىندى. اتاپ ايتساق, كوپ بالالى وتباسىلاردىڭ بالالارى بالاباقشاعا تەگىن بارىپ, مەكتەپتە تەگىن ىستىق تاماق ءىشىپ, مەكتەپ فورماسىن تەگىن الىپ, وبلىسىمىزداعى ارناۋلى كاسىپتىك ءبىلىم بەرەتىن وقۋ ورىندارىندا تەگىن وقۋ ءۇشىن ءتيىستى قارجى ءبولىندى. كوپكە ۇلگى بولارلىق قايىرمدىلىق اكتسياسىن وبلىس بويىنشا العاشقىلاردىڭ ءبىرى بولىپ اۋدانىمىزدا 2-ءىنشى مارتە وتكىزدىك. بۇل باستاما ءالى دە ءوز جالعاسىن تاۋىپ, ەلىمىزدىڭ تۇكپىر-تۇكپىرىندە جەمىستى ەڭبەك ەتىپ جۇرگەن ايتۋلى جەرلەستەرىمىز تاراپىنان قولداۋ تابا بەرەتىندىگىنە كامىل سەنەمىز. بۇگىنگى يگى ىسكە قاتىسىپ, مۇمكىندىگىنشە كومەك قولدارىن سوزىپ, جۇرەك جىلۋلارىن ارناعان بارشا ازاماتتارعا, جەرلەستەرىمىزگە ەرەكشە ريزاشىلىعىمدى بىلدىرەمىن» دەدى اكتسيانىڭ اشىلۋىندا ءسوز العان اۋدان اكىمى سەرىك زاينۋلدين.

شارا بارىسىندا 2019 جىلدىڭ 27 ناۋرىزى كۇنى وتكەن «جان جىلۋى - جانۇياعا» اكتسياسىنىڭ قورىتىندىسى بويىنشا ازىرلەنگەن فيلم كورسەتىلدى.

«اكتسيا اياسىندا اۋدان اكىمى باستاپ, ورىنباسارلارى, اكىم اپپاراتى, ءبولىم باسشىلارى قوستاپ شاراعا ءوز ۇلەستەرىن قوستى. اۋداندىق ورتالىق مەشىتتىڭ باس يمامى نۇرزات قاجى قاسىم ۇلى, «اسىل مۇرا» اجەلەر ءانسامبلىنىڭ مۇشەسى باعي قاسپاقباەۆا ءسوز سويلەپ, كوپشىلىكتى مەيىرىمدىلىككە, جاقسىلىق جاساۋعا شاقىردى. سونىمەن قاتار قابانباي مادەنيەت ءۇيىنىڭ مەڭگەرۋشىسى, اقىن ايجارىق ابىلقاسىموۆ ارناۋ وقىدى. وبلىستىق, اۋداندىق ءماسليحات دەپۋتاتتارى مەن 27 اۋىلدىق وكرۋگ اكىمدەرى اكتسياعا قولداۋ ءبىلدىردى. بۇل رەتتە قاراتال, قارابۇتا, ماقانشى, قارابۇلاق اۋىلدارىن ەرەكشە اتاپ وتۋگە بولادى» دەيدى اۋدان اكىمىنىڭ ءباسپاسوز حاتشىسى نۇرسۇلتان ەسەمباەۆ. ونىڭ ايتۋىنشا, بۇل شارا اۋدانداعى 39 كوپ بالالى وتباسىنا قولداۋ كورسەتىپ, باسپانامەن قامتاماسىز ەتۋ جۇمىستارىن ودان ءارى جالعاستىرۋ ماقساتىندا ۇيىمداستىرىلىپتى.

شارا سوڭىندا اكتسيا قورىتىندىسىن اۋدان اكىمىنىڭ ورىنباسارى ءبىرجان تۇرلىبەكوۆ جاريا ەتىپ, ء«ۇرجار-قامقور» قورىنا 1 ميلليون, 600 مىڭ تەڭگەدەن استام, قايىرىمدىلىق جاشىگىنە 13 ميلليونعا جۋىق قارجى سالىنعانىن ايتىپ, جينالعان قاراجات كوپ بالالى وتباسىلاردى باسپانامەن قامتاماسىز ەتۋگە جۇمسالاتىنىن جەتكىزدى.

اۋداندىق الەۋمەتتىك باعدارلامالار جانە جۇمىسپەن قامتۋ ءبولىمىنىڭ مالىمەتتەرىنە سۇيەنسەك, ءۇرجاردا ۇزىن سانى 3060 كوپ بالالى انا تىركەلگەن ەكەن. ونىڭ ىشىندە 1169 وتباسى 18 جاسقا دەيىنگى بالالاردى تاربيەلەپ وتىر.

شىعىس قازاقستان وبلىسى,

ءۇرجار اۋدانى