قازاقستان رەسپۋبليكاسى پارلامەنتى سەناتىنىڭ توراعاسى داريعا نازارباەۆا ارمەنيا رەسپۋبليكاسى ۇلتتىق جينالىسىنىڭ توراعاسى ارارات ميرزويانمەن كەزدەستى, دەپ حابارلادى سەناتتىڭ ءباسپاسوز قىزمەتى.
تاراپتار ەكىجاقتى پارلامەنتارالىق قاتىناستاردى دامىتۋدىڭ كەلەشەگىن, سونداي-اق پارلامەنتتىك ۇيىمدار اياسىنداعى ءوزارا ءىس-قيمىلدى تالقىلادى.
داريعا نازارباەۆا ءوز سوزىندە ارمەنيا قازاقستاننىڭ تاۋەلسىز مەملەكەتتەر دوستاستىعى مەن ەۋرازيالىق ەكونوميكالىق وداقتاعى سەنىمدى ارىپتەسى بولىپ تابىلاتىنىن اتاپ ءوتتى. ء«بىزدىڭ مەملەكەتتەر اراسىنداعى قارىم-قاتىناس بۇگىندە تولىق ءوزارا تۇسىنىستىك پەن سەنىم جاعدايىندا قارقىندى دامۋدا. ءبىز ونى ساقتاي وتىرىپ, حالىقتار يگىلىگى ءۇشىن ودان ءارى دامىتامىز دەپ ۇمىتتەنەمىن», دەدى ول.
قازاقستان رەسپۋبليكاسى پارلامەنتى سەناتىنىڭ باسشىسى, سونداي-اق تمد پاا, ۇقشۇ پا, پارلامەنتارالىق وداق جانە ەقىۇ پا اياسىنداعى كوپجاقتى بايلانىستاردى دامىتۋدى ماڭىزدى دەپ سانايدى.
داريعا نازارباەۆا قازاقستان مەن ارمەنيا پارلامەنتتەرى اراسىنداعى ىنتىماقتاستىق توبىنا ەرەكشە نازار اۋداردى جانە زاڭ شىعارۋ قىزمەتىندە تاجىريبە الماسۋ ءۇشىن ونىڭ الەۋەتىن ءتيىمدى پايدالانۋ قاجەتتىگىن اتاپ ءوتتى.
ارمەنيا ۇلتتىق جينالىسىنىڭ توراعاسى ارارات ميرزويان ءوز كەزەگىندە قازاقستان مەن ارمەنيا قاتىناستارىنىڭ دوستىق جانە وداقتاستىق سيپاتىنا توقتالا كەلىپ, ارمەنيانىڭ قازاقستانمەن ەكىجاقتى پارلامەنتارالىق ىنتىماقتاستىقتىڭ قارقىندى دامۋىنا ماڭىز بەرەتىنىن ايتتى.
كەزدەسۋدەن كەيىن داريعا نازارباەۆا باستاعان قازاقستان رەسپۋبليكاسى پارلامەنتى سەناتىنىڭ دەلەگاتسياسى ارمەنيا رەسپۋبليكاسى ۇلتتىق جينالىسىنىڭ پاركىندەگى توراعالار اللەياسىندا اعاش وتىرعىزۋعا قاتىستى. داريعا نازارباەۆانىڭ ايتۋىنشا, كوشەتتەر ءبىزدىڭ ەلدەرىمىز بەن حالىقتارىمىزدى بايلانىستىراتىن دوستىقتى پاش ەتەدى.