ونەرسىز – ءومىر قاراڭعى. سول ونەردىڭ وزەكتى ءبىر سالاسى – تەاتر. قازاق ساحنا ونەرى تۋمىسى بولەك, تۇعىرى بيىك تۇلعالاردىڭ تابيعي تالانتى, جانكەشتى ەڭبەگى ارقاسىندا ءوسىپ, وركەندەدى. بۇگىندە الەم تانىعان قازاق تەاترلارىن بيىك بەلەسكە كوتەرگەندەردىڭ ءبىرى – قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى م ۇلىك سۇرتىباەۆ بولاتىن. ول ءوزىنىڭ ومىردەگى, ونەردەگى سەرىگى قازاقستاننىڭ حالىق ءارتىسى ايكەن مۇسابەكوۆا ەكەۋى ونەر جولىن ساكەن سەيفۋللين اتىنداعى قاراعاندى وبلىستىق قازاق دراما تەاترىندا باستادى. ساحنانىڭ قوس جۇلدىزى وسى ونەر ورداسىنىڭ ىرگەسىن قالاپ, شاڭىراعىن بيىكتەتىپ, كەرەگەسىن كەڭەيتكەن ءبىرتۋار تالانتتار بولاتىن. قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆ, ۇلى سۋرەتكەرلەر م.اۋەزوۆ, س.مۇقانوۆ, ع.مۇسىرەپوۆ باق-تا جاريالانعان وي-پىكىرلەرىندە ەرلى-زايىپتى ونەرپازداردىڭ تالانتىن اسا جوعارى باعالادى. ءبىر عانا مىسال: «م ۇلىك سۇرتىباەۆ كوزىنىڭ ءبىر عانا قيىعىمەن كوپ جايدى اڭعارتا الاتىن تالانت» دەپ جازدى م.اۋەزوۆ.
م.سۇرتىباەۆ كومەديادا, تراگەديادا, درامادا دا بىرىنە ءبىرى ۇقسامايتىن بەدەرلى بەينەلەر كەيىپتەگەن كەڭ تىنىستى, كەمەل ويلى تالانت بولاتىن. ماسەلەن: «وجەت قىز» فيلمىندەگى اڭعارباي بەينەسى ءالى ەستە. ول سومداعان ۇلى اباي تەاتر تاريحىنداعى ءبىتىمى بولەك بەكزات بەينە. ءجۇرىس-تۇرىسى, ءىس-ارەكەتى, كۇلكىلى اڭعارباي مەن ويلى, مۇڭلى ۇلى ابايدىڭ اراسى جەر مەن كوكتەي ەمەس پە؟! وسىنداي كومەديالىق, درامالىق بەينەلەردى سومداۋ كەز كەلگەن ونەر يەسىنىڭ ماڭدايىنا جازىلماعان.
م.سۇرتىباەۆتىڭ كينو سالاسىنداعى ەڭبەگى دە اسا اۋقىمدى.
وتكەن عاسىردىڭ ەلۋىنشى جىلدارى ساحنانىڭ قوس ساڭلاعى م.اۋەزوۆ تەاترىنا شاقىرىلىپ, ومىرلەرىنىڭ سوڭىنا دەيىن قازاق ونەرىنىڭ قارا شاڭىراعىندا جەمىستى دە جەڭىستى ەڭبەك ەتتى. ءبىرى تولەگەن, ءبىرى جىبەك, ەندى بىردە كەبەك-ەڭلىك, تاعى بىردە قوزى-بايان بەينەسىندە ساحنادا جۇلدىزداي جارقىرادى. ونەردە وشپەس ءىز قالدىرعان.
قازاقستاننىڭ حالىق ارتىستەرى م ۇلىك سۇرتىباەۆ پەن ايكەن مۇسابەكوۆانىڭ 100 جىلدىق مەرەيتويى ولار تۋىپ-وسكەن, جەمىستى ەڭبەك ەتكەن قاراعاندى قالاسىندا, جاڭاارقا اۋدانىندا, ەراليەۆ اۋىلىندا اتالىپ ءوتتى. مەرەيتوي كەشتەرىندە ساحنانىڭ قوس ساڭلاعى جايلى, جازۋشى, دراماتۋرگ, تەاتر سىنشىسى, مەملەكەتتىك سىيلىقتىڭ لاۋرەاتى ءسابيت دوسانوۆ مازمۇندى بايانداما جاسادى. قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى كەڭەس جۇمابەكوۆ, قاراعاندى وبلىسى اكىمىنىڭ ورىنباسارى ابزال نۇكەنوۆ, قازاقستان حالىقتارى اسسامبلەياسى قاراعاندى وبلىستىق ءبولىمىنىڭ توراعاسى ەرلان قۇسايىنوۆ, جاڭاارقا اۋدانىنىڭ اكىمى يۋرجان بەكقوجين, ت.ب. قوس تالانت جايلى تەرەڭنەن تارتىپ, تەبىرەنە سويلەدى. م.سۇرتىباەۆتىڭ كەلىنى, زەينەتكەر ايتىكەش قازىبەكوۆا, ساحنا ساڭىلاقتارىنىڭ نەمەرەلەرى مادلەنا, سۇلتان سۇرتىباەۆتار اسەرلى ەستەلىكتەر ايتتى.
م.سۇرتىباەۆ پەن ءا.مۇسابەكوۆانىڭ 100 جىلدىق مەرەيتويلارى وتكەن جىلى جەلتوقسان ايىنىڭ سوڭعى كۇندەرى ولار جەمىستى ەڭبەك ەتكەن م.اۋەزوۆ تەاترىندا وتكەن بولاتىن. سول ۇلاعاتى مول ۇلى توي ولاردىڭ تۋعان جەرىندە ادەمى دە اسەرلى, ءماندى دە ءساندى جالعاستى.