كەشە پرەمەر-ءمينيستردىڭ ورىنباسارى بەردىبەك ساپارباەۆ, نۇر-سۇلتان قالاسىنىڭ اكىمى التاي كولگىنوۆ, مادەنيەت جانە سپورت ۆيتسە-ءمينيسترى ەلدوس رامازانوۆ ۇلتتىق پاراليمپيادالىق وقۋ ورتالىعىنا باردى.
ۆيتسە-پرەمەر مەن قالا باسشىسى ۇلتتىق پاراليمپيادا كوميتەتى مەن پاراليمپيادالىق جاتتىعۋ ورتالىعىنىڭ جۇمىسىمەن تانىستى. ولار ورتالىقتىڭ جاتتىعۋ زالىن, ۆولەيبول, ۇستەل تەننيسى, جەكپە-جەك الاڭدارىن ارالاپ, سپورتشىلاردى جاتتىقتىرۋعا ارنالعان جاڭا قۇرال-جابدىقتاردى كورىپ شىقتى.
قازاقستانداعى العاشقى پاراليمپيادالىق ورتالىق – بۇل ۇلتتىق قۇرامالاردى ساپالى جانە كاسىبي دايارلاۋعا ارنالعان بىرەگەي عيمارات. مۇندا ەرەكشە قاجەتتىلىكتەرى بار ادامدارعا قاجەت بارلىق نارسە بار: سپورتپەن شۇعىلدانۋعا ارنالعان جابدىقتار, ارنايى سپورت زالدارى, دارىگەرلەر, ماسساجيستەر, پاندۋستار, ءۇش تىلدە (قازاق, ورىس جانە اعىلشىن) سالەمدەسۋ, تاكتيلدى جابىن تاقتايشالارى, كىرەبەرىس ەسىكتەرىن اۆتوماتتى تۇردە اشاتىن جانە جاباتىن باتىرما جانە باسقالار.
ورتالىقتا كۇنىنە 780 ادامعا دەيىن سپورتپەن تەگىن شۇعىلدانۋعا مۇمكىندىك قاراستىرىلعان.
قازاقستاندىق سپورتشىلار بۇگىنگە دەيىن التى جازعى, جەتى قىسقى پاراليمپيا ويىندارىنا قاتىسقان. قازىرگى تاڭدا قازاقستان قۇراماسىندا ەكى التىن, ءبىر كۇمىس جۇلدە بار. 2016 جىلى برازيليا استاناسى ريو-دە-جانەيرو قالاسىندا وتكەن جازعى پاراليمپيادادا 100 مەترگە ەركىن ادىسپەن جۇزۋدە ءزۇلفيا عابيدۋللينا چەمپيون اتانىپ, تاريحي التىن جۇلدەگە قول جەتكىزگەن ەدى. ياعني ەل قورجىنىنا تۇڭعىش مەدال سالعان بولاتىن. 2018 جىلى پحەنچحانداعى (وڭتۇستىك كورەيا) پاراليمپيادادا شاڭعىشى الەكساندر كوليادين قازاقستان قۇراماسىنا ەكىنشى التىن مەدالدى اپەردى. سونداي-اق ريوداعى جازعى پاراليمپيادادا راۋشان قويشىباەۆا پارا پاۋەرليفتينگتەن ايەلدەر اراسىندا 67 كيلو سالماق دارەجەسىندە كۇمىس مەدال يەلەنگەن-ءدى.
ەندى قازاقستاندىق پاراليمپياداشىلار 2020 جىلى جاپونيانىڭ باس شاھارى – توكيودا وتەتىن جازعى پاراليمپياداعا دايىندالۋدا. 25 تامىز بەن 6 قىركۇيەك ارالىعىندا وتەتىن دودادا سپورتشىلار سپورتتىڭ 22 تۇرىنەن باق سىنايدى.
قازىرگى تاڭدا ەل قورجىنىندا توكيو پاراليمپياداسىنا ەكى جولداما بار. جاز مەزگىلىندە ەلوردادا پارا پاۋەرليفتينگتەن الەم چەمپيوناتى ۇيىمداستىرىلىپ, پاراليمپيادا جولداماسى تاراتىلعان بولاتىن. ەلىمىزدە وتكەن الەمدىك سىندا وتانداستارىمىز داۆيد دەگتيارەۆ پەن راۋشان قويشىباەۆا توكيو پاراليمپياداسىنا جولداما جەڭىپ العان-دى.