كەشە اقوردادا مەملەكەتتىك حاتشى مارات ءتاجين ەلىمىزدىڭ ءۇزدىك جۋرناليستەرىنە قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارى مەن گرانتتارىن تابىس ەتتى, سونداي-اق العىسىن جاريالادى.
مەملەكەتتىك حاتشى ەلىمىزدىڭ بۇقارالىق اقپارات قۇرالدارى وكىلدەرىن كاسىبي مەرەكەلەرىمەن – بايلانىس جانە اقپارات قىزمەتكەرلەرى كۇنىمەن قۇتتىقتاي كەلە, ءتاۋەلسىزدىك جىلدارى وتاندىق اقپارات قۇرالدارى ۇلكەن جولدان وتكەنىن اتاپ كورسەتتى.
«بۇل ماراپات كاسىبي شەبەرلىگىمەن ەرەكشەلەنگەن ەڭ تاڭداۋلى جۋرناليستەرگە بەرىلەدى. ءباسپاسوز وكىلدەرىن ىنتالاندىرۋعا ارنالعان وسى شارا جىلداعى جاقسى داستۇرگە اينالدى. ءبىز ەلىمىزدىڭ بۇقارالىق اقپارات قۇرالدارىنىڭ دەڭگەيى بيىك جانە مەملەكەتشىل بولۋىنا مۇددەلىمىز. «حالىقتىڭ كوزى, قۇلاعى ءھام ءتىلى» دەپ احمەت بايتۇرسىنوۆ ايتقانداي, باسپاسوزدىڭ قوعامداعى ءرولى زور. باق قازىرگى جاھاندانۋ داۋىرىندە مەملەكەتتىلىكتى ساقتاۋعا, تاۋەلسىزدىكتى نىعايتۋعا, حالىقتى ورتاق ماقساتقا توپتاستىرۋعا ىقپال ەتۋگە ءتيىس», دەدى مەملەكەتتىك حاتشى ءوز سوزىندە.
سونداي-اق, ول ەلىمىزدەگى تىنىشتىق پەن تۇراقتىلىقتى ساقتاۋدا جۋرناليست قاۋىمعا جۇكتەلەر جاۋاپكەرشىلىك زور ەكەنىن, قازاق ەلىنىڭ ىرگەسى كەڭەيىپ, مارتەبەسىنىڭ ارتۋىنا دا جۋرناليستەر ۇلكەن ۇلەس قوسقانىن اتاپ ءوتتى.
«ءوزىنىڭ بەرىك ورنىن تاپقان كوشباسشىلار قالىپتاستى. مەدياكەڭىستىك قارقىندى دامۋىن جالعاستىرۋدا. سوڭعى ۋاقىتتا بىرنەشە رەسپۋبليكالىق تەلەارنالار اشىلعانىن بىلەسىزدەر. وتاندىق ينتەرنەت-رەسۋرستار سانى وتە جەدەل قارقىنمەن كوبەيىپ كەلەدى. سونداي-اق, ساپالى جاڭارۋ مىندەتى ءبىرىنشى ورىنعا شىقتى», دەدى مارات ءتاجين بۇل رەتتە.
بۇل كۇنى مەملەكەتتىك حاتشى قازىرگى زامانعى مەديا سالاسىندا بولىپ جاتقان وزگەرىستەرگە قاراماستان, جۋرناليستيكانىڭ نەگىزگى قۇندىلىقتارى بۇرىنعىسىنشا شىنايىلىق, دالدىك جانە بايىپتى اقپارات بولۋى ءتيىس ەكەنىن دە اتاپ ءوتتى. سونداي-اق, ول جۋرناليستەرگە ارنالعان پرەزيدەنت سىيلىعى مەن گرانتىنىڭ بۇدان 16 جىل بۇرىن تاعايىندالعانىن, جىل وتكەن سايىن بۇل بايقاۋدىڭ ماڭىزى مەن دەڭگەيىنىڭ ءوسىپ كەلە جاتقانىن العا تارتتى. «بيىل ۇمىتكەرلەرگە قويىلاتىن تالاپ ايتارلىقتاي ارتا ءتۇستى. سوندىقتان, ماراپاتقا بۇگىن ەڭ لايىقتى, ۇزدىك جۋرناليستەر مەن ۇجىمدار يە بولدى دەپ ەسەپتەيمىن», دەدى م. ءتاجين. وسى ورايدا بيىلدان باستاپ پرەزيدەنتتىك ناگرادانىڭ بەدەلىن جانە ءمانىن ارتتىرۋ ماقساتىندا جۋرناليستەرگە جىل سايىن ەكى سىيلىق جانە ەكى گرانت بەرىلەتىن بولسا, العىس ءتورت شىعارماشىلىق ۇجىمعا جاريالاناتىنىن اتاپ كورسەتكەن ءجون.
سونىمەن, بيىلعى جىلعى قازاقستان رەسپۋبليكاسى پرەزيدەنتىنىڭ سىيلىقتارىمەن «الاش ايناسى» گازەتىنىڭ باس رەداكتورى سەرىكبەك جانبولات, «ەۋرازيا» ءبىرىنشى ارناسىنىڭ باس ديرەكتورى سەرگەي كيسەلەۆ ماراپاتتالدى. قازاقستان رەسپۋبليكاسى پرەزيدەنتىنىڭ گرانتتارى «حابار» تەلەارناسىنىڭ اقپاراتتىق باعدارلامالار ءبولىمىنىڭ ءتىلشىسى ارتەم يستومينگە, «استانا» تەلەارناسىنىڭ ارناۋلى جوبالار ءبولىمىنىڭ پروديۋسەرى ايگەرىم ابىلديناعا بەرىلدى.
ال پرەزيدەنت العىسى «اقتيۋبينسكي ۆەستنيك» جانە «درۋجنىە رەبياتا» گازەتتەرىنىڭ شىعارماشىلىق ۇجىمدارىنا, سونىمەن قاتار, «الاۋ» تەلەراديوكومپانياسى مەن «Tengrinews.kz» اقپاراتتىق پورتالىنىڭ ۇجىمدارىنا جاريالاندى.
بۇل كۇنگى سالتاناتتى ءراسىم اياسىندا ماراپاتقا يە باق وكىلدەرى دە ءسوز الىپ, وزدەرىنە كورسەتىلگەن قۇرمەت ءۇشىن العىستارىن ءبىلدىردى. ماسەلەن, «الاش ايناسى گازەتىنىڭ باس رەداكتورى سەرىكبەك جانبولات مەملەكەت باسشىسىنىڭ ەلدىڭ باسەكەگە قابىلەتتىلىگىن ارتتىرۋ جونىندەگى ساياساتى قازىرگى بيىك تالاپتارعا ساي بولۋعا ءتيىستى وتاندىق بۇقارالىق اقپارات قۇرالدارى قىزمەتىنە دە قاتىستى ەكەنىن اتاپ ءوتتى. «مەملەكەت باسشىسىنا وسىنداي جوعارى ناگرادا ءۇشىن العىسىمدى بىلدىرەمىن. بۇل ءبىزدىڭ ۇجىمنىڭ عانا ەڭبەگى ەمەس, ەلىمىزدىڭ تاۋەلسىزدىگىن جانە ونىڭ ءوسىپ-وركەندەۋىن نىعايتۋعا باعىتتالعان بارشا قازاق جۋرناليستيكاسىنا كورسەتىلگەن قۇرمەت دەپ سانايمىن», دەدى س. جانبولات.
ال «الاۋ» تەلەراديوكومپانياسىنىڭ ديرەكتورى زۋلفيا ارەفەۆا كورسەتىلگەن قۇرمەت ءۇشىن العىسىن ايتا كەلە, قازىرگى ۋاقىتتا وتاندىق, ونىڭ ىشىندە وڭىرلىك جۋرناليستيكانى دامىتۋعا بارلىق جاعداي جاسالىپ وتىرعانىنا, جۋرناليستيكانىڭ باستى ماقساتى بارشا قازاقستاندىقتاردى ەلىمىزدىڭ دامۋىنا قىزمەت ەتۋگە شاقىرۋ بولىپ تابىلاتىنىنا توقتالدى. بالالاردىڭ رەسپۋبليكالىق «درۋجنىە رەبياتا» گازەتىنىڭ باس رەداكتورى ءالىمجان اكباروۆ ءوزى باسقارىپ وتىرعان باسىلىمنىڭ شىعا باستاعانىنا 80 جىل تولاتىنىن تىلگە تيەك ەتە كەلە, بۇگىنگى كۇنى «بالدىرعان», «اق جەلكەن», «ۇلان» جانە «درۋجنىە رەبياتا» ءتارىزدى بايىرعى بالالار باسىلىمدارىن تەك ساقتاپ قانا قويماي , سونىمەن بىرگە, ودان ءارى دامىتۋعا مۇمكىندىك تۋعانىن جەتكىزدى.
كەزدەسۋ سوڭىندا مارات ءتاجين باق وكىلدەرىنە قىزمەتتە شىعارماشىلىق تابىس تىلەپ, لاۋرەاتتار مەن گرانت يەگەرلەرى مەملەكەت باسشىسىنىڭ زور سەنىمىن اقتايتىنىنا سەنىم ءبىلدىردى.
ءلايلا ەدىلقىزى,
«ەگەمەن قازاقستان».