ەلوردادا «WorldSkills Kazakhstan 2019» - V رەسپۋبليكالىق كاسىبي شەبەرلىك چەمپيوناتىنىڭ اشىلۋ ءراسىمى ءوتتى.
چەمپيوناتتىڭ كونكۋرستىق بولىگى 12-14 قاراشا ارالىعىندا نۇر-سۇلتان قالاسىنداعى تاۋەلسىزدىك سارايىندا وتەدى. وعان ەلىمىزدىڭ 17 ايماعىنان 22 جاسقا دەيىنگى 400-دەن استام مامان كەلگەن. قاتىسۋشىلار WorldSkills-ءتىڭ 38 قۇزىرەتتىلىگى (ماماندىقتارى) بويىنشا سايىسقا تۇسەدى جانە تاڭدالعان قۇزىرەتتىلىكتە مەدال ۇتىپ الۋ مۇمكىندىگى ءۇشىن جارىسادى. كونكۋرسقا قاتىسۋشىلاردى 500-گە جۋىق ساراپشى باعالايدى. «WorldSkills Kazakhstan 2019» - V رەسپۋبليكالىق كاسىبي شەبەرلىك چەمپيوناتى جاس كادرلاردى ەكونوميكانىڭ وندىرىستىك سەكتورىنا تارتۋعا جانە ەلدەگى تەحنيكالىق جانە كاسىپتىك ءبىلىم بەرۋدى دامىتۋعا ىقپال ەتەدى.
شارانىڭ اشىلۋ سالتاناتىندا ءبىلىم جانە عىلىم ءمينيسترى اسحات ايماعامبەتوۆ بايقاۋ قاتىسۋشىلارىنا ساتتىلىك تىلەپ, اتالعان چەمپيوناتتىڭ ەلىمىزدىڭ ەكونوميكاسى ءۇشىن ماڭىزى زور ەكەندىگىن اتاپ ءوتتى.
«بۇل - شىن مانىندە ەلىمىز ءۇشىن, رەسپۋبليكامىز ءۇشىن وتە ماڭىزدى ءىس-شارا. ەلىمىزدىڭ باسشىسى قاسىم-جومارت كەمەل ۇلى توقاەۆ ءبىلىم سالاسىنا وتە ۇلكەن كوڭىل بولەدى. بۇگىن مەملەكەت باسشىسىنىڭ قابىلداۋىندا بولدىم. تەحنيكالىق جانە كاسىپتىك ءبىلىم سالاسىن دامىتۋ بويىنشا ناقتى تاپسىرمالار بەردى. سونىڭ ىشىندە WorldSkills قوزعالىسىن دامىتۋ ماسەلەسىن دە كوتەردى. WorldSkills قۇزىرەتتىلىكتەرىن ءبىلىم باعدارلامالارىنا ەنگىزۋ ماسەلەسى - ءبىزدىڭ الدىمىزدا تۇرعان باستى ماقسات. ءبىز ونى دامىتاتىن بولامىز», دەدى اسحات قانات ۇلى.
تاعى ءبىر ايتا كەتەرلىك جايت, WorldSkills-ءتىڭ ەكونوميكامىزعا ماڭىزدىلىعىن ەسكەرە وتىرىپ, ەلىمىزدىڭ پرەمەر-ءمينيسترى اسقار مامين وسى قوزعالىستى باسقارۋ تۋرالى شەشىم قابىلدادى.