رەتى جاعىنان №28 دەپ بەلگىلەنگەن بۇل ءبىلىم وشاعى ءجاي مەكتەپ ەمەس, مەكتەپ-گيمنازيا بولدى. بۇرىنعى كاسىپتىك-تەحنيكالىق كوللەدج عيماراتىن ورتا ءبىلىم وشاعىنا لايىقتاپ جوندەۋ جۇمىستارى شىلدە ايىندا باستالعان بولاتىن. ەندى 900 ورىندىق ءۇش قاباتتى نىسان جاڭا توقساندا پايدالانۋعا بەرىلىپ وتىر.
مەكتەپتىڭ اعىمداعى جوندەۋىنە 250 ميلليون تەڭگە جۇمسالسا, ونىڭ 95 ميلليونى دەمەۋشىلەردىڭ قارجىلاندىرۋىمەن جۇزەگە اسىپ وتىر. توبەسى جابىلىپ, ءىشى جاڭارتىلدى, كابينەتتەر جاڭا جيھازدارمەن جابدىقتالدى. اسىرەسە, حيميا, فيزيكا, بيولوگيا, روبوت تەحنيكاسى سىنىپتارىنا زاماناۋي قۇرال-جابدىقتار ورناتىلدى. 160 ورىندىق اسحانا, مۋزىكا, حورەگرافيا, سپورت, اكت زالدارى, دالىزدەر قولايلىلىعىمەن زاماناۋي تالاپتارعا جاۋاپ بەرەدى.
«پرەزيدەنت قاسىم-جومارت توقاەۆ قازاقستان حالقىنا جولداۋىندا «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ, ۇلتارالىق قاتىناس تىلىنە اينالاتىن كەزەڭى كەلەدى» دەپ ايتقان ەدى. قازىر وبلىس ورتالىعىندا مەملەكەتتىك تىلدە ءبىلىم بەرەتىن 6 مەكتەپ جۇمىس ىستەيدى. الايدا سولاردىڭ ءوزى جاس ۇرپاققا انا تىلىندە ءبىلىم بەرۋگە تارلىق ەتكەنى بايقالىپ جۇرگەن ەدى. قىسقا مەرزىم ارالىعىندا ۇلكەن جۇمىس اتقارىلدى. مەكتەپتىڭ اشىلۋى مەملەكەتتىك ءتىلدىڭ مارتەبەسىن ارتتىرۋ جانە جالپى ءبىلىم بەرۋدى دامىتۋ سالاسىندا جاسالعان ماڭىزدى قادام بولىپ تابىلادى. مۇنىمەن جۇمىس توقتاپ قالمايدى, ءالى دە اۋلانى اباتتاندىرۋ, كولىك تۇراعىن اشۋ سياقتى جۇمىستار بار», دەدى قۇتتىقتاۋ سوزىندە قوستاناي قالاسىنىڭ اكىمى قايرات احمەتوۆ.
قالا باسشىسى قاراشا ايىنىڭ اياعىنا قاراي گيمنازيانىڭ ءبىرىنشى قاباتىندا بۇلدىرشىندەر ءۇشىن 90 ورىندىق شاعىن ورتالىق اشىلاتىنىن حابارلادى.
قوستاناي قالاسىنىڭ قۇرمەتتى ازاماتى, اقىن اقىلبەك شاياحمەت ءسوزىن ۇلى اعارتۋشى ىبىراي ءالتىنساريننىڭ «كەل بالالار, وقىلىق, ءبىر اللاعا سىيىنىپ» ولەڭىمەن باستادى.
«وسىدان 42 جىل بۇرىن مەن اسكەري قالاشىق شاعىن اۋدانىندا تۇرعاندا ءوزىمنىڭ بالالارىمدى جالعىز قازاق مەكتەبىنە بەرگەن ەدىم. ول كەزدە ى.التىنسارين اتىنداعى مەكتەپ-ينتەرنات بولاتىن. اللاعا شۇكىر, نەمەرەلەرىم دە قازاق مەكتەپتەرىندە وقىپ ءجۇر. تاۋەلسىز ەل بولدىق. ءبىزدىڭ مەملەكەتىمىزدىڭ بولاشاعى – قازاق تىلىندە» دەپ, اقىلبەك اعامىز قۋانىشىمەن ءبولىستى.
سالتاناتتى شارادا اتا-انا قىدىربەك قيىسقان مەكتەپكە عالىم-ۇستاز, قوعام قايراتكەرى, (لينگۆيست جانە ماتەماتيك), پۋبليتسيست ءارى اۋدارماشى, "قازاقتىڭ لومونوسوۆى" اتانعان, وتكەن عاسىر باسىندا قوستاناي ۋەزى بويىنشا «الاش وردانىڭ» كوميسسارى جانە قوستانايداعى بولىمشەسىنىڭ توراعاسى قىزمەتىن اتقارعان ەلدەس ومار ۇلىنىڭ ەسىمىن بەرۋ جونىندە ۇسىنىس ءبىلدىردى.
جاڭا ءبىلىم ورداسىندا ازىرگە 500-گە تارتا شاكىرت ءبىلىم الۋدا. ولاردىڭ باسىم بولىگى قوستانايداعى ب.مومىش ۇلى اتىنداعى №5 ارالاس مەكتەپتەن اۋىسىپ كەلدى. مۇندا ءداستۇرلى ءبىلىم بەرۋمەن قاتار "جاس سارباز" سىنىپتارى دا بار.