مەملەكەت باسشىسى ق.توقاەۆ حالىققا ارناعان جولداۋىندا ۇشاق بيلەتىنىڭ قىمباتتىعىن سىنعا العانى بەلگىلى. «ەلوردانى الەمنىڭ ءىرى قالالارىمەن جانە حالىقارالىق قارجى ورتالىقتارىمەن تىكەلەي رەيس ارقىلى بايلانىستىرۋ وتە ماڭىزدى. باسقاشا ايتقاندا, «اشىق اسپان» جۇيەسىن اشۋ كەرەك. بۇل مەنىڭ ۇكىمەتكە بەرگەن تاپسىرمام. قورقاتىن ەشتەڭە جوق, ءبىر كومپانياعا قاراۋدىڭ قاجەتى جوق» دەگەن بولاتىن پرەزيدەنت.
مەملەكەت باسشىسىنىڭ سىنىنان كەيىن كوپ ۇزاماي يندۋستريا جانە ينفراقۇرىلىمدىق دامۋ مينيسترلىگى بيلەت باعاسىن ارزانداتۋ شارالارى قابىلداناتىنى تۋرالى حابارلادى. ال 1 قاراشادان باستاپ ەلىمىزدەگى ەڭ ءىرى دەگەن 11 اۋەجايدا «اشىق اسپان» رەجىمى ىسكە قوسىلدى.
– 1 قاراشادان باستاپ نۇر-سۇلتان, الماتى, شىمكەنت, اقتاۋ, قاراعاندى, وسكەمەن, پاۆلودار, كوكشەتاۋ, تاراز, پەتروپاۆل, سەمەي قالالارىنىڭ اۋەجايلارىندا رەيستەردىڭ سانىن شەكتەۋ الىنىپ تاستالدى. قازاقستاندىق تاسىمالداۋشىلار ۇشپايتىن باعىتتار بويىنشا شەتەلدىك كومپانيالارعا 5-دارەجەلى «اسپان ەركىندىگىن» ۇسىنۋ قاراستىرىلعان «اشىق اسپان» رەجىمى ەنگىزىلدى, – دەپ حابارلادى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى.
شەتەلدىك اۋە كومپانيالارىنىڭ قازاقستانداعى ءىرى قالالارعا جاسايتىن مارشرۋتتارىن كەڭەيتە تۇسەتىن رەجىم 3 جىل مەرزىمدى قامتيدى. ودان كەيىن دە ۇزارتۋ مۇمكىندىگى قاراستىرىلعان. ەندى ۇشۋ باعىتتارى مەن ونى جۇزەگە اسىراتىن كومپانيالاردىڭ قاتارى كوبەيىپ, وتاندىق اۋە تاسىمالى نارىعىندا باسەكەلەستىك كۇشەيىپ, بيلەت باعاسى دا ارزانداۋعا ءتيىس.
جالپى, «اشىق اسپان» رەجىمىن ەنگىزۋ تۋرالى ۇسىنىستىڭ تالقىلانىپ كەلە جاتقانىنا بىرنەشە جىل بولدى. ونى نۇر-سۇلتان قالاسىنداعى اۋەجايعا ەنگىزۋ تاجىريبەسى دە بار. ەڭ العاش 2017 جىلى EXPO-2017 حالىقارالىق كورمەسىنە وراي 10 ماۋسىم مەن 10 قىركۇيەك ارالىعىندا ەلوردا اۋەجايىندا «اشىق اسپان» قاناتقاقتى رەجىمى ەنگىزىلدى. ءسويتىپ شەتەلدىك كومپانيالار نۇر-سۇلتانعا اپتاسىنا 7 رەيسكە دەيىن قاتىناۋعا مۇمكىندىك الدى. بۇل شارا كورمەگە تۋريستەر تارتۋ ءۇشىن قابىلدانعان-دى. سول ارقىلى بىرنەشە اي ىشىندە شەتەلدىك تاسىمالداۋشىلار ەلوردادان ۆارشاۆا, حەلسينكي, بەيجىڭ, باتۋمي باعىتىندا اپتاسىنا بىرنەشە مارتە ۇشا باستادى. وتاندىق كومپانيالار دا كيەۆ, سيان, ەرەۆان, باتۋمي سىندى جاڭا باعىتتاردى باعىندىردى. قاناتقاقتى رەجىم جاقسى ناتيجە كورسەتكەن سوڭ ءتيىستى مينيسترلىك ونىڭ مەرزىمىن ۇزارتۋعا شەشىم قابىلداعان بولاتىن.
ەندى مىنە, «اشىق اسپان» ەلدىڭ 11 اۋەجايىندا ءبىر مەزگىلدە ىسكە قوسىلىپ وتىر. يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ دەرەكتەرى بويىنشا وماننىڭ اۆياتسيالىق بيلىگىمەن كەلىسسوزدەر جۇرگىزۋىنىڭ ناتيجەسىندە Salam Air اۆياكومپانياسى ماسكاتتان الماتىعا دەيىن اۋە ءدالىزىن اشۋدى جوسپارلاۋدا. قازاقستاندىق Air Astana بولسا, كەلەر جىلدىڭ ءبىرىنشى توقسانىندا جيدداعا اپتاسىنا 3 رەت قاتىناي باستاماق. SCAT اۆياكومپانياسى 30 قاراشادان باستاپ جيددا مەن ماديناعا اپتاسىنا ەكى رەيس ورىندايتىن بولادى.
مينيسترلىكتىڭ ءباسپاسوز قىزمەتىنىڭ حابارلاۋىنشا, ازاماتتىق اۆياتسيا كوميتەتى ازياداعى ءىرى لوۋكوستەر سانالاتىن مالايزيانىڭ Air Asia كومپانياسىمەن, دۇنيە جۇزىندەگى ەڭ ءىرى اۋە كومپانيالارىنىڭ ءبىرى, سينگاپۋرلىق Singapore Airlines-پەن, رەسەيدىڭ «ۋرالسكيە اۆياليني» كومپانياسىمەن كەلىسسوزدەر جۇرگىزدى.
– «ۋرالسكيە اۆياليني» 22 جەلتوقساننان ەكاتەرينبۋرگ – الماتى باعىتىندا قاتىناي باستايدى. پولشانىڭ LOT كومپانياسىمەن كەلىسىم جاسالىپ, ول 2020 جىلدىڭ جازىنان ۆارشاۆادان نۇر-سۇلتانعا جاسالاتىن رەيس سانىن اپتاسىنا 7 مارتەگە دەيىن ارتتىراتىن بولدى. وعان قوسا LOT 2021 جىلدان باستاپ الماتى باعىتىندا رەيس اشادى, – دەپ حابارلادى مينيسترلىكتىڭ ءباسپاسوز قىزمەتى. قازاقستاندىق بيۋدجەتتى تاسىمالداۋشى Fly Arystan 13 جەلتوقساننان باستاپ ەلوردادان ماسكەۋگە كۇن سايىن رەيس ورىندايتىنىن دا ايتا كەتەيىك.
جۋىق ارادا قاتاردىڭ Qatar Airways اۆياكومپانياسىمەن, بىرىككەن اراب امىرلىگىنىڭ Emirates, Fly Dubai اۆياكومپانيالارىمەن ۇشۋ باعىتتارى بويىنشا جاڭا مارشرۋتتاردى اشۋ ماقساتىندا كەزدەسۋلەر وتپەك.
ءسوز باسىندا ايتىپ وتكەنىمىزدەي, «اشىق اسپان» رەجىمى ەلىمىزدىڭ اۋە تاسىمالى نارىعىنا جاڭا شەتەلدىك تاسىمالداۋشىلاردى تارتۋعا, ءسويتىپ بۇل نارىقتا باسەكەلەستىك ورناتۋعا ىقپال ەتۋگە ءتيىس. جاڭا حالىقارالىق مارشرۋتتار اشىلىپ, اۆيابيلەتتەردىڭ قۇنى تومەندەپ, اۋە كولىگىنىڭ حالىققا قولجەتىمدىلىگىن ارتتىرادى, سونىمەن قاتار ءتۋريزمنىڭ دامۋىنا وڭ ىقپال ەتەدى. شەتەلدىك كومپانيالاردىڭ قازاقستان اۋەجايلارى ارقىلى باسقا ەلدەرگە ۇشۋى ەلىمىزدىڭ ترانزيتتىك الەۋەتىن نىعايتادى دەپ كۇتىلۋدە.