21 جەلتوقساندا رەسەيدىڭ كراسنويارسك قالاسىندا بىرقاتار مەملەكەتتىڭ جۋان جۇدىرىقتى جىگىتتەردىڭ قاتىسۋىمەن ۇلكەن كاسىپقوي بوكس كەشى وتەدى.
وسى جارىستا قازاقستاننىڭ قوس بىلعارى قولعاپ شەبەرى كۇش سىناسادى. ولار – ايدوس ەربوسىن ۇلى مەن نۇرسۇلتان جاناباەۆ. سۋپەر ورتا سالماقتاعى ايدوس (12 جەكپە-جەك, 12 جەڭىس, 8 نوكاۋت) قازىرگى كەزدە WBA Inter-Continental, WBO Global جانە WBC Asia نۇسقالارى بويىنشا التىن بەلبەۋدى يەلەنۋدە. جارتىلاي ورتا سالماقتاعى نۇرسۇلتان (8 جەكپە-جەك, 8 جەڭىس, 5 نوكاۋت) WBA Inter-Continental, WBO Oriental جانە IBF Pan Pacific نۇسقالارىنىڭ چەمپيونى.
ال وسى كەشتىڭ باستى باسكەسىندە رەسەيلىك دەنيس لەبەدەۆ پەن وڭتۇستىك افريكا رەسپۋبليكاسىنىڭ وكىلى تابيسو مچۋنۋمەن ايقاسادى. قوس ساڭلاق ءبىرىنشى اۋىر سالماقتاعى WBA مەن IBF نۇسقالارىنىڭ چەمپيوندىق ءتاجىن ساراپقا سالادى.