ۇكىمەت باسشىسى اسقار مامين ەلباسى نۇرسۇلتان نازارباەۆتىڭ يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ, پرەزيدەنت قاسىم-جومارت توقاەۆتىڭ وڭىرلەردىڭ الەۋەتىن دامىتۋ جونىندەگى تاپسىرماسىنىڭ ىسكە اسىرىلۋىن باقىلاۋ ماقساتىندا كەرەكۋ وڭىرىنە كەلدى.
پرەمەر-مينيستر اسقار مامين الدىمەن «ەۋرازيالىق ەنەرگەتيكالىق كورپوراتسياسى» اق اقسۋ ەلەكتر ستانساسىندا بولدى. ستانسا ەۋرازيالىق توپ (ERG) قۇرامىنداعى ەلەكتر ەنەرگياسى مەن كومىر وندىرۋشىلەردىڭ ءبىرى. ەلىمىزدە وندىرىلەتىن ەلەكتر قۋاتىنىڭ 17 پايىزى, كومىردىڭ 20 پايىزى كاسىپورىن ەنشىسىندە. «ەەك» اق اقسۋ ەلەكتر ستانساسىن, «شىعىس» كومىر كەنىشى مەن ەنەرگەتيكالىق جانە كەن جابدىعىن جوندەۋمەن اينالىساتىن وندىرىستىك جوندەۋ بولىمشەسىن بىرىكتىرەدى. 6 مىڭنان اسا ادام ەڭبەك ەتۋدە. كاسىپورىن 2001 جىلدان بەرى ستانساداعى ەنەرگوبلوكتاردى جاڭعىرتۋ جۇمىستارىن جۇرگىزۋدە. اسقار مامين ستانساداعى جاڭعىرتۋدان وتكەن, بيىل جەلتوقسان ايىندا پايدالانۋعا بەرىلەتىن №5 ەنەرگوبلوك قۇرىلىسىمەن تانىستى. ەنەرگوبلوكتى پايدالانۋعا بەرگەننەن كەيىن ستانسانىڭ قۋاتى 2 475 مۆت-قا جەتپەك.
بۇدان كەيىن ا.مامين وڭىردەگى جۇيە قۇراۋشى كەلەسى كاسىپورىن – «قازحروم» تۇك» اق فيليالى اقسۋ فەرروقورىتپا زاۋىتىن ارالاپ, تسەحتارداعى بالقىتۋ پەشتەرىنىڭ جاڭعىرتۋ جۇمىستارىمەن تانىستى.
جاڭعىرتۋ جۇمىستارىنان كەيىن بۇل پەشتەر 2024 جىلعا قاراي فەرروحروم ءوندىرىسىنىڭ كولەمىن 87 پايىزعا ارتتىرۋعا مۇمكىندىك بەرەدى. بۇل ورايدا ەلەكتر ەنەرگياسىن تۇتىنۋ كولەمى 20 پايىزعا تومەندەيدى. سونداي-اق اقسۋ قالاسىندا سالىنىپ جاتقان ورتالىق جىلۋ قازاندىعى مەن بالالار ەكو-تەحنو ورتالىعىن ارالاپ كوردى.
اقسۋدان كەيىن ۇكىمەت باسشىسى وبلىس ورتالىعىنداعى «كومپانيا نەفتەحيم LTD» جشس ارالاپ كوردى. ءوندىرىس ورنى 2014 جىلعى جەلتوقسان ايىندا ىسكە قوسىلعان. جىلىنا 20 مىڭ توننا ەفير, 70 مىڭ توننا پوليپروپيلەن وندىرىلسە, 50 مىڭداي پوليپروپيلەندى قاپ جاسالدى.
كاسىپورىن زاماناۋي تەحنولوگيالاردى قولدانۋدا, سۋدى ۇنەمدى پايدالانۋ ءۇشىن سۋمەن جابدىقتاۋ جانە اينالىمداعى سۋدى تازارتاتىن جۇيە سالىنعان. جالپى, كاسىپورىننىڭ قورشاعان ورتانى قورعاۋ جۇمىستارىنا 2018 جىلى 23,372 ميلليون تەڭگە كولەمىندە جۇمسالعان.
سونداي-اق پرەمەر-مينيستر «قازاقتەلەكوم» اق-نىڭ «دەرەكتەردى وڭدەۋ ورتالىعىنا باردى. ورتالىق دەرەكتەردى وڭدەۋگە جانە ساقتاۋعا ارنالعان وزىق ۇلگىدەگى سەرۆەرلەرمەن جابدىقتالعان. وسى جەردە «سامۇرىق-قازىنا» ۇاق» اق, «قازاتومونەركاسىپ» ۇاك», «قازمۇنايگاز» ۇك», «قازپوشتا», ء«ساتتى جۇلدىز» جانە «Google», «Wargaming», «Genesis Mining» حالىقارالىق كورپوراتسيالارى ەلەكتروندى دەرەكتەرىن ورنالاستىرىپ, جۇيەلەپ, رەزەرۆكە ساقتاپ قويادى.
وبلىس ورتالىعىنداعى «ينۆەستورلار ۇيىندە» وڭىرگە ينۆەستيتسيالار تارتۋ جۇمىستارى تانىستىرىلدى. ورتالىقتا كاسىپكەرلەر ء«بىر تەرەزە» قاعيداتى بويىنشا قىزمەتتەر مەن كەڭەستەر الا الادى. مىسالى, «Kazakh Invest», «پاۆلودار» اەا» باسقارۋشى كومپانياسىنىڭ, «اتامەكەن» وڭىرلىك كاسىپكەرلەر پالاتاسىنىڭ, «قازاگروقارجى» اق, «اگرارلىق نەسيە كورپوراتسياسى», «اۋىل شارۋاشىلىعىن قارجىلاي قولداۋ قورى» جانە «دامۋ» كاسىپكەرلىكتى دامىتۋ قورىنىڭ» كەڭسەلەرى ءبىر الاڭدا جۇمىس ىستەيدى. وسى جەردە ۇكىمەت باسشىسىنا ەكىباستۇز قالاسىنىڭ يندۋستريالىق ايماعىندا قۋاتى جىلىنا 35 مىڭ توننانى قۇرايتىن تەحنيكالىق كرەمني ءوندىرۋ زاۋىتىن سالۋ بارىسى تۋرالى باياندالدى.
ينۆەستوردىڭ مالىمەتىنشە, ءباا Canarax جشس جىلىنا 35 مىڭ توننا كرەمني وندىرەتىن بولادى. كاسىپورىندا 380 تۇراقتى جۇمىس ورنى جانە قۇرىلىس كەزىندە 150 جۇمىس ورنى قۇرىلادى.
– ءبىز يتاليادان اكەلىنەتىن جوعارى تەحنولوگيالار مەن زاماناۋي جابدىقتاردى پايدالاناتىن بولامىز, – دەپ اتاپ ءوتتى ءباا ينۆەستورلارى. – ءبىزدىڭ زاماناۋي گاز تازالاۋ جۇيەسى ەۋروپالىق ستاندارتتار بويىنشا جوبالانعان. سۋ جابىق كونتۋردا اينالادى جانە زاۋىت سۋدى شىعارۋدىڭ نولدىك جۇيەسىن قولدايدى. زاۋىت قاتتى قالدىقتاردى وندىرمەيدى.
«ينۆەستورلار ءۇيىنىڭ» توراعاسى الەكساندر بابەنكونىڭ ايتۋىنشا, وبلىس ورتالىعىندا تاعى ءبىر جاڭا زاۋىت قۇرىلىسى باستالماق. جوسپار بويىنشا جاڭا كاسىپورىن 140 مىڭ تونناعا دەيىن كوكونىس وڭدەپ, 21 مىڭ توننا كراحمال, 2,8 مىڭ توننا پروتەين وندىرەتىن بولادى. وڭىردە سۋارمالى جەرلەردىڭ كولەمى الداعى جىلدارى 100 مىڭ گەكتارعا ۇلعايتىلماق.
ال «اسىل سۋ» سۋلاندىرۋدىڭ وڭىرلىك باعدارلاماسىن جۇزەگە اسىرۋدا قىتايلىق ينۆەستورلاردىڭ كومەگى قاجەت. سونداي-اق Dalian Zhonghui Irrigation Equipment Co. Ltd جاڭبىرلاتۋ ماشينالارىن وندىرەتىن زاۋىت سالۋدى ۇسىنادى.
كەلەسى كەزەكتە ۇكىمەت باسشىسى قۇرىلىسى اياقتالىپ قالعان جاڭا ونكوورتالىققا باردى.
وبلىس اكىمى بولات باقاۋوۆتىڭ ايتۋىنشا, 227 ورىندىق ونكولوگيالىق ورتالىق پەن اۋىسىمىنا 100 ادام قابىلدايتىن ەمحانا بيىل جەلتوقسان ايىنىڭ سوڭىندا اشىلماق. مۇندا 400-دەن استام جوعارى بىلىكتى مامان جۇمىس ىستەيدى. نىسان قۇرىلىسىن «قۇرىلىس» جشس جۇرگىزۋدە. جوبانىڭ قۇنى – 7,2 ملرد تەڭگە. مەديتسينالىق جابدىقتاردى ساتىپ الۋعا بيۋدجەتتەن 2,8 ملرد تەڭگە بولىنگەن.
دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا, ماقسات – وبىر اۋرۋىن ەمدەۋدەگى جاڭا تەحنولوگيالاردى ەنگىزۋ. وبىردىڭ تۇرلەرىن ەمدەۋ ءۇشىن حيميالىق پرەپاراتتار عانا ەمەس, زاماناۋي ۇلگىدەگى تەراپيا تاڭدالادى. جاڭا ورتالىقتا كلينيكالىق-دياگنوستيكالىق زەرتحانالار, رەانيماتسيا جانە قارقىندى تەراپيا بولىمشەسى ورنالاسادى. ەمحانا بولىمشەلەرىنىڭ دارىگەرلىك كابينەتتەرى ساۋلەلىك, ۋلترا-دىبىستىق جانە ماگنيتتىك-رەزونانستىق مازمۇنداعى قازىرگى زامانعى دياگنوستيكالىق اپپاراتتارمەن, ەكسپرەسس-دياگنوستيكا ءۇشىن بيولوگيالىق ماتەريالداردى ەندوسكوپيالىق جانە اناليتيكالىق زەرتتەۋلەرمەن جابدىقتالادى. جاڭا ونكوديسپانسەردىڭ اشىلۋى وڭىردە ونكولوگيالىق اۋرۋلاردى ەرتە انىقتاۋعا, ءولىم-ءجىتىم كورسەتكىشىنىڭ تومەندەۋىنە مۇمكىندىك بەرمەك.
سونداي-اق ۇكىمەت باسشىسى مۇز ارەناسىن, فۋتبول جانە جابىق جەڭىل اتلەتيكا مانەجدەرىن, وليمپيادالىق رەزەرۆكە دايىنداۋ ورتالىعىن قامتيتىن «سپورت-سيتي» سپورت قالاشىعىن ارالاپ كوردى. الداعى جىلدارى «سپورت سيتي» ماڭىندا جاتاقحانا دا سالىنباق.
ۇكىمەت باسشىسىنىڭ نازارىنا ۋسولكا وزەنىندەگى اكادەميالىق ەسكەك ەسۋ ارناسىنىڭ جوباسى دا ۇسىنىلدى. بۇل كەشەندەردىڭ قۇرىلىسىنا دەمەۋشىلەر قولداۋ كورسەتكەن. بۇل رەتتە فۋتبول مانەجى, وليمپيادالىق رەزەرۆ دايىنداۋ ورتالىعى جانە مۇز سارايىنا 6 ملرد تەڭگەگە جۋىق قارجى بولىنگەن. ال جەڭىل اتلەتيكا مانەجى مەملەكەت-جەكەمەنشىك ارىپتەستىك اياسىندا بوي كوتەرمەك.
پاۆلودار وبلىسى