پرەمەر-مينيستر اسقار مامين كاتار پرەمەر-ءمينيسترىنىڭ ورىنباسارى حاماد بين ابدۋلازيز ءال-كاۆاريمەن كەلىسسوزدەر وتكىزدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
«كاتار ‒ قازاقستاننىڭ اراب الەمىندەگى ماڭىزدى ساياسي سەرىكتەسى. ءبىزدىڭ ەلدەرىمىز اراسىندا قازاقستاننىڭ تۇڭعىش پرەزيدەنتى ‒ ەلباسى ن. نازارباەۆ پەن كاتاردىڭ جوعارى باسشىلىعى نەگىزىن سالعان سەنىمدى ءارى اشىق ساياسي ديالوگ ورناعان. مەملەكەت باسشىسى ق.توقاەۆ سىرتقى ساياساتتاعى ساباقتاستىقتى ۇستانا وتىرىپ, كاتارمەن ىنتىماقتاستىقتى دامىتۋعا ۇلكەن ءمان بەرەدى» دەدى ا. مامين.
ۇكىمەت باسشىسى ساۋدا-ەكونوميكالىق, ينۆەستيتسيالىق, مادەني-گۋمانيتارلىق جانە باسقا دا سالالارداعى ىنتىماقتاستىقتى ارتتىرۋ ءۇشىن ۇلكەن الەۋەتتىڭ بار ەكەنىن اتاپ ءوتتى.
ەلدەر اراسىندا ۆيزاسىز رەجيم ورناعان, وسى جىلدىڭ جەلتوقسان ايىندا نۇر-سۇلتان مەن دوحا اراسىندا تىكەلەي رەيستەر اشىلادى دەپ جوسپارلانۋدا. الداعى ۋاقىتتا تۇراقتى رەيستەر اپتاسىنا 7 رەت تەك استانالار اراسىندا عانا ەمەس, سونىمەن قاتار الماتى مەن دوحا اراسىندا دا اشىلماق, سونداي-اق قازاقستاندا ەنگىزىلگەن اشىق اسپان رەجيمى اياسىندا «اۋە ەركىندىگىنىڭ» بەسىنشى دارەجەسىمەن اپتاسىنا 7 جۇك رەيسى ورىندالاتىن بولادى.
سونداي-اق تاراپتار تۋريزم, كولىك, دەنساۋلىق ساقتاۋ, ءبىلىم بەرۋ جانە باسقا دا سالالارداعى ەكىجاقتى ىنتىماقتاستىقتىڭ پەرسپەكتيۆالارىن تالقىلادى.