ادىلەتتىڭ اپپاق الەمى

كەۋدەسى ەسىكتەي, بالتىرى بەسىكتەي, بادانا كوزدى ساۋىت كيگەن باتىردىڭ تۇكسيگەن قاباقتارىنىڭ استىنا مەيىرىم تابىن ۇيالاتقىسى كەلگەن. انشەيىندە ايبارىنان ءتامام جۇرت ىعاتىن, ەل قورعانى – ەردىڭ جۇرەگىندە, جۇزىندە مەيىرىم دە بولعانى دۇرىس قوي. تاۋ تۇلعاسىنا وراي ونە بويىنان قاجىر مەن قايراتتىڭ, ورلىك پەن ەرلىكتىڭ لەبى ەسىپ تۇرسا. ال, مىنا ءبىر ەسىلدىڭ قۇبا تالىنداي سولقىلداعان بويجەتكەننىڭ بويىنا اقىل مەن پاراسات جاراسپاق. سارىارقانىڭ ءلۇپ ەتكەن سامال جەلىمەن كوزگە كورىنەر-كورىنبەس بولىپ تەربەلەر نازىكتىك تە كەرەك شىعار. اراداعى الاش جۇرتىنىڭ ماڭگىلىك وشپەستەي ءمىنسىز بەينەسىن ءباھادۇر باتىر مەن اي سيپاتتى ارۋدىڭ بويىنا قوندىرسا, بار قازاقتىڭ كەسكىنى مەنمۇندالاپ قىلاڭ بەرمەي مە؟..

Nur Otan پارتياسى وبلىستىق فيليالى ۇيىمداستىرعان «كەدەرگىسىز كەلەشەك» جوباسى اياسىنداعى فەستيۆالدە ءدال وسىنداي مۇسىندەردى ءمىنسىز قالىپتاۋعا ۇمتىلىپ كەلە جاتقان 16 جاسار ادىلەتپەن جولىقتىق. جاتىرقاپ-جاتسىنبايدى ەكەن. جاس جۇرەگىندەگى القاۋسىز ارماننىن جايىپ سالدى. كەلەشەكتە مىناۋ دەگەن قولونەر شەبەرى اتانسام دەيدى. وندا دا جاڭا جوسىقتاعى پاپە-ماشە تۇرىنەن. ايتقاندايىن, پاپە-ماشە فرانتسۋز تىلىنەن نوبايلاپ قوتارعاندا «شاينالعان قاعاز» دەگەن ماعىنانى بىلدىرەدى ەكەن. ءتىل فرانتسۋزدىكى بولعانىمەن, ونەردىڭ تىرشىلىك باستاۋى قىتايدا قانات جايعان.

وقىرمانعا تۇسىنىكتى بولۋى ءۇشىن ءسال عانا تاراتىپ ايتاتۇعىن بولساق, بۇل ۋىلدىرعىش زات قوسىلعان قاعاز ماسساسى. الدەبىرەۋلەر ءۇشىن انشەيىن ساندىك-قولدانبالى ونەر ءتۇرى بولسا, ادىلەت ءتارىزدى قيال كەڭىستىگى كەڭ شەبەرلەر ءۇشىن شەت-شەگى جوق بايتاق الەم.

ماسەلەن, ادىلەتتىڭ ءوزى وسى ونەردى ءومىرىنىڭ ءبىر بولشەگى سانايدى ەكەن. ءوز قولىمەن جاساعان مۇسىندەرىمەن سىرلاسىپ, كەڭەسەدى. سىرتقى كەسكىن-كەيىپ قانا ەمەس, ىشكى جان-دۇنيەسىندەگى جاۋھار دۇنيەنى دە جارقىراتىپ كورسەتكىسى كەلەدى. مۇسىندەرىنىڭ باسىم كوپشىلىگى الاشتىڭ ءباھادۇر باتىرلارى. ولار ەشقاشان قيىندىقتان قورىقپاعان. تاعدىر-تالايىنداعى كولدەنەڭنەن كيلىككەن قيىندىق اتاۋلىنى جاۋجۇرەكتىگىمەن, قايسارلىعىمەن جەڭگەن. كىشكەنتاي كەزىنەن بەرى تالما اۋرۋىنا شالدىققان ادىلەت, بالكىم, تاعدىردىڭ سالعان تالكەگىن كاتەپتى قارا نارداي توزىمدىلىگىمەن جەڭگىسى كەلگەن شىعار. تال بويىنا قايسارلىق بىتسە ەكەن دەپ تىلەيتىن بولار, سىرقاتپەن كۇرەسۋ ءۇشىن دە سىرتتان مىنەز كەرەك قوي.

– بالام كىشكەنتايىنان بەرى ونەرگە ءبىرتابان جاقىن. بالالار شىعارماشىلىق ۇيىنە بارادى. كادىمگى كوپ ادام ەسكەرە بەرمەيتىن قاعاز قالدىقتارىنان ءاپ-ادەمى مۇسىندەر جاساۋعا ىنتىق. تالابىنا نۇر ءبىتسىن دەپ وتىرامىن, – دەيدى ادىلەتتىڭ اناسى ءازينا سالىقوۆا, – ەڭبەگىن ەل كورگەنى دۇرىس قوي. باعى جانىپ, باعالانىپ جاتسا, بالانىڭ دا ىنتاسى ارتا تۇسپەي مە؟  ەسىركەي ەسكەرىپ, جاساعان بۇيىمدارىن ەل نازارىنا ۇسىنىپ جاتقان Nur Otan پارتياسىنىڭ باستاماسى باعالى جاي ەكەن.

فەستيۆالدەن سوڭ تاعى ءبىر مارتە جولىقتىق. بۇل جولى ادىلەتتىڭ ۋىلجي نۇرلانعان جۇزىنە ءوزى قالىپتاعان مۇسىندەردىڭ ديدارىنداعى قاجىردىڭ قوناقتاعانىن كورىپ قۋانىپ قالدىم.

اقمولا وبلىسى