كاسىپوداقتار فەدەراتسياسىنىڭ توراعاسى ەرالى توعجانوۆ ماڭعىستاۋ وبلىسىنا جۇمىس ساپارىمەن باردى. بۇل تۋرالى فەدەراتسيانىڭ ءباسپاسوز قىزمەتى حابارلادى.
كاسىپوداقتار فەدەراتسياسىنىڭ توراعاسى ەرالى توعجانوۆتىڭ وڭىردەگى ەكى كۇندىك جۇمىس ساپارى قازاقستاننىڭ حالىق جازۋشىسى, ەڭبەك ەرى, مەملەكەتتىك سىيلىقتىڭ لاۋرەاتى ءابىش كەكىلباەۆتىڭ ەسكەرتكىشىنە گۇل شوعىن قويۋ راسىمىمەن باستالدى.
ء«ابىش اعا ەڭبەكقور ەدى جانە ءوز شىعارمالارىن دا ەڭبەك ادامىنا ارناپ جازاتىن. بۇگىن, مىنە, سونداي ەڭبەكقور ادامداردىڭ ارقاسىندا كەكىلباەۆ مۇسىنگە اينالىپ, ەڭبەكتىڭ ارقاسىندا ءابىش اعاعا ارنالعان ءزاۋلىم مۇراجاي اشىلىپ, زەرتتەۋلەر جاسالىپ, كىتاپتار شىعارىلىپ, تەاتردا ءابىش جازۋشىنىڭ شىعارمالارى ساحنالانىپ جاتىر. وسىنىڭ ءبارى ابىز تۇلعانى ماڭگىلىك ەتۋگە ارنالعان يگىلىكتى ىستەر, ادام قولىمەن, ادام نيەتىمەن اتقارىلىپ جاتقان ەڭبەك» دەدى ەرالى توعجانوۆ ءوز سوزىندە.
فەدەراتسيا توراعاسى مۇراجايدى سالۋعا اتسالىسقان ەڭبەككەرلەرگە ريزاشىلىعىن ءبىلدىرىپ, العىس حاتتارمەن ماراپاتتادى.
سودان سوڭ ەرالى توعجانوۆ وبلىس اكىمى سەرىكباي ترۇموۆپەن كەزدەستى.
وبلىس اكىمى كف توراعاسىنا وڭىرگە كەلگەن جۇمىس ساپارىنا ساتتىلىك تىلەپ, جۇمىسشىلاردىڭ مۇددەسىن قورعاپ, جۇمىسشىلار مەن جۇمىس بەرۋشىلەر اراسىندا دانەكەر بولۋ - كاسىپوداقتار قىزمەتىنىڭ نەگىزگى مىندەتتەرىنىڭ ءبىرى ەكەندىگىنە توقتالدى. سەرىكباي تۇرىموۆتىڭ ايتۋىنشا, ماڭعىستاۋ وبلىسىنىڭ كوپتەگەن ءىرى كاسىپورنىندا كاسىپوداق ۇيىمدارى جۇمىس ىستەيدى. وبلىستا 80 مىڭنان اسا ەڭبەككەر كاسىپوداق مۇشەلەرى. وڭىردەگى كاسىپوداقتار ۇيىمىنىڭ جۇمىسى بىرقالىپتى, - دەپ اتاپ ءوتتى س.تۇرىموۆ.
ءوز كەزەگىندە ەرالى توعجانوۆ الەۋمەتتىك-ەڭبەك قاتىناستارىندا قوعامدى, كاسىپوداق پەن ەڭبەك ۇجىمدارىن الاڭداتىپ وتىرعان ماسەلەلەرگە توقتالدى. سونىمەن قاتار شەتەلدىك كومپانيالارداعى جۇمىس بەرۋشىلەر تاراپىنان ورىن العان ەڭبەك زاڭنامالارىن بۇزۋ, ەڭبەك داۋلارى مەن جانجالداردى بولدىرماۋ, قارىزدى ەڭبەكتى پايدالانۋ جانە جۇمىسكەرلەردىڭ الەۋمەتتىك-ەڭبەك قۇقىقتارىن قورعاۋ جايىن جەتكىزدى.
«كاسىپوداقتار فەدەراتسياسى ۇكىمەت نازارىن بىرنەشە رەت شەتەلدىك كاپيتالمەن جۇمىس ىستەيتىن كاسىپورىندار رەسپۋبليكامىزعا شەتەلدىك جۇمىس كۇشىن ەنگىزۋ ەرەجەلەرىن ۇنەمى ساقتاي بەرمەيتىندىگىنە, قازاقستاندىق جۇمىسكەرلەردىڭ ەڭبەگىنە قۇرمەتپەن قاراماۋ, ۇلتتىق زاڭنامالاردى ادەيى نەمەسە جاسىرىن تۇردە ەلەمەيتىندىكتەرىنە اۋداردى. مۇنىڭ ءبارى الەۋمەتتىك كيكىلجىڭدەردىڭ تۋىنا اكەلەدى» دەدى ەرالى توعجانوۆ.
الەۋمەتتىك شيەلەنىستەردى ازايتۋ ءۇشىن جۇمىس بەرۋشىلەردىڭ جەرگىلىكتى اتقارۋشى بيلىك ورگاندارىمەن جانە كاسىپوداقتارمەن ءوزارا بەلسەندى ارەكەتتەردە بولۋى, قۇقىقتىق ساۋاتتاندىرۋدى ۇيىمداستىرۋ, جۇمىستان بوسايتىن جۇمىسكەرلەردى قايتا وقىتۋ جانە جۇمىسقا ورنالاستىرۋدىڭ نۇسقالارىن الدىن الا دايىنداۋ, وزىنە قابىلدانعان مىندەتتەردىڭ ناقتى ورىندالۋى قاجەت» دەپ اتاپ ءوتتى كف توراعاسى.
بيىلعى جىلدىڭ العاشقى جارتى جىلدىعىندا رەسپۋبليكامىزدا 3 ەڭبەك داۋى رەسمي تىركەلگەن. قىركۇيەك-قازان ايلارىندا ەڭبەك داۋلارى ورىستەپ, كاسىپورىنداردا 17 الەۋمەتتىك- ەڭبەك داۋى بولعان.
سونىڭ ىشىندە سالالارعا ءبولىپ قاراساق, 11 ەڭبەك داۋى مۇناي-گاز سالاسىنا قاتىستى تۋىنداعان. ءبىرىنشى جارتى جىلدىقتاعى الەۋمەتتىك-ەڭبەك داۋلارىنىڭ باسىم بولىگى - 6 وقيعا ماڭعىستاۋ وبلىسىندا تىركەلگەن. كاسىپوداقتار فەدەراتسياسىنىڭ توراعاسى كاسىپورىندارداعى ۇجىمدىق شارتتارمەن قامتىلۋدىڭ دەڭگەيى تومەن ەكەندىگىنە باستى كوڭىل اۋدارۋ قاجەتتىگىن جانە بۇل باعىتتا جۇمىستى بەلسەندى جۇرگىزۋگە شاقىردى.
قازىرگى كۇنى ماڭعىستاۋ وبلىسىنداعى جۇمىس ىستەيتىن 10 200 كاسىپورىننىڭ 1 488-دە ۇجىمدىق شارت جاسالعان. قامتىلۋ 14,6% قۇرايدى. وندىرىستىك جاراقاتتانۋدى تومەندەتۋ جونىندەگى شارالار بويىنشا ەرالى توعجانوۆ قاۋىپسىزدىك جانە ەڭبەكتى قورعاۋ بويىنشا كاسىپورىنداردا وندىرىستىك كەڭەستەر قۇرۋ جۇمىسىن بەلسەندى جۇرگىزۋ قاجەتتىگىن باسا ايتتى.
2019 جىلدىڭ 9 ايىندا وبلىس بويىنشا وندىرىستەگى جازاتايىم وقيعالار سالدارىنان 38 ادام زارداپ شەگىپ, 2 ادام كوز جۇمعان.
سونىمەن قاتار قازاقستانداعى قارىزدى ەڭبەكتى پايدالانۋ ماسەلەلەرى جايلى دا ايتىلدى.
«قازىر پارلامەنت ءماجىلىسى دەپۋتاتتارىنىڭ قاراۋىنداعى قارىزدى ەڭبەكتىڭ قولدانىلۋىنا قاتىستى زاڭ جوباسىندا فەدەراتسيانىڭ بىرقاتار ۇسىنىسى كورىنىس تاپقان» دەدى كاسىپوداقتار فەدەراتسياسىنىڭ توراعاسى.
تالقىلاۋ بارىسىندا تاراپتار الەۋمەتتىك-ەڭبەك ماسەلەلەرىن شەشۋدە بىرلەسە ءتيىمدى ارەكەتتەستىك ورناتۋ ءۇشىن ءوزارا ىنتىماقتاستىق تۋرالى مەموراندۋمعا قول قويدى.
قۇجاتتا قر كاسىپوداقتار فەدەراتسياسى مەن ماڭعىستاۋ وبلىستىق اكىمدىگى اراسىنداعى ارىپتەستىكتى دامىتۋدا وڭىردەگى ەڭبەك جاعدايلارىن جاقسارتۋ, وندىرىستىك جاراقاتتانۋدى بولدىرماۋ جانە ەڭبەككەرلەر قۇقىعىنىڭ ساقتالۋى ءۇشىن شەشۋشى باعىتتار ايقىندالعان.
مەموراندۋم اياسىندا ستۋدەنتتەردى ۋاقىتشا جۇمىسقا تارتۋ جانە جاستاردىڭ ەڭبەك قوزعالىستارىن دامىتۋ جايلى بىرلەسكەن ءىس-شارالار قابىلدانادى.
عاني اتىمتاي