قىزىلجار اۋداندىق اۋرۋحاناسىنىڭ بۋحگالتەرى 20 ملن تەڭگە بيۋدجەت قارجىسىن قالتاسىنا باسىپ, جەكە ماقساتىنا پايدالانعان.
ەكونوميكالىق تەرگەۋ دەپارتامەنتى تەرگەۋ بارىسىندا اۋرۋحانانىڭ ەسەپشوتتارىنان قارجىنىڭ ۇرلانعانىن انىقتاعان. ءسويتىپ, «الاياقتىق» بابى بويىنشا قىلمىستىق ءىس قوزعالعان.
«تەرگەۋ امالدارى كەزىندە 2016 جىلدىڭ قاڭتارى مەن 2018 جىلدىڭ جەلتوقسانى ارالىعىندا اۋداندىق اۋرۋحانانىڭ بۋحگالتەرى قىزمەت بابىن پايدالانىپ, رەسپۋبليكالىق بيۋدجەتتەن تۇسكەن قارجىنى ءوزىنىڭ جەكە ەسەپشوتىنا اۋدارىپ وتىرعان. قوماقتى قاراجات كاسىپورىننىڭ قالىپتى جاعدايدا جۇمىس ىستەۋىنە جانە قىزمەتكەرلەرگە ەڭبەكاقى تولەۋ ءۇشىن بولىنگەن بولاتىن» دەيدى دەپارتامەنت وكىلدەرى.
ءۇش جىلدىڭ ىشىندە اۋداندىق اۋرۋحانا بۋحگالتەرى 20,8 ملن تەڭگەنى جىمقىرعان. سوت كۇدىكتىنى ايىپتى دەپ تاۋىپ, 3 جىلعا شارتتى تۇردە جازا كەستى. ول ەندى 5 جىلعا دەيىن ماتەريالدىق جاۋاپكەرشىلىگى بار قىزمەتتەرگە ورنالاسا المايدى.
سولتۇستىك قازاقستان وبلىسى